1 KAWRINI 5 - Mara Bible RV (BSI)

Apatlana ta Awnanopa a papuapalei

¹ Nama hry liata apatlana a ypa kyh thata a pathâh. Chyhsa pakha ta a paw lapinô ykhei ta, cha hawhpa hmo cha ngiapâleipazy hry lia hmahta a y beih leipa a châ.

² Nâmo deikua cha a patahtheisana ta nama hmâh cha! Mâchhiesapa ta tlao y u la, cha hawhpa hmo a taopa cha nama hry tawhta nama papua ha awpa châ vei ma?

³ Pôhpa ta ei y leipa chhao ta, thlahpa ta nama hnohta ei y. Nama hry liata a hlaopa hawhta a pachâpa ta, cha hawhpa hmo a taopa pachiana bie cha ei phuah haw.

⁴ Eima Beipa Zisu moh ta namâ pakhy tita, eima Beipa Zisu hmotaotheina ta, ei thlahpa chhao nama hnohta â hlao tyh hra.

⁵ Cha chyhsa cha, Abeipa Noh liata a thlahpa pachhapa a châ nawpa ta, a sapa cha pahleipadia awpa ta Sâtâ hnohta pie muh vy.

⁶ Namâ palaina he pha vei. Thinô chyhta ta viahdie zydua a rô khai thei tahpa pahno veih ei chi ma?

⁷ Thinô pahlao leipa nama châpa hawhta, viahdie thiehpa nama châ thei nawpa ta, thinô parohpa cha pathai ha muh vy, Krista, Zawpakhô mietakutaw cha, keimo atheihna châta hlâpa châ tlôh ta.

⁸ Chavâta Zawpakhô kyhchhi ei suh u. Thinô parohpa, nôchhiena nata moleina thinô ta châ leipa ta, thinô pahlao leipa viahchhâ, palôh dopa nata biehmeiseihpa ta kyhchhi ei suh u.

⁹ Ei châpaphaopa liana khata apatlana moleina a taopazy a pahlao lei awpa ta ei roh haw.

¹⁰ Khizaw chyhsa apatlana moleina a taopazy, khohleikhopa nata aparupazy nata nothlahpa a chhypazy a pahlao chachei lei awpa ei tahpa deikua châ vei. Cha hawhpa châ sala, khizaw nama puasai awpa byuh tlôh aw ta.

¹¹ Tahmâ deikua cha, ahy rai ngiapâna liata unawh moh phaoh tlôh ta, apatlana, khohleikhona, nothlahpa achhyna, chyhsa reipachhiena, sahma parina nata paruna moleinazy a tao thlâh ha khiahta cha, a pahlao lei awpa ta, nâmo lâta châ ei vaw roh. Cha hawhpa chyhsa cha pati chhao nielâh awpa châ vei.

¹² Awnanopa khôtho lâta chyhsazy cha ei pachia awpa chi a châ rai ma? Awnanopa chhôh liata chyhsazy cha nâmo pachia awpa châ vei ma?

¹³ Khôtho lâta chyhsazy cha Khazohpa ta a pachia aw. Chyhsa moleipa cha nama hry tawhta papua ha muh vy.