1 SAMUELA 11 - Mara Bible RV (BSI)

Sawla ta Amawna mo a pahnie

¹ Amawna chyhsa Nahâsâ cha vaw pua ta, Zabekilia khih dôh ta, Zabe mo zydua ta Nahâsâ hnohta, “Eima hnohta bie hraih la, eima cha chakao aw,” tah ei ta.

² Amawna chyhsa Nahâsâ ta ama hnohta, “He hawhta nama paryhsa khiahta cha, nama hnohta bie ei hraih aw: nama zydua mokhaoh chachâh lâ thaoh khai aw na ta, cha cha Izarei zydua chô liata nohzaona ei patlôsapa a châ aw,” tah ta.

³ Zabe machâzy ta a hnohta, “Izarei râh zydua liata lyuhchâpa eima pasiesa thei nawpa ta noh sari miah hâ chy mah y. Miah pachha awpa ahy hmahta ama y vei khiahta cha, nâ liata eimâ châ vaw hlâ aw,” tah ei ta.

⁴ Lyuhchâpazy cha Sawla yna Kibia khih ama tlô nahta, bie ama phaopazy cha zawpi nah theina liata reih ei ta, zawpi zydua cha aoh tlili ta cha ei ta.

⁵ Cha nota, moh tua u, Sawla cha viahchao vaw haoh laihpa ta lyu tawhta vaw tlô ta, ama hnohta, “Khâpa hmo pha leipa ma zawpizy he amâ tyh tly? Khazia ma ama cha ngâ kaw tly?” tah ta. Zabe mo bie reipa cha chho ei ta.

⁶ Cha biezy cha a theipata nahta, Khazohpa thlahpa cha Sawla chô liata thatlô ngaitapa ta vaw tlô ta, a hie thata hâh ta.

⁷ Viahchao bao kha thie ta, a vyuh vyuh ta pachhaih ta, Izarei râh zydua liata rai awpa ta, lyuhchâpazy ku liata pie ta, ama hnohta, “Ahy rai vaw pua leipa ta Sawla nata Samuela a zi khoh leipa maih cha, ano viahchao chhao, he hawhta taopa a châ aw,” tah ta. Abeipa china ta Izarei phopi cha tla thlu ta, reih kha tlapa ta vaw pua ha ei ta.

⁸ Beze liata ama maluh reih ta, Izarei sawzy 300,000 y ei ta, Zudâh chyhsa 30,000 ama y.

⁹ Chatawhcha Zabekilia tawhta lyuhchâpa ama vaw tuapazy hnohna chata, “‘Mylâ noh sa locho daihti liata pachhapa nama châ aw,’ tahpa ta Zabekilia mo cha kei chho muh vy,” tah ei ta. Lyuhchâpazy cha sie ei ta, cha bie cha Zabe mo chho ei ta, a ly ngaita ei ta.

¹⁰ Zabe mo ta Amawna mo hnohta, “Mylâ nâmo lâta vaw pua aw pi ta, eima chô liata nama khohpa hawhta tao muh vy,” tah ei ta.

¹¹ A mylâ ta Sawla ta Izarei phopi cha py thôh ta pachhaih ta, my vaina daihti liata Amawna mo riehmo cha a ngia ei ta. Amawna mo cha nohchhô lochona taihta thie lymâ ei ta, a hroh tlakaihpazy cha a râpai khai ha ei ta, pano ta a y khohpa dâhdei chhao hmôpa y khao veih ei.

Sawla bei ta pa-i chaneina

¹² Chatawhcha Izarei phopi ta Samuela hnohta, “‘Sawla ta eima chô liata ryu a rei bao hra aw ma’ a tahpazy kha, ahyzy ma ama châ? Kha chyhsazy kha a vaw chhi u la eima thie aw,” tah ei ta.

¹³ Châhrasala Sawla ta, “Tanoh hawhpa liana heta la ahy hmahta thie awpa châ vei, tanoh he Abeipa ta Izarei a pachhana noh a châ hih,” tah ta.

¹⁴ Samuela ta ama hnohta, “A vy teh u, Kilkal lâ sie sih la, cha liata khinarâh pa-i suh u,” tah ta.

¹⁵ Izarei phopi zydua cha Kilkal lâ sie ei ta, Kilkal liana chata Sawla cha Abeipa hmiakô liata bei ta tao ei ta. Cha liata Abeipa hmiakô ta aryhna hlâna atheihnazy hlâ ei ta, Sawla nata Izarei chyhsa zydua cha a ly ngaitapa ta y ei ta.