1 SAMUELA 14 - Mara Bible RV (BSI)

Zawnathâ ta Philistinâ mo a pahnie

¹ Noh kha cha Sawla sawchapawpa Zawnathâ ta a chariah chhaichhi a chabatuhpa satliapa hnohta, “A vy teh, haosâ lâ Philistinâ pheisaihzy yna lâ hao vawh tua ei si,” tah ta. A paw deikua cha chho leipa ta.

² Sawla cha Kibia khih khôtho, Mikaraw liata pawmikarânâ kô ry liata y ta, a hnohta pheisaih 600 rachhôh y ei ta.

³ Ephaw a kypa Ahiza chhao ama hry liata a hlao hra ta. Ano he Ikhabaw unawhpa Ahitu sawchapawpa châ ta, Ikhabaw cha Phinehâ sawchapawpa châ ta, Phinehâ cha Silô khihpi liata Abeipa theihthaipa Eli sawchapawpa kha a châ. Zawnathâ a siepa cha zawpizy ta pahno veih ei.

⁴ Philistinâ pheisaihzy yna su tlô nawpa ta Zawnathâ ta lâpi a chhih â chhuahpa saikao lâpi chavei chachâh liata lôkâhpa y ta, sâkhapa cha Bôze tah ei ta, ahropa cha Seneh ama tah.

⁵ Lôkâhpa miakhapa cha Mikamâ dady maw lâchhâh ta y ta, ahropa cha Kebâ dady chho lâchhâh ta a y.

⁶ Zawnathâ ta a chariah chhaichhi a chabatuhpa satliapa hnohta, “A vy teh, chopawtaileipa sahlao pheisaihzy yna lâ hao vaw tua ei si. Abeipa ta hmo miah a taopa thlâh ha ngyu aw. Chyhsa hluhpi ta tlyma, chyhsa chyhta tlyma, pachhana rai hria awpa ta Abeipa cha khâpa ta hmahta pakhâ thei vei,” tah ta.

⁷ A chariah chhaichhi chabatuhpa ta a hnohta, “Na palôh liata a ypa zydua tao mah y, na hnohta ei y, na pachâna cha ei pachâna a châ hra,” tah ta.

⁸ Zawnathâ ta, “Moh teh, haosâ kei chakapa ta chyhsazy yna lâ hao vawh aw pi ta, eimâ kei pahmôsa aw.

⁹ Âmo ta eima hnohta, ‘Nâmo lâta eimâ vy hlâlei cha vaw y thlâh ha teh u,’ miah ama tah khiahta cha, eima yna su liata a chalihpa ta a duah thlâh ha aw pi ta, âmo lâ khy aw ma pi.

¹⁰ ‘Keimo lâ a khy teh u,’ ama tah khiahta deikua cha, khy aw pi ta, Abeipa ta eima ku liata miah a pie haw tahpa eima châta ngiana a châ aw,” tah ta.

¹¹ Ama pano ta Philistinâ pheisaihzy cha a kaw pahmôsa ei ta. Philistinâ mo ta, “Moh tua u, Hebrai mo amâ nyuna khaohtlô tawhta ama vaw pua huh,” tah ei ta.

¹² Pheisaih su liata chyhsazy ta Zawnathâ nata a chariah chhaichhi a chabatuhpa cha awsao ei ta, ama hnohta, “Keimo lâ a khy teh u, hmo eima cha pahmô aw,” tah ei ta. Zawnathâ ta a chariah chhaichhi a chabatuhpa hnohta, “Na kaw zi teh, Abeipa ta Izarei ku liata a pie ha ei,” tah ta.

¹³ Zawnathâ cha a ku nata a phei ta kiah ta, a chariah chhaichhi chabatuhpa ta pazi ta. Philistinâ mo cha Zawnathâ hmiakô liata pao ei ta, a chariah chhaichhi a chabatuhpa chhao ta ano hnôhlâ ta Philistinâ mo cha thie lymâ hra ta.

¹⁴ Zawnathâ nata a chariah chhaichhi a chabatuhpa ta Philistinâ mo ama thie tua chai noh liana chata, sâh bai khophie tuna rachhôh a kawhpa su liata chyhsa pakih tlai ama thie.

¹⁵ Riehmo liata zy, lyu liata zy, zawpi zydua hry liata chhao, a pahlawpa ta a chalyu ei ta. Riahvaituhpa pheisaihzy nata hrâ a siepa pheisaihzy taihta thata amâ chalyu. Alo a vaw sih ta, thata tyhreihna vaw y ta.

¹⁶ Benzami râh Kibia liata Sawla riahvaituhpazy ta mohmia pasaih ei ta, zawpizy cha su to lâta a râpaipa ta ama ypa hmô ei ta.

¹⁷ Sawla ta a hnohta chyhsa a ypazy hnohta, “Tahmâ maluh a reih u la, ahyzy ma keimo tawhta a sie ei tahpa tlua teh u,” tah ta. Maluh cha reih ei ta, Zawnathâ nata a chariah chhaichhi chabatuhpa cha y leipa ei ta.

