1 KAWRINI 9 - Mara Bible RV (BSI)

Lyuhchâpa biehneina

¹ Khotalaipa châ va na mâ? Lyuhchâpa châ va na mâ? Eima Beipa Zisu hmô ha va na mâ? Nâmo cha Abeipa liata ei raihria theilâpa châ veih ei chi mâ?

² Mohropazy châta lyuhchâpa châ vei hraw sah la, nâmo châ chhâ ta la ei châ, nâmo tlai he Abeipa liata lyuhchâpa ei châna chahnao pa-ina cha nama châ.

³ Nâ pasiatuhpazy ei chhyna cha he he a châ.

⁴ Nie theina nata do theina biehneina hnei ma pi mâ?

⁵ Lyuhchâ hropazy, Abeipa unawhzy nata Kephâ hawhta, ngiapâtuhpa lapinô ta hneipa ta, ano a chhi theina biehneina hnei ma pi ma?

⁶ Bânabâ nata kei dei he ma, eima khihsatôhtuna châta raihria leipa ta y thei awpa ta biehneina a hnei leipa a châ pi?

⁷ Ahy ma anosasyh a chyhpa ta pheisaih rai a hria beih tly? Ahy ma kre sadô tao ta a thei nie leipa ta a y beih? Ahy ma sahroh zao ta, a sâhpiti do leipa ta y beih?

⁸ Cha biezy cha chyhsapa biehneina ta ei reipa dei ma a châ? Ryhpa bie chhao ta, cha biezy tlai cha reih hra vei mâ?

⁹ Mawsi ryhpa liata, “Viahchao tôhpa sâh a tly nota a hmao nama hi awpa châ vei,” tahpa ropa a châ. Khazohpa ta viahchao tôhpa kyh ma a rei khoh?

¹⁰ Keimo châta a reipa tlao châ vei ma? Keimo châta ropa a châ. Leipalietuhpa ta hnabeiseihna hneipa ta a palie awpa châ ta, sâh tlytuhpa chhao ta, tovyuh hnabeiseihpa ta a tly awpa a châ.

¹¹ Thlahpa lâ chizy nama hry liata eima tu ha khiahta cha, sapa lâ theizy nâmo tawhta hria awpa cha, eimâ phuh leipa a châ hlei rai ma?

¹² Mohropazy hmahta chyh awpa ama châ hnaw khiahta cha, keimo chhochhi cha châ hnaw via pachai awpa châ ma pi ma? Châhrasala keimo la, cha tovyuh cha a hnaw ma pi. Krista thâtihpha eima pakhâpadie lei nawpa ta, riethei to tlao eima tao lylia.

¹³ Achhyna o rai hriatuhpazy cha, Achhyna o tawhta niepa hmô ei ta, maisâh liata chakaotuhpazy chhao, atheihna hlâpazy liata tovyuh ama hnei hra tahpa pahno veih ei chi mâ?

¹⁴ Cha hawhna chata, thâtihpha chhotuhpazy châta, thâtihpha cha ama nie hmôna châ awpa ta Abeipa ta bie a pie.

¹⁵ Châhrasala kei la cha tovyuhzy cha miakha hmahta hmâh va na. Ei chô liata nama tao hra nawpa ta, he biezy he a rohpa châ hra va na. Chyhsa ta ei palaikheina eina lapa awpa hlâta cha, tlao thi sah la ei châta a pha via.

¹⁶ Thâtihpha ei chhopa chhao heta, a palai nawpa hnei va na. Tao lei thei lei awpa ta ei chô liata a pahnieh tlôh ta. Thâtihpha ei chho vei khiahta la, ei hu a po aw!

¹⁷ Keima khotlyna ta thâtihpha a chhopa ei châ khiahta cha, lymâ ei hnei. Keima khotlyna a châ vei khiah deikua cha, ei hnohta pavaosapa mohôhna rai ei hriapa tlâ a châ.

¹⁸ Cha khiahta la, ei lymâ cha khâpa a châ aw? Thâtihpha ei chhopa vâta tovyuh ei hnaw theipazy a hnaw leipa ta, hlao leipa ta thâtihpha ei chho theipa he ei lymâ cha a châ.

¹⁹ Ahy sei hmah châ vei hraw sah la, chyhsa hluhpi ei pahnie thei nawpa ta, keimasasyh ta chyhsa zydua sei ta ei tao.

²⁰ Zuzy pahnie thei nawpa ta, Zuzy hnohta Zu hawhta ei y tyh. Kei cha ryhpa ry liata y vei hraw sah la, ryhpa ry liata a ypazy ei pahnie thei nawpa ta, ryhpa ry liata a ypazy hnohta ryhpa ry liata ta ei y tyh.

²¹ Khazohpa ryhpazy zyh leipa ta y tlôh leipa ta, Krista ryhpa ry liata a ypa châ hraw sah la, ryhpa hnei leipazy ei pahnie thei nawpa ta, ryhpa hnei leipazy hnohta ryhpa hnei leipa hawhta ei y tyh.

²² Chiehleipazy ei pahnie thei nawpa ta, chiehleipazy hnohta chiehleipa hawhta ei y tyh. Kheihawhta chhâ ma chyhsa thokha ei pachha thei nawpa ta, chyhsa zydua hnohta ato châpa ta ei y tyh.

²³ Thâtihpha byhnâ ei topa ama to thei nawpa ta, cha hmozy cha ei tao.

²⁴ Arâpasuana liata ama zydua ta a râ ei ta, châhrasala pakha ngâlâh ta lymâ a hmô tyh tahpa pahno veih ei chi mâ? Lymâ hmô awpa ta a râ teh u.

²⁵ Ataopasuana liata a hlaopazy cha, kyh toti liata amâ sohsi tyh. Âmo cha lakho rao theipa hmô awpa ta tei ei ta, keimo deikua cha, lakho rao thei leipa hmô awpa ta eima tei.

²⁶ Anuapa hnei leipa ta a râ chakhyh leipa na ta, chyhsa ta ziza â chôpa hawhta a chôpa châ va na.

²⁷ Mohropazy thâtihpha ei chho khai tawhta, keima chaipa he lymâ hmô tlâh leipa ei châ pathlei lei nawpa ta, ei pôhpa he a vaopahnie na ta, ei biehneina ry liata ei soh tyh.