1 SAMUELA 10 - Mara Bible RV (BSI)

Bei châta Sawla sathawthuna

¹ Samuela ta sathaw ôh pachhi ta, Sawla luh liata bao ta, Sawla cha a pahnâ ta, a hnohta, “Abeipa ta a ryuto chô liata ryureituhpa châ awpa ta sathaw a cha thu. Abeipa phopi chô liata ryureih aw chi ta, âmo a chadôpa ama chariahpazy ku tawhta na pachha aw ei. He he Abeipa ta a ryuto chô liata ryureituhpa châta sathaw a cha thu tahpa na châta ngiana a châ aw.

² Tanoh keima tawhta na sie tita, Benzami râh Zezah liata Râkheli thlâ kiah liata chyhsa pano a tyh aw chi ta, âmo ta na hnohta, ‘Alâ na tluapazy kha ama hmô haw. Tahmâ cha na paw ta alâzy pachâ khao leipa ta nâma sai cha pachâ ta, “Ei sawchapawpa kyh cha kheihta ma ei tao aw tly?” a tah ngâ thlâh ha na,’ tahpa ta ama cha chho aw.

³ Cha tawhna chata sie lymâ aw chi ta, Tabaw liata ôkâ thokô tlôna taihta na sie aw. Cha liata chyhsa pathôh, Bethel liata Khazohpa lâ a khypazy ta ama châ tyh aw. Pakha ta mietaw pô thôh phaoh aw ta, pakha ta viahchhâ tlâ thôh phaoh aw ta, pakha ta kresawhti ôh kha a phaoh aw.

⁴ Châ naoh aw ei ta, viahchhâ tlâ no cha pie aw ei ta, cha cha ama ku tawhta na la awpa a châ.

⁵ Cha khai tawhta Philistinâ pheisaih yna Kibia Elôhim tlô aw chi ta. Chatawhcha hetana heta a vaw châ aw. Khihpi na tlôpa nahta, su sâhpa tawhta â zupa hrohsopa py a tyh aw chi ta, totâ, khoh, ramo nata tlaipih tôtuhpazy ta hmia a sah aw ei ta, hrohsopazy ta hrohsona bie ama phuahpa na hmô aw.

⁶ Nâma chô liata chhao Abeipa thlahpa cha thatlô ngaitapa ta vaw tlô aw ta, nâ chhao ama hry liata a hlaopa ta hrohsona bie phuah hra aw chi ta, chyhsa nanopa lâta pananopa na vaw châ ha aw.

⁷ He ngianazy he na chô liata a vaw tlô tita, na ku ta tao awpa a hmôpa maih tao lymâ mah y, Khazohpa na hnohta a y lymâ aw.

⁸ Ei hmia lâta siepa ta Kilkal lâ zu aw chi ta, kei chhao raopa hlânazy nata aryhna hlâna atheihnazy hlâ awpa ta nâma lâ ei zu aw. Nâma lâ a zu aw na ta, na tao awpa ei cha chho hlâlei cha, noh sari na vaw y awpa a châ,” tah ta.

⁹ Sawla cha Samuela tawhta a siepata nahta, Khazohpa ta a pathipalôh panano ha ta, ngiana zydua chhao kha, cha noh lia tlai ta a vaw tlô khai haw.

¹⁰ Tlâh ama tlô nahta, moh teh u, hrohsopazy py ta ano cha a vaw tyh ei ta, Abeipa thlahpa cha a chô liata thatlô ngaitapa ta vaw tlô ta, hrohsopazy hry liata a hlaopa ta hrohsona bie phuah lymâ hra ta.

¹¹ Cha hlâta ano a vaw pahnopazy ta, hrohsopazy hry liata a hlaopa ta, hrohsona bie a phuah lymâ hrapa ama hmô nahta, a hiahri raihriepa ta, “Kisâ sawchapawpa chô liata hmo vaw tlôpa he khâpa ma a châ tly? Sawla chhao cha hrohsopazy hry liata â hlao ha hra khiah?” tah ei ta.