¹⁸ Sawla ta Ahiza hnohta, “Khazohpa Byh kha he lâ vaw cheih teh u,” tah ta. Cha daihti liata cha, Khazohpa Byh Izarei sawzy hnohta a y daihti châ ta.

¹⁹ Sawla ta theihthaipa bie â chho hai nota, Philistinâ mo riehmo liata tymâna thata y ta, paru via lymâ ta. Sawla ta theihthaipa hnohta, “Na ku kha la teh,” tah ta.

²⁰ Sawla nata a pheisaih zydua cha a hmaohpakhy ei ta, adyuhna lâ pua ei ta. Philistinâ mo cha thata a tymâ ei ta, âmo nata âmo ta zaozi ta a chhawh chaimâh ei ta.

²¹ Cha hlâta Philistinâ mo chhâh a châpa Hebrai chyhsa, Philistinâ mo riehmo lâta a sie hrapazy chhao ta, Sawla nata Zawnathâ hnohta a ypa Izarei mo lâ a vaw palie ei ta.

²² Cha hawhna hra chata Epharai tlâh râh liata a nyupa Izarei chyhsa zydua chhao ta, Philistinâ mo amâ râpai hapa thâtih ama thei nahta, âmo chhao adyuhna liata a hlao hrapa ta Philistinâ mo cha thata a chadai hra ei ta.

²³ Cha noh ta Abeipa ta Izarei cha pachha ta, Bethave khô lâ taihta amâ dyuh lymâ.

²⁴ Cha noh liata, Izarei pheisaihzy cha thachhâ panaopa ta y ei ta. A chhâpa cha Sawla ta, “Zâlâ daihti a tlô hlâta nata ei chariahpazy chô liata phuh ei la khai hlâta pati a niepa cha chhiesapa ta y mawh sy,” tahpa ta pheisaihzy cha bietai ta a chahry hapa vâ ei ta a châ. Chavâta pheisaih ahy hmahta pati a padipa y veih ei.

²⁵ Pheisaih zydua cha râhmâhpa kei tlô ei ta, moh tua u, alei liata kheihti vaw y thlâh ha ta.

²⁶ Pheisaihzy ta râhmâhpa amâ ngia nahta, moh teh u, kheihti vaw loh ngâ kaw ta. Châhrasala bietai ama chipa vâta, a pakah liata a ku â tupa rai y veih ei.

²⁷ Zawnathâ deikua cha, a paw ta bietai ta pheisaihzy a vaw chahry hapa cha pahno leipa ta, a chôchahrei chabapa pawhmao ta kheihthlawh liata kei dy ta, a pakah liata a ku â tu ta, a mo vaw sia ha ta.

²⁸ Pheisaih pakha ta a hnohta, “Na paw ta, ‘Tanoh pati a niepa cha chhiesapa ta y mawh sy’ tahpa ta pheisaihzy bietai a i ngaitapa ta chahry ha ta, chavâta pheisaihzy he ama panao hapa a châ,” tah ta.

²⁹ Zawnathâ ta, “Ei paw cha râh nô a papo cha zaw! Pachâ tua u, kheihti a chyhta ei padipa vâta ei mo liahsa a vaw sia ha hih.

³⁰ Tanoh he pheisaihzy ta ama chariahpa hmo hrao awpa ama hmôpa maih ama khopa hawhta nie thei ei sala, khatlu ta ma a pha via aw tly? Philistinâ mo eima thiepa chhao ama hluh via syulyu awpa tlai” tah ta.

³¹ Cha noh ta Mikamâ tawhta Aizalô taihta Philistinâ mo cha a dyuh ei ta. Pheisaihzy cha thata panao ei ta.

³² Pheisaihzy ta ama hraona hmo cha a zawhnao ei ta, mietakuzy, viahchao tôhpazy, viahchao tawzy patu ei ta, alei liata thie ei ta, a thisaih chhaota nie ei ta.

³³ “Moh tua, pheisaihzy ta thisaih chhaota niepa ta Abeipa chô liata hmo ama parao ha huh,” tahpa ta Sawla cha chho ei ta. Sawla ta, “Piehpie ngaitapa ta hmo nama tao haw. Tahmâ alô laipa thlai na vaw pahluapa teh u,” tah ta.

³⁴ Sawla ta, “Pheisaihzy hry liata chahryh u la, ama hnohta, ‘Chyhsa to ta a viahchao tlyma, a mietaku tlyma, he lâ a vaw chhi sala, he liata thie sala, nie mawh sy. Thisaih chhaota niepa ta Abeipa chô liata hmo parao khuh vy,’ a tah na tahpa ta kei chho teh u,” tah ta. Cha zâ liata pheisaih zydua ta ama viahchao tôhpa a vaw chhi chyu ei ta, cha liata thie ei ta.

³⁵ Sawla ta Abeipa châta maisâh tao ta, cha cha Abeipa châta maisâh a tao tua chaipa a châ.

