1 KAWRINI 8 - Mara Bible RV (BSI)

Atheihna sa niena kyh

¹ Nothlahpazy lâta hlâpa niepa kyh liata, eima zydua ta pahnona eima hnei chyu tahpa eima pahno. Pahnona ta chyhsa liata apalaina tao ta, kyhpachâna deikua ta chyhsa a tao pathi tyh.

² Chyhsa ta a pahno kawpa hawhta â pachâ khiahta cha, a pahno awpa hawhpa pahno mâh vei.

³ Khazohpa kyh a pachâpa deikua cha, Khazohpa ta ano cha a pahno.

⁴ Chavâta nothlahpa lâta hmohlâpa niepa kyh liata, khizaw liata nothlahpa cha khâpa hmah a châ leizie nata Khazohpa pakha dei leipa ta cha, Khazoh hropa rai a y leizie eima pahno.

⁵ Avâ liata tlyma, alei liata tlyma, khazoh moh phaohpazy y hra ei sala, cha hawhpa khazoh hluhpi nata bei hluhpi cha y tlai ei ta,

⁶ keimo châta deikua cha, Paw Khazohpa pakha deita a y. Ano tawhta ato pua ta, keimo chhao ano châta a ypa eima châ. Abeipa pakha deita hnei pi ta, ano cha Zisu Krista a châ. Ano vâta ato y ta, keimo chhao ano vâta a ypa eima châ hra.

⁷ Cha pahnona cha chyhsa zydua ta hnei veih ei. Chyhsa thokha cha nothlahpa a chhy tyhpa ama châpa vâta, nothlahpa lâ hlâ hapa hawh tlai ta pachâpa ta nie ei ta, ama chhie nata pha pahnona a thatlô leipa vâta, pathaih leipa hawhta pachâpa ama a châ.

⁸ Niepa ta Khazohpa miah pahniasa vei. Eima nie leipa vâta chhie via leipa pi ta, eima niepa vâta pha via hlei ma pi.

⁹ Châhrasala a sohsi teh u, chataleipatala nama khotalaina cha chyhsa chiehleipazy châta achapiana a châ pathlei aw.

¹⁰ Nâ, pahnona a hneipa chi ta, nothlahpa achhyna o liata na niepa cha, chhie nata pha pahnona chiehleipa a hneipa chyhsa ta a cha hmô khiahta cha, ano chhao nothlahpa lâta atheihna hlâpa hmozy cha nie ngâhna na pahneisapa châ aw vei ma?

¹¹ Chatanachata na unawhpa chiehleipa, ano vyuhpa ta Krista a thipa chyhsa cha, na pahnona ta a pahleipadia aw.

¹² Cha hawhta unawhzy chô liata molei ei chi ta, ama chhie nata pha pahnona chiehlei nota hmah nama paphao lao heihpa cha, Krista chô liata hmo a paraopa nama châ.

¹³ Chavâta niepa vâta ei unawhpa ei pahluasa khiahta cha, ei unawhpa ei pahluasa pathlei lei nawpa ta, atheihna sa cha nie khao aw va na.