¹² Cha su liata chyhsa pakha ta, “Ama paw ahy ma a châ tly?” tah ta. Chavâta, “Sawla chhao hrohsopazy hry liata â hlao ha hra khiah?” tahpa cha bieso lâta a vaw châ haw.

¹³ Sawla cha hrohsona bie a phuah khai nahta, su sâhpa lâ sie ha ta.

¹⁴ Sawla puhpa ta Sawla nata a chakaotuhpa hnohta, “Khataih lâ nama sie?” tah ta. Sawla ta, “Alâzy tlua pi ta, eima hmô leipa vâta Samuela lâ eima pangai,” tah ta.

¹⁵ Sawla puhpa ta, “Samuela ta na hnohta khâpa bie ma a cha chho? Na chho tua,” tah ta.

¹⁶ Sawla ta a puhpa hnohta, “Alâzy ama hmô haw tahpa a sia kawpa ta miah a chho,” tah ta. Â bei nawpa kyh Samuela ta a reipa deikua cha a puhpa chho vei.

¹⁷ Samuela ta Izarei phopi cha Mizpâ liata Abeipa lâta awpakhy ta.

¹⁸ Izarei sawzy hnohta, “Zehôvah, Izarei Khazohpa ta hetana heta a tah: ‘Izarei cha Izi tawhta a kaw chhi papua na ta, Izi mo ku tawhta cha pachha ei na ta, châ tlybaituhpa abeinarâhzy ku tawhta chhao ei cha pachha ei.’

¹⁹ Châhrasala tanoh he nama chhiena nata nôpona zydua tawhta châ pachhatuhpa, nama Khazohpa cha khoh leipa ei chi ta, a hnohta, ‘Châ vei, eima chô liata bei miah paduapa teh,’ nama tah. Chavâta tahmâ a chi chi nata a pho pho ta Abeipa hmiakô liata a vaw luah teh u,” tah ta.

²⁰ Samuela ta Izarei chi zydua cha vaw paluahsa ta, Benzami chi cha nuby a daopa ta a tlyhpa a châ.

²¹ Benzami chi cha a pho pho ta vaw paluahsa heih ta, Mâteri pho cha nuby a daopa ta a tlyhpa a châ. A chhâna liata Kisâ sawchapawpa Sawla cha nuby a daopa ta a tlyhpa châ ta. Châhrasala ano cha tlua ei ta, hmô leipa ei ta.

²² Abeipa hiahri heih ei ta, “Chyhsa a vy awpa ama y khao ma?” tah ei ta. Abeipa ta, “Moh teh u, hmobaoh hry liata â nyu thlâh haw,” tah ta.

²³ A râhnao ei ta, cha su tawhta a vaw chhi ei ta, zawpi hry liata a vaw duah ta, chyhsazy hry liata a doh seih chai ta, a ngiatlâh â khopa chhao ahy hmah y veih ei.

²⁴ Samuela ta zawpi zydua hnohta, “Abeipa ta â tlyhpa chyhsa he nama hmô ma? Chyhsa zydua hry liata ano hawhpa rai y veih ei,” tah ta. Zawpi zydua ta, “Abei cha hroh pareih mawh sy!” tahpa ta awh ei ta.

²⁵ Samuela ta zawpizy cha khinarâh ryureina siekheizie awpa kyh zy chho ta, chazy cha châbu liata roh ta, Abeipa hmiakô liata soh ta. Chatawhcha Samuela ta zawpizy cha ama o chyu lâta padisa ha ta.

²⁶ Sawla chhao Kibia khih liata ano o lâ a di ha hra ta. A hnohta pasaipha, Khazohpa ta ama pathipalôh a hriapazy sie hra ei ta.

²⁷ Châhrasala chyhsa dyutlaileipa thokhazy ta, “He chyhsa heta kheihta ma miah a pachha thei aw tly?” tah ei ta, ano cha khâpasaw ta reih leipa ei ta, hmosaipa chhao pie khoh veih ei. Châhrasala Sawla cha a thlih thlâh ha ta.