³⁶ Chatawhcha Sawla ta, “Zâ ta Philistinâ mo a zâ dyuh ei sih la, my khih pavâna taihta hrao ei suh u, pakha hmah pahlôh kha ei suh u,” tah ta. Âmo ta, “Pha na tahpa maih tao mah y,” tah ei ta. Theihthaipa deikua ta, “He liata Khazohpa a hnia tua ei suh u,” tah ta.

³⁷ Sawla ta, “Philistinâ mo cha ei zâ dyuh aw mâ? Âmo cha Izarei ku liata na pie aw mâ?” tahpa ta Khazohpa hiahri ta. Châhrasala cha noh liata Khazohpa ta a chhy leipa ta.

³⁸ Chatawhcha Sawla ta, “Nâmo Izarei phopi chhituhpa zydua kha he lâ a vaw hnia u la, tanoh he khâpa moleina ma eima tao haw tahpa a laichadai u la, pahno a chhuah teh u.

³⁹ Izarei pachhatuhpa Abeipa hrona reipa ta ei reih, ei sawchapawpa Zawnathâ chô liata a tlupa chhao rai châ sala, a thi thlyu awpa a châ,” tah ta. Châhrasala a bie â chhy ngâhpa pheisaih zydua hry tawhta pakha hmahta y leipa ei ta.

⁴⁰ Chatawhcha Sawla ta Izarei zydua hnohta, “Nâmo su kha liata y u la, kei nata ei sawchapawpa Zawnathâ he su hropa liata eima y aw,” tah ta. Pheisaihzy ta Sawla hnohta, “Pha na tahpa hawhta tao mah y,” tah ei ta.

⁴¹ Sawla ta, “Hy Abeipa, Izarei Khazohpa, khazia ma tanoh châ chakaotuhpa he na chyh-ei khoh vei tly? He moleina he keima chô liata tlyma, ei sawchapaw Zawnathâ chô liata tlyma a y khiahta cha, Hy Abeipa Izarei Khazohpa y, Uri châ sala, he moleina he na phopi Izarei chô liata a y khiahta deikua cha, Thumi châ mawh sy,” tah ta. Zawnathâ nata Sawla chô liata tlu ta, zawpi cha a hua ha ei ta.

⁴² Sawla ta, “Kei nata ei sawchapawpa likah pasia teh u,” tah ta. Zawnathâ chô liata tlu ha ta.

⁴³ Sawla ta Zawnathâ hnohta, “Khâpa hmo ma na tao haw, na chho teh,” tah ta. Zawnathâ ta a chhy ta, “Ei chôchahrei chabapa pawhmao ta kheihti a chyhta ei padi haw, keima na ei châ, ei thi awpa a châ,” tah ta.

⁴⁴ Sawla ta, “Na thi thlyu awpa a châ, Zawnathâ. Na thi vei khiahta cha, Khazohpa ta ei chô liata tao sala, cha hlâta pasa viapa chhao ta tao mawh sy,” tah ta.

⁴⁵ Châhrasala zawpizy ta Sawla hnohta, “He pachhana rônah ngaitapa Izarei hry liata a vaw tlôkheituhpa Zawnathâ he a thi aw ma? Châ bao va! Abeipa hrona reipa ta eima reih, a sâbu miakha chhao alei liata a tla awpa châ vei. Tanoh he ano cha Khazohpa a hrialâhpa a châ hih,” tah ei ta. Zawpi ta Zawnathâ cha pachha ha ei ta, thiepa châ khao vei.

⁴⁶ Cha khai tawhta Sawla cha Philistinâ mo â chadaipa cha kuasai ta, Philistinâ mo cha ama yna su chyu lâ sie ha ei ta.

Sawla Izarei chariahpazy â dyuh

⁴⁷ Sawla cha Izarei bei a châ nahta, su to liata a chariahpazy cha a dyuh lymâ ta. Môabâ, Amawna mo, Edômâ, Zôbâ beizy nata Philistinâ mo zy a dyuh ta, â heina lâ maihta pahniena to lymâ ta.

⁴⁸ Riahpha ngaitapa ta a dyuh lymâ ta, Amale mo pahnie ta, Izarei cha âmo a hraotuhpazy ku tawhta a pachha ha ei.

⁴⁹ Sawla sawchapawzy cha Zawnathâ, Isvi nata Mekhisua zy châ ei ta, a sawchanô panozy moh cha a uhtheinô Merâbi châ ta, a seihnainô Mikâli a châ.

⁵⁰ Sawla lapinô moh cha Ahinô châ ta, ano he Ahimazi sawchanô a châ. A pheisaihzy hyutuhpa moh cha Abane châ ta, ano he Sawla puhpa Nerâ sawchapawpa a châ.

⁵¹ Kisâ cha Sawla paw châ ta, Abane paw Nerâ cha Abie sawchapawpa a châ.

⁵² Philistinâ mo nata Izarei mo cha Sawla hro chhôh zydua ta thata a dyuh ei ta, chavâta Sawla ta chyhsa thatlôpa nata riahphapa a hmôpa maih cha a pheisaih châta a la lymâ ei.