1 SAMUELA 13 - Mara Bible RV (BSI)

Sawla Philistinâ mo â dyuh

¹ Sawla cha kô kha a y tawhta a bei pathao ta. Izarei chô liata kô no â bei tawhta,

² Sawla ta Izarei pheisaih 3,000 a tlyh ta. Pheisaih 2,000 Mikamâ nata Bethel tlâh râh liata Sawla hnohta y ei ta, pheisaih 1,000 Benzami râh Kibia liata Zawnathâ hnohta y ei ta. Ahropazy deikua cha ama poh o lâ chyu ta padisa khai ta.

³ Zawnathâ ta Kebâ liata Philistinâ pheisaih su a dyuh ta pahnie ta, cha cha Philistinâ mo ta vaw thei ei ta. Cha kyh liata Sawla ta, “Hebrai mo ta thei mawh ei sy,” tahpa ta râh zydua liata chiahmie patôsa ta.

⁴ Sawla ta Philistinâ pheisaih su a dyuh ta a pahniepa thâtih nata Izarei cha anosasyh ta Philistinâ mo khakhaipa ta â tao haw tahpa thâtihzy Izarei zydua ta thei ei ta. Izarei phopi cha Sawla hnohta Kilkal liata a hmaohpakhy ei ta.

⁵ Philistinâ mo cha Izarei a dyuh awpa ta a pahmaoh ei ta, talailih 30,000 nata arâ pheisaih 6,000 châ ei ta, pheisaihzy chhao tilaipi raphyu liata sadi zie tlai ta ama hluh. Philistinâ mo cha khy ei ta, Bethave nochhi lâchhâh ta Mikamâ liata riehmo paryh ei ta.

⁶ Izarei pheisaihzy cha chadiepa ta y ei ta, ama duahmo a pha leizie ama hmô nahta, lôpu liata zy, apopa liata zy, lôpanô liata zy, khaohtlô liata zy, tipâh ruapa liata zy a nyu ei ta.

⁷ Hebrai mo thokhazy cha Zawdâh chakapa ta Kâdâ nata Kilia râhzy lâ a râ ei ta. Sawla deikua cha Kilkal liata y thlâh ha ta, a hnohta a ypa pheisaih zydua cha chipa ta a chalyu ei ta.

⁸ Samuela ta noh a raopa hawhta, Sawla cha noh sari hâ ta, châhrasala Samuela cha Kilkal lâ a vy to leipa ta. Chavâta a hnohta a ypa pheisaihzy ta Sawla cha paisai pathao ei ta.

⁹ Sawla ta, “Raopa hlâna nata aryhna hlânazy kha, he lâ na vaw pie teh u,” tah ta. Raopa hlâna cha hlâ ta.

¹⁰ Raopa hlâna a hlâ khaipata nahta, Samuela cha vaw tlô ta. Sawla cha ano dy awpa nata a naoh awpa ta pua ta.

¹¹ Samuela ta, “Khâpa hmo ma na tao haw?” tah ta. Sawla ta, “Izarei phopi ta na paisai lymâ ei ta, nâma hra ta noh raopa noh liata vaw tlô khao leipa chi ta. Mikamâ liata Philistinâ mo cha amâ hmaohpakhy haw tahpa thei tlôh na ta.

¹² ‘Philistinâ mo ta Kilkal liata nâ vaw dyuh daihmâ tlôh ei ta, Abeipa khokheina hra hia leipa na ta’ tahpa ta pachâ na ta. Raopa hlâna cha a lei thei leipa ta ei vaw hlâ hapa a châ,” tah ta.

¹³ Samuela ta Sawla hnohta, “Hru ngaitapa ta hmo na tao haw. Abeipa na Khazohpa ta zyh awpa ta biepiepa a cha piepa zyh khoh va chi. Zyh ha la cha, Izarei chô liata nâ beina he Abeipa ta chhâzaw châta a pa-i ha awpa tlai.

¹⁴ Châhrasala tahmâ cha na khinarâh he a duah parei khao aw vei. Abeipa ta bie a cha piepa na zyh leipa vâta, Abeipa ta ano palôh a phaohpa chyhsa tlua ta, a phopi chô liata a bei awpa ta Abeipa ta ano cha a rao haw,” tah ta.

¹⁵ Chatawhcha Samuela cha thyu ta, Kilkal tawhta sie ha ta. Sawla nata a hnohta a ypazy deikua cha, pheisaihzy a tyh awpa ta Kilkal tawhta Benzami râh Kibia khih lâ khy ei ta. Sawla cha a hnohta a ypa pheisaih maluh reih ta, ama zydua ta 600 rachhôh ama châ.

¹⁶ Sawla nata a sawchapawpa Zawnathâ nata ama hnohta pheisaih a ypazy cha Benzami râh Kibia khih liata y ei ta. Philistinâ mo cha Mikamâ liata riehmo paryh ei ta.

¹⁷ Hraotuhpazy cha Philistinâ mo riehmo tawhta py thôh ta vaw pua ei ta, py kha cha Suâ râh Ôpharâ khih pangaina lâpi a chhih ei ta,

¹⁸ py hropa ta Behôrô lâ pangaina lâpi a chhih ei ta, py kha heih cha râhchawhpa daih lâ Zebô saikao lâ a heihpa râhri lâpi a chhih ei ta.

¹⁹ Izarei râh pôhpalôhpa liata syudaihpa rai y leipa ei ta, a chhâpa cha Philistinâ mo ta, “Hebrai mo ta zaozi nata asei zy amâ tao pathlei aw na,” tah ei ta ama pakhâ hapa vâta a châ.

²⁰ Chavâta Izarei zydua ta ama tupizy, leipalienazy, ahreizy nata sâkarâzy chata awpa ta, Philistinâ mo yna lâ ama zu tyh.

²¹ Ama chatasana mâ cha, leipaliena thuaku nata ahrei chatana châta sekel su thôh su no châ ta, sâkarâ nata tupi chatana nata thua hmao pazaona châta sekel su thôh su kha a châ.

²² Adyuhna noh ta Sawla nata Zawnathâ hnohta pheisaih a ypazy cha zaozi tlyma, asei tlyma a hneipa rai y leipa ei ta, Sawla nata a sawchapawpa Zawnathâ deita ta hnei ei ta.

²³ Philistinâ pheisaihzy cha Mikamâ pangaina saikao lâpi lâta sie ei ta.