1 KAWRINI 6 - Mara Bible RV (BSI)

Ngiapâtuhpazy hry liata aleihna

¹ Nama hry liata ahy tlyma, â ngiapâlâhpa chô liata biepeipa hnei sala, mopathaihpazy hmiakô liata tlôkhei leipa ta, kheihtazie ta ngiapâleipazy ryureina liata a tlôkhei ngâh?

² Mopathaihpazy ta khizaw ama pachia aw tahpa pahno veih ei chi mâ? Khizaw hmah nama pachia awpa khiahta cha, hmo chynawhpazy nama pachia thei lei nawpa khâpa a y?

³ Vâlyuhchâpazy hmah eima pachia aw tahpa pahno veih ei chi mâ? He hro chhôh khihsatôhtuna kyh cha khazia eima pachia thei vei aw?

⁴ Chavâta hro chhôh khihsatôhtuna kyh liata biepeipa nama hnei tita, khazia Awnanopa chyhsa a châ leipazy nama pachiasa tyh?

⁵ He bie he nama noza nawpa ta ei reipa a châ. Unawhzy likah liata biepeipa a pathlâ thei awpa pakha hmah nama hry liata ama y leipa a châ ngyu aw!

⁶ Unawhpa ta a unawhpa ryureina liata tlôkhei ta, cha chhao cha ngiapâleipazy hmiakô liata châ heih ta.

⁷ Unawh nata unawh likah liata biepeipa nama hnei tyhpa heta, pahnie chhieliepa nama châpa a palâsa. Khazia â do leipa ta ama cha teipa chhao ta, maoh nama oh thlâh vei? Khazia ama cha dôveipa chhao ta, namâ padôveisa thlâh ha vei?

⁸ Nâmo chhao â do leipa ta chyhsa tei ei chi ta, nama dôvei tyh. Nama unawhzy taihta tei ei chi ta, nama dôvei tyh.

⁹ Moleipazy cha Khazohpa khinarâh to aw veih ei tahpa pahno veih ei chi mâ? Dôpa ta y khuh vy. Apatlapazy, nothlahpa achhypazy, apheipazy, chapaw âzuahpazy, chapaw nata chapaw apatlapazy,

¹⁰ aparupazy, khohleikhopazy, sahma paripazy, chyhsa a reipachhie thaipazy nata avyuhna a taopazy cha Khazohpa khinarâh to aw veih ei.

¹¹ Nama hry liata thokha chhao, cha hawhpa chyhsa nama châ tyhpa kha. Châhrasala pasipa nata pathaisapa châ ha ei chi ta, Abeipa Zisu Krista moh ta nata eima Khazohpa Thlahpa ta thai pachâsapa nama châ haw.

Apatlana a râsai awpa

¹² “Ato taopa ei châta a pathaih,” châhrasala hmo to tao khaipa pha hlei vei. “Ato taopa ei châta a pathaih,” châhrasala khâpa sei ta hmah y aw va na.

¹³ “Niepa cha py châta châ ta, py cha niepa châta a châ,” châhrasala Khazohpa ta a pahleipadia raihrie aw. Pôhpa he apatlana moleina châta châ leipa ta, Abeipa châta tlao a châ, Abeipa chhao pôhpa châta a châ.

¹⁴ Khazohpa ta Abeipa cha pathyu ta, keimo chhao a hmotaotheina ta miah a pathyu hra aw.

¹⁵ Nama pôhpa cha Krista pachiahpazy a châ tahpa pahno veih ei chi mâ? Cha khiahta la, Krista pachiahpazy cha lapa ta, âzuahnô pachiahpazy ta ei tao aw ma? Tao beih aw va na!

¹⁶ “Ama pano ta pôhpa miakha ama vaw châ ha aw,” tahpa ta ropa hawhta, âzuahnô a pazaopa cha ano nata pôhpa miakha ama châ haw tahpa pahno veih ei chi mâ?

¹⁷ Abeipa a pazaopa deikua cha, ano nata Thlahpa miakha ama châ.

¹⁸ Apatlana moleina a râsai teh u. Chyhsa ta moleina hropa a taopazy cha pôhpa khôtho lâ a châ, apatlana moleina a taopa deikua cha, ano pôhpa chô lia tlai ta moleina hmo a taopa a châ.

¹⁹ Nama pôhpa cha Khazohpa tawhta nama daopa, nama chhôh liata a ypa Thlahpa Pathaihpa Achhyna o a châ tahpa pahno veih ei chi mâ? Nâmo eih châ khao veih ei chi,

²⁰ mâ ta chaleipa nama châ haw. Chavâta Khazohpa cha nama pôhpa liata palyupalih teh u.