1 KAWRINI 7 - Mara Bible RV (BSI)

Nôvah ahneina kyh

¹ “Chapaw châta lapinô hnei leipa a pha via,” tahpa ta châ vaw roh ei chi ta.

² Châhrasala apatlana moleina khôkhâh nawpa ta, chapaw ta lapinô hnei chyu ei sala, chanô chhao ta vahpa hnei chyu mawh ei sy.

³ Vahpa ta vahpa tao awpa cha a lapinô liata tao sala, cha hawhna chata lapinô chhao ta, lapinô tao awpa cha a vahpa liata tao hra mawh sy.

⁴ Lapinô ta ano pôhpa chô liata bie hnei leipa ta, a vahpa ta bie tlao a hnei. Cha hawhna chata vahpa chhao ta ano pôhpa chô liata bie hnei leipa ta, a lapinô ta bie tlao a hnei.

⁵ Thlahchhâ awpa ta namâ pie thei nawpa ta bohpi leipa châta â ryh nama tah raihriepa dei leipa ta cha, nôvah châna kyh liata a paky khuh vy. Thlahchhâ awpa ta bohpi leipa chhôh namâ paky hapa chhao ta, thlah nama chhâ khai tawhta cha, nama yzie tyhpa hawhta y heih tyh muh vy. Chataleipatala namâ sohsi thei leipa vâta Sâtâ ta a cha reipasao pathlei aw ei.

⁶ Châhrasala lapinô nata vahpa hnei awpa kyh cha, biepiepa hawhta reih leipa na ta, pasaipa a châna kyh ei reipa a châ.

⁷ Chyhsa zydua ta keima hawhta y khai ei sala tahpa ei khoh. Châhrasala chyhsa to Khazohpa tawhta hmopiepa hnei chyu ei ta, pakha ta hmopiepa miakha hnei ta, mohropa ta hmopiepa hropa a hnei.

⁸ Dyhchâ leipazy nata nôhmeizy hnohta hetana heta ei tah. Keima hawhta dyhchâ leipa ta y ei sala ama châta a pha.

⁹ Amâ kuah thei leipa khiah deikua cha, lapinô nata vahpa ama hnei awpa a pha. Chanô chapaw châna pachâna sai ta bie thlâh hapa hlâta cha, lapinô nata vahpa hnei lâlaopa a pha via.

¹⁰ Nôvah hnohta he bie he ei pie. Kei ta ei piepa châ vei, Abeipa piepa a châ. Lapinô cha a vahpa tawhta â râ awpa châ vei.

¹¹ Â râ khiahta cha, vahpa a hnei awpa châ khao vei. Cha ta a châ vei khiahta cha, a vahpa â ryh heih awpa a châ. Vahpa chhao ta a lapinô a ma awpa châ vei.

¹² Mohropazy hnohta deikua cha, hetana heta ei tah. Abeipa ta a reipa châ leipa ta, keima ta ei reih. Unawh ahy rai ta ngiapâleipa chyhsa lapinô ta hnei sala, a lapinô ta a hnohta pahrâ awpa a khoh thlâh ha khiahta cha, a ma awpa châ vei.

¹³ Chanô ahy rai ta ngiapâleipa chyhsa vahpa ta hnei sala, a vahpa ta a hnohta pahrâ awpa a khoh thlâh ha khiahta cha, â chhaih awpa châ vei.

¹⁴ Vahpa ngiapâleipa cha, a lapinô zawhzi ta pathaisapa ta y ta, lapinô ngiapâleipa chhao, a vahpa zawhzi ta pathaisapa ta a y. Chata châ vei sala, nama sawzy cha pathaih leipa ama châ aw. Tahmâ deikua cha ama pathaih.

¹⁵ Ngiapâleipa ta â kaolâhpa â chhaih khoh khiahta deikua cha, a chhaih thlâh ha mawh sy. Cha hawhpa liata la, ngiapâtuhpa vahpa nata lapinô cha chahrypa châ khao veih ei. Khazohpa ta adyryhpa ta y awpa ta miah a aw.

¹⁶ Hy lapinô y, na vahpa na pachha thei awpa nata pachha thei lei awpa kyh kheihta na pahno? Hy vahpa y, na lapinô na pachha thei awpa nata pachha thei lei awpa kyh kheihta na pahno?

Awna hawhta y awpa

¹⁷ Abeipa ta a raozie hawhta nata Khazohpa ta a awzie hawhta, chyhsa to y mawh ei sy. Cha cha Awnanopa zydua châta ei raopa a châ.

¹⁸ Chopawtai chiehpa ta awpa ama y ma? Chopawtaipa ngiana thy khah sy. Chopawtaileipa a châ nota awpa ama y ma? Chopawtai a chhuah hlei khah sy.

