1 SAMUELA 12 - Mara Bible RV (BSI)

Samuela ta Izarei sawzy a pathlie

¹ Samuela ta Izarei zydua hnohta, “Pachâ teh u, ei hnohta bie nama reipa zydua nathlie na ta, nama chô liata ryu a reih awpa bei ei cha taopa ei.

² Tahmâ cha nama hmia lâta a sie awpa bei nama hnei haw. Kei cha machâpa nata luhpawhpa châ ha na ta, ei sawchapawzy nama hnohta ama y hih. Ei thyutlia daihti tawhta tanoh taihta nama hmia lâta ei sie lymâ.

³ Tahmâ nama hmiakô liata ei duah hih. Eina reipasipasua nawpa ei chi nama hneipazy cha, Abeipa hmiakô liata nata a sathawthupa hmiakô liana heta reih teh u. Ahy viahchao tôhpa ma ei chhu? Ahy alâ ma ei chhu? Ahy ma ei dôvei? Ahy ma ei tlybai? Ahy ku tawhta ma panaopapana ei la? Cha panaopapana chata a mo a pachaopa ei châ ma? Reih teh u, ei cha thô khai aw ei,” tah ta.

⁴ Âmo ta, “Miah dôvei beih leipa chi ta, miah tlybai beih hra leipa chi ta, ahy ku tawhta hmah â doleipa ta la beih va chi,” tah ei ta.

⁵ Samuela ta ama hnohta, “Ei ku liata adoleina khâpa hmah hmô veih ei chi tahpa tanoh he Abeipa cha nâmo châ pahnokheituhpa châ ta, a sathawthupa chhao pahnokheituhpa a châ hra,” tah ta. Âmo ta, “Ano cha pahnokheituhpa a châ,” tah ei ta.

⁶ Samuela ta Izarei phopi hnohta, “Mawsi nata Arawna a raotuhpa Abeipa nata châ pathlatuhpazy Izi râh tawhta a kaw chhi papuatuhpa ta a cha pahnokhei ei.

⁷ Chavâta tahmâ a chalihpa ta a duah u la, Abeipa ta nama chô liata nata châ pathlatuhpazy chô liata siana hmo a tao tyhnazie zy kha, Abeipa hmiakô liata ei châ laichadaikhei aw ei.

⁸ Izi râh liata Zakaw â ngia hnôh lâna khata, châ pathlatuhpazy ta Abeipa awsao ei ta, Abeipa ta Mawsi nata Arawna tuah ta, âmo ta châ pathlatuhpazy cha Izi râh tawhta a chhi papua ei ta, he su liata ama vaw pahrâsa.

⁹ Châhrasala Abeipa ama Khazohpa cha my ha ei ta. Chavâta Abeipa ta âmo cha Hâzaw pheisaih hyutuhpa Siserâ ku liata nata Philistinâ mo ku liata nata Môabâ bei ku liata zuah ha ta. Âmo chata Izarei sawzy cha a vaw dyuh ei ta.

¹⁰ Chatawhcha Abeipa awsao ei ta, a hnohta, ‘Eima vaw molei ha na, Abeipa a heihsai pi ta, Bâlâzy nata Astarôzy eima vaw chakao haw. Chatahrasala tahmâ eima chariahpazy ku tawhna heta miah pachha la, nâma eima cha chakao bâ aw,’ tah ei ta.

¹¹ Chatanachata Abeipa ta Zerubâlâ, Bâraka, Zephathâ nata Samuela zy vaw tuah ta, su to tawhta châ chadôpa nama chariahpazy ku tawhta cha pachha ei ta, â bohpa ta nama y.

¹² Châhrasala Amawna bei Nahâsâ cha nâmo a dyuh awpa ta â vy tahpa nama pahno nahta, Abeipa nama Khazohpa cha nama bei a châ thlâh hapa chhao ta, ei hnohta, ‘Châ vei, abei ta eima chô liata ryu a reih awpa a châ,’ nama tah heih.

¹³ Chavâta moh teh u, he he bei châta namâ tlyhpa cha châ ta, nama hiapa bei cha a châ hih. Moh teh u, Abeipa ta nama chô liata ryu a reih awpa bei a cha taopa ha ei hih.

¹⁴ Abeipa cha chipa ta, ano cha chakao u la, a ao nathliepa ta, Abeipa biepiepa a dyuh leipa u la, nâmo nata nama chô liata ryureituhpa bei chhaota Abeipa nama Khazohpa a zipa nama châ khiahta cha, a pha aw.

¹⁵ Abeipa ao nathlie leipa ta, Abeipa biepiepa namâ dyuh khiahta deikua cha, châ pathlatuhpazy â dyuhpa hawhna khata, Abeipa ku ta nâmo nata nama bei cha a châ dyuh aw ei.

¹⁶ Chavâta tahmâ a chalihpa ta a duah u la, Abeipa ta nama mohmô ta hmo rônah ngaitapa a tao awpa he moh teh u.

¹⁷ Tanoh he sâh hria noh châ vei ma? Tôkalôhpa pathuasa awpa nata avâ pasuasa awpa ta, Abeipa ei awsao aw. Chatanachata bei nama hiana kyh liata Abeipa mohmô ta hmo nama paraopa he a rarôh yzie pahno aw ei chi ta, nama hmô aw,” tah ta.

¹⁸ Samuela ta Abeipa cha aw ta, Abeipa ta cha noh liata, tôkalôhpa pathuasapa ta, avâ pasuasa ta. Zawpi zydua ta Abeipa nata Samuela cha chi ngaita ei ta.

¹⁹ Izarei phopi zydua ta Samuela hnohta, “Eima thi lei nawpa ta, châ chakaotuhpazy châta Abeipa na Khazohpa lâ thlah miah chhâpa teh. Bei hiah pi ta, he hmo pha lei ngaitapa eima taopa he, eima moleina zydua baichhatuhpa tlao a vaw châ,” tah ei ta.

²⁰ Samuela ta ama hnohta, “Chi khah u, he hmo pha lei ngaitapa he tao tlai ei chi ta, châhrasala Abeipa nama zipa cha tleisai leipa u la, nama pathipalôh tlokhuh ta Abeipa cha chakao muh vy.

²¹ Khâpa châta hmahta a phahnai lei awpa nata châ pachha thei lei awpazy zipa ta tleisai khuh vy, âmo cha hraoleipazy ama châ.

²² A moh rônah ngaitapa vâta Abeipa ta ano phopi cha a heihsai aw vei. Ano phopi châta a cha taopa liana ei heta Abeipa cha a palysa ngaita.

²³ Cha dei châ vei, nâmo châta thlah ei chhâ leipa vâta Abeipa chô liata ei molei awpa cha, kei ta la tao cheita aw va na. Lâpi phapa nata lâpi dopa tlao ei cha pahmô lymâ aw ei.

²⁴ Chavâta Abeipa cha chi u la, ngâchhih ngaitapa ta, nama pathipalôh tlokhuh ta ano cha chakao u la, nama châta a hmotaopa rônahpazy kha pachâ tyh muh vy.

²⁵ Molei ngaitapa ta hmo nama tao ngâ thlâh ha khiahta deikua cha, nâmo chhao, nama bei chhao, pahleipadiapa nama châ aw,” tah ta.