1 KAWRINI 4 - Mara Bible RV (BSI)

Lyuhchâpazy chakaona

¹ Keimo he Krista chakaotuhpa nata Khazohpa bienyupa mokhâhtuhpa ta chyhsa ta miah pachâ mawh ei sy.

² Cha dei châ vei, mokhâhtuhpa cha chyhsa ngâchhihpa a châ awpa a byuh.

³ Keima kyh liata deikua la, nâmo ta ei thâtih nama pachia awpa tlyma, chyhsapa ryureina ta a pachia awpa tlyma, hmoh chyhpata ta ei rao. Â dopa ta la, keimasasyh chhao ta a pachia beih va na.

⁴ Keimasasyh a maochhie nawpa khâpa hmah pahno va na. Châhrasala cha chata thai na pachâsa hlei vei. Nâ pachiatuhpa cha Abeipa a châ.

⁵ Chavâta a daihti a tlô hlâ nata Abeipa â vy hlâta cha, pachiana biepathlupa khâpa hmah tao khuh vy. Ano ta zohna liata hmo nyupazy cha khaihna lâ vaw puakhei aw ta, palôh achhuahnazy a palâsa aw. Cha tita chyhsa to Khazohpa reithaina ama hlao chyu aw.

⁶ Unawh saih u, nama pha nawpa ta, cha hmozy cha kei nata Apawlôsâ liata ei vaw hmâ hapa a châ. Chatanachata Biehrai bie khô lei awpa ta, keimo tawhta a chu thei aw ei chi ta, pakha a dyuh nawpa ta mohropa a palaikhei khao aw veih ei chi.

⁷ Ahy ma mohropazy nata ananopa ta châ tao? Na dao leipa hmo khâpa na hnei? Na daopa a châ tlôh khiahta cha, khazia daopa a châ leipa hmo hawhta nâ palaikhei?

⁸ Namâ ngiahpazy nama hnei khai haw! Nama vaw hneirôh haw! Keimo a hlao leipa ta beizy nama vaw châ haw! Beizy châ hmeiseih u la, keimo chhao nama hnohta a bei hra sih la ei tah kaw dia!

⁹ Khizaw nata vâlyuhchâpazy nata chyhsazy mo phapa châ awpa ta, keimo, lyuhchâpazy pi he, thie awpa ta pathlupa chyhsazy hawhta, Khazohpa ta a hnôh chai ta miah a chaluahpa châ khiah ma ei tah tyh.

¹⁰ Keimo la Krista châta ahrupa châ pi ta, nâmo deikua Krista liata asopa nama châ. Keimo la chiehleipa châ pi ta, nâmo deikua thatlôpa nama châ. Nâmo cha chyhsa palyupalihpa ta y ei chi ta, keimo deikua chyhsa mohnaopa ta eima y.

¹¹ Tahmâ taih chhao heta nodipa ta eima dâhphi ta, chysia miah vao leipa ta, taochhiepa ta y pi ta, o chhao hnei ma pi.

¹² Keimo ku ta hria pi ta, eima hriapasa ngaita. Pasipasawhpa ta eima y nahta, byhnâ awpa pi ta; taolapa ta eima y nahta, eima tao hualua tyh.

¹³ Reipachhiepa ta eima y nahta, bie pha eima hlâ tyh. Tanoh taih heta hnaihny hawhta pachâpa châ pi ta, khizaw puapa zydua atohna hawhta pachâpa eima châ.

¹⁴ Nama noza nawpa ta he biezy he ei ropa châ vei, ei saw kho ngaitapazy hawhta cha chhorei nawpa ei ta ei ropa a châ.

¹⁵ Krista liata chhituhpa thy kha hnei hra u la, Paw deikua a hluhpi hnei veih ei chi. Kei he thâtihpha vâta Krista Zisu liata nama paw ei châ.

¹⁶ Chavâta ei hâ nâ latuhpazy châ awpa ta ei châ haw ei.

¹⁷ Cha vâna chata Abeipa liata ei saw kho ngaitapa nata ngâchhihpa Timothy nâmo lâ ei vaw tuah. Ano ta Krista liata ei yzie nata su to nata Awnanopa to liata ei pachu tyhzie zy a cha chho aw ei.

¹⁸ Nâmo lâ a vy khao lei awpa hawhta na pachâpa ta, thokha cha namâ palai kaw ei aw.

¹⁹ Abeipa ta â ryh a tah khiahta cha, nâmo lâ a vy patoh aw na ta, a palai kawpazy chata khâpa biezy ma ama rei tahpa dei châ leipa ta, khâpa hmotaotheina ma ama hnei tahpa pahno ei chhuah aw.

²⁰ Khazohpa khinarâh cha biereipa liata y vei, hmotaotheina liata tlao a y.

²¹ Khâpa nama khoh via? Sôsi chhaota nâmo lâ a vy awpa ma, kyhpachâna nata zawngiahna palôh chhaota a vy awpa maw?