1 PITY 3 - Mara Bible RV (BSI)

Nôvah azaona

¹ Cha hawhna chata nâmo, lapinô saih u, nama vahpazy rei a ngiah teh u. Chatanachata Khazohpa bie a zyh leipa vahpazy ama y khiahta cha, bie ta chho cheingei hlei leipa chhao ta, ama lapinôzy hrozie ta pahniepa ta ama y thei aw.

² Nama zachhihna nata pathaihna hro nama vahpazy ta ama hmô tita, âmo cha nama pahnie thei aw.

³ Namâ tobina cha khôtho lâ atobina, sâ phiehpa, ngôh ta a tobipa, chysia ta a tobipa zy châ leipa sala,

⁴ chhôh lâta atobina, chhithaina a tleih beih leipa, nônaina nata achalihna palôh ta tlao a tobipa châ mawh sy. Cha cha Khazohpa mohmô ta a sôh ngaita.

⁵ Cha hawhna chata hlâno ta chanô pathaihpa, Khazohpa ngiapâtuhpazy chhao khata, ama vahpazy rei a ngiahpa ta, chhôh lâta atobina ta amâ vaw tobi tyh.

⁶ Sârâ chhao khata Abarahâ cha ei zibeipa tahpa ta aw ta, a rei â ngiahpa kha. Hmo pha nama tao khiahta cha, khâpa hmah chi leipa aw ei chi ta, chatanachata Sârâ sawzy nama châ aw.

⁷ Cha hawhna chata, nâmo, vahpa saih u, chanô cha hmobaoh rao nao viapa a châ hleikhô ta, nama lapinôzy cha ngiachhiena hro liata ryu nama to lâhpazy ama châpa vâta, nama thlahchhânazy pakhâpa ta a y lei nawpa ta, nama lapinôzy palyupalih u la, pahnothai kawpa ta pahrâ khoh teh u.

Siana vâta pasataona

⁸ A chhâ chaina ta cha, nama zydua ta palôh miakha phaohpa ta y u la, tha a pasa raihrie teh u. Unawh hawhta kyh a pachâ u la, a ngiachhie raihriepa ta, areisipa ta y teh u.

⁹ Moleina cha moleina ta viarithô leipa u la, reipachhiena chhao reipachhiena ta viarithô hra leipa u la, byhnâ tlao awpa teh u. Cha hawhta taopa ta byhnâ to awpa ta awpa nama châ.

¹⁰ “Kyhpachâna hro tlaichhai ta, Noh pha a hmô khohpa cha, Moleina liata a paleih vaih sala, Dôveina liata a hmao vaih mawh sy.

¹¹ Moleina a heihsai sala, Hmo pha tao mawh sy; Thlalôhna tlua sala, A chadai lymâ mawh sy.

¹² Abeipa mo cha mosiapazy chô liata y ta, Ama thlahchhâna lâ nah a pachôh tyh. Moleipazy deikua cha, Abeipa hmia ta â dyuh tyh ei.”

¹³ Hmo pha taona liata phahnai namâ ngiah khiahta cha, ahy châ parao thei aw ei?

¹⁴ Siana vâta pasa a taopa nama châ khiahta cha, vânoh nama to aw. Ama cha pachhiparyna chi leipa u la, nôpopa ta y hra khuh vy.

¹⁵ Nama palôh liata deikua cha, Krista cha Abeipa ta hnei u la, hnabeiseihna nama hneina chhâpa châ hiahripa maih a chhy awpa ta khatino rai ta a mâ chiehpa ta y teh u. Cha hawhta nama tao tita deikua, nônaina, zana nata

¹⁶ chhie nata pha pahnona pathaihpa hmâpa ta nama tao awpa a châ. Chatanachata Krista liata nama hrozie phapa a reipachhie tyhpazy cha maophyuhpa ta ama y aw.

¹⁷ Moleina hmo taopa vâta pasa taopa hlâta cha, Khazohpa khozie a châ khiahta cha, hmo pha taopa vâta pasa taopa a pha via.

¹⁸ Khazohpa lâ miah â chhi thei nawpa ta, Krista cha moleinazy châta chhâzaw châta ei kha thi ta, mosiapa cha moleipa vyuhpa ta thi ta, sapa liata thiepa ta y ta, thlahpa liata deikua pahropa ta a y.

¹⁹ Cha hawhta a thina liana chata patâhna o liata thlahpa a ypazy hnohta bie chho ta,

²⁰ âmo cha Nôah hro nota balyh tao chhôh zydua Khazohpa ta dao thei ngaitapa ta a hâ chhôh ta reingiahleipa thlahpazy kha ama châ. Balyh liana cha chyhsa chyhta, pacharie deita, ti tawhta ta pachhapa ama châ.

²¹ Cha taozie nata a lyupa bâtina ta nâmo chhao tahmâ pachhapa nama châ. Pôhpa tawhta apuapa pathaipa hawhta châ leipa ta, chhie nata pha pahnona pathaihpa hmâpa ta Khazohpa nama padopa vâta, Zisu Krista thyuheihna zawhzi ta pachhapazy nama châ.

²² Zisu Krista cha vârâh lâ kiah ta, Khazohpa chachâh lâta y ta, vâlyuhchâpazy, biehneinazy nata hmotaotheinazy cha ano rei sai ta y awpa ta taopa ama châ.