¹⁹ Chopawtaipa cha khâpa hmah châ leipa ta, chopawtaileipa chhao khâpa hmah châ hra vei. A peimawhpa cha Khazohpa biepiepazy zyhpa he a châ.

²⁰ Chyhsa to ta awpa ama châ nota ama duahmo liata y thlâh mawh ei sy.

²¹ Sei na châ nota awpa na châ ma? Cha cha pei tah khah y. Khotalaina rypaohpa na hmô khiahta deikua cha, hmâh phahnai mah y.

²² Sei a châ nota Abeipa ta a awpa cha, Abeipa liata la khotalaipa a châ. Cha hawhna chata khotalaipa a châ nota awpa chhao, Krista sei a châ.

²³ Mâ ta chaleipa nama châ. Chyhsa sei ta a ngia khuh vy.

²⁴ Chavâta unawh saih u, kheihawhpa duahmo tawhta awpa nama châpa chhao ta, Khazohpa liata y thlâh ha teh u.

Dyhchâ leipa nata nôhmeizy

²⁵ Dyhchâ leipa laihsa kôpazy kyh liata, Abeipa tawhta biepiepa hnei leipa na ta, châhrasala Abeipa ngiachhiena zawhzi ta chyhsa ngâchhihpa ei châna lâ tawhta ei pachâzie ei reih.

²⁶ Tahmâhlâ riethei rairuna vâta, chyhsa to ama y ualua ta ypa pha ei tah.

²⁷ Lapinô hneipa na châ ma? Puasai a chhuah khah y. Lapinô hnei leipa na châ ma? Lapinô tlua khoh khah y.

²⁸ Lapinô na hneipa chhao ta, hmo parao va chi. Laihsa kôpa ta vahpa a hneipa chhao ta, hmo parao hra vei. Châhrasala nôvahzy cha khizaw rairunazy amâ tyh awpa vâta, cha rairunazy cha nama khôkhâh awpa ei khoh.

²⁹ Unawh saih u, ei rei khohpa cha he he a châ: Daihti chyuta y ta, chavâta tahmâ tawhta la, lapinô a hneipazy ta a hnei leipa hawhta y mawh ei sy.

³⁰ Mâchhie sapazy ta mâchhie sa leipa hawhta y ei sala, a lypazy ta a ly leipa hawhta y ei sala, hmo a chaleipazy ta a hnei leipa hawhta y mawh ei sy.

³¹ Khizaw hmo liata â hmâhpazy chhao, â hmâh leipa hawhta y mawh ei sy. Khizaw yzie he a leidia hai.

³² Pachâchhiena hnei leipa ta nama y awpa ei cha khokhei ei. Lapinô a hnei leipa cha, Abeipa palysa a chhuahpa ta, Abeipa lâ hmo a pachâ tyh.

³³ Lapinô a hneipa deikua cha, lapinô palysa a chhuahpa ta, khizaw hmo pachâ tyh ta,

³⁴ a tao khohpazy â chakhia ha tyh. Vahpa a hnei leipa cha a pôhpa nata a thlahpa liata pathaihpa ta a y thei nawpa ta, Abeipa lâ hmo a pachâ tyh. Vahpa a hneipa deikua cha, a vahpa palysa a chhuahpa ta, khizaw hmo a pachâ tyh.

³⁵ Cha hmo cha nama phana awpa ta ei reipa a châ. Pakhâ ei châ chhuahpa ei châ leipa ta, â dopa ta y u la, Abeipa chakao awpa ta palôh tlokhuh ta namâ pie thei nawpa ta ei reih.

³⁶ Ahy rai lapinô châta â pahawhpa laihsa kôpa chô liata a hmotaopa â do leipa hawhta a pahno sala, a sapa khona â kuah thei leipa khiahta cha, a lapinô â pahawhpa cha, a khozie hawhta hnei patoh mawh sy. Moleina châ vei. Amâ hneipa a pha.

³⁷ Châhrasala ahy rai lapinô hnei patoh awpa a byuhna y hlei leipa sala, a sapa khona a kuah thei sala, a pahawh chy awpa ta a palôh ta khâchâ â chhuah ha khiahta cha, cha hawhta tao mawh sy.

³⁸ Chatanachata lapinô a pahawhpa a hneipa cha, tao pha ta, a pahawhpa a hnei mâh leipa cha a tao pha via heih.

³⁹ Lapinô cha a vahpa hro chhôh zydua cha chahrypa a châ. A vahpa a thi ha khiahta deikua cha, a khopa maih a hnei thei. Anodeikua cha Abeipa liata a ypa chyhsa a châ awpa a châ.

⁴⁰ Châhrasala keima pachâna liata cha, a y tyhpa hawhta y sala, a ly via aw khiah ma ei tah. Kei chhao Khazohpa Thlahpa ei hnei tahpa ei pahno.