1 PITY 2 - Mara Bible RV (BSI)

Alô hrohpa nata phopi pathaihpa

¹ Chavâta ahaona, haidihaiduana, phapakheina, hiatliana nata reipachhiena zydua bâhsai teh u.

² Hawsaih pih thiehpazy hawhta, thlahpa sâhpiti patapa vâ u la, chatanachata nama pachhana liata nama laiseih lymâ aw.

³ Abeipa phana nama padi ha hih.

⁴ Ano cha chyhsazy kho leipa châ ta, Khazohpa mohmô liata deikua cha, atlyhpa nata sôh ngaitapa alô hrohpa a châ. Abeipa nama pangai hapa vâta,

⁵ Zisu Krista zawhzi ta Khazohpa a pyh tlâhpa thlahpa atheihna hlâtuhpa theihthai pathaihpazy châ awpa ta, alô hrohpa hawhta paduapa thlahpa o nama châ.

⁶ Chavâta Biehrai liata, “Moh teh u, Zaio liata alô paryh na ta, Ano cha a ki liata alô sôhpa nata atlyhpa châ ta; Ahy rai ano a ngiapâpa cha, Maophyuh aw vei,” tahpa ta ropa a châ.

⁷ Chavâta Krista cha nâmo, ngiapâtuhpazy châta hmo sôh ngaitapa châ ta, ngiapâleipazy châta deikua cha, “O satuhpazy kho leipa alô cha, A ki liata alô phahnai chaipa a vaw châ haw;

⁸ Achapiana lô vaw châ ta, Moleina lôpanô a vaw châ haw.” Bie ama zyh leipa vâta a chapia ei ta, cha hawhta y awpa ta raopa rai ama châ.

⁹ Nâmo deikua la, zohna tawhta puapa ta khaihna noâhpa liata a ngia awpa ta châ awtuhpa ei phana cha nama phuah thei nawpa ta, phopi atlyhpa, abei chi theihthaipa, phopi pathaihpa, Khazohpa ryuto phopi nama châ.

¹⁰ Hlâno ta cha phopi châ leipa ei chi ta, tahmâ deikua cha Khazohpa phopi nama châ haw. Hlâno ta cha zawngiahna hmô leipa ei chi ta, tahmâ deikua cha zawngiahna nama hmô haw.

Khazohpa seizy hawhta hrozie

¹¹ Kho ngaitapa saih u, khichhaipa nata khitlyhpa nama châpa vâta, thlahpa a dyuhtuhpa sapa aohraohnazy bâhsai awpa ta ei châ haw ei.

¹² Zenitaizy hry liata zachhihpa ta y teh u. Chatanachata moleina hmo a taopazy hawhta ama cha reipachhiepa chhao ta, nama hmo pha taopazy hmô aw ei ta, Khazohpa ta miah a vaw tly noh ta ano cha ama palyupalih thei aw.

Ryureituhpazy rei a ngiah awpa

¹³ Ryureih awpa ta raopazy cha, Abeipa vâta ama rei a ngiah teh u. Biehnei chaipa bei rai châ sala,

¹⁴ moleina hmo a taopazy hrie awpa nata hmo pha a taopazy palyupalih awpa ta bei ta a tuapa râhvaotuhpa rai châ sala, ryureituhpazy rei a ngiah khai awpa a châ.

¹⁵ Cha cha Khazohpa khozie châ ta, ahrupazy ta pahno leina vâta bie ama reipazy cha, nama hmo pha taopa ta nama chalihsa thei aw.

¹⁶ Khotalaipa châ ei chi ta, châhrasala nama khotalaina cha moleina khu nawpa ta nama hmâ awpa châ leipa ta, Khazohpa chakaotuhpazy hawhta tlao nama y awpa a châ.

¹⁷ Chyhsa zydua za u la, unawhzy kyhpachâ u la, Khazohpa chi u la, abei cha za teh u.

Krista pasataona a mopâ awpa

¹⁸ Sei saih u, kyh to liata nama zibeipazy rei a ngiah teh u. Zibeipa phapa nata nônaipazy dei châ leipa ta, zibeipa nôchhiepazy rei chhao namâ ngiah awpa a châ.

¹⁹ Chyhsa ta Khazohpa a pachâpa vâta pasa tao lei awpa taopa ta, pachârôhna a tao hualuapa cha, palyupalihna a to tlâh a châ.

²⁰ Tuna pasataona namâ tyh tita, tiama kawpa ta dao thei hra u la, moleina hmo nama taopa vâta namâ tyhpa a châ khiahta cha, khâpa phahnaina a hnei? Hmo pha taopa vâta pasa tao ei chi ta, tiama kawpa ta nama dao thei khiahta deikua cha, cha cha Khazohpa hmiakô liata palyupalihna a to tlâh a châ.

²¹ Krista kha nâmo châta pasa a taopa vâta, nâmo chhao pasa tao awpa ta awpa châ ei chi ta, a pheihnie nama pazi thei nawpa ta a mopâ awpa a cha sopa ei.

²² Ano cha hmo a parao beih leipa, a pakah liata haidihaiduana a y leipa a châ.

²³ Reipachhiepa ta a y nota, reipachhie hri leipa ta, pasa taopa ta a y nota, pachhipary hra vei. Â dopa ta pachiatuhpa hnohta tlao â hlâ tyh.

²⁴ Moleina thisaipa ta siana lâta eima hroh thei nawpa ta, eima moleinazy cha ano ta a pôhpa tlai ta tho liata phaoh ta, Krista hmahzy ta patlâhpa ta nama y haw.

²⁵ Mietakuzy hawhta lâpi pavia ei chi ta, tahmâ deikua cha nama thlahpa Chhituhpa nata Mietaku Vaituhpa lâ nama kua ha hih.