1 KAWRINI 3 - Mara Bible RV (BSI)

Awnanopa achhaihna

¹ Unawh saih u, thlahpa chyhsazy hnohta bie reipa hawhta nama hnohta bie reih thei leipa na ta, sapa chyhsazy nata Krista liata hawsaihzy hnohta reipa hawhta tlao ei reih tyh.

² Pati hmeiseihpa a nie thei awpa nama châ mâh leipa vâta, pati hmeiseihpa châ leipa ta, sâhpiti ta ei cha pasa ei. Tahmâ chhao he a nie thei awpa châ mâh veih ei chi,

³ sapa chyhsa nama châ chypa vâta. Nama hry liata hiatliana nata aeichhiana zy a y thlâh ha chy khiahta cha, sapa chyhsa châ chy ei chi ta, sapa hro ta a hrohpa châ thlâh ha chy veih ei chi ma?

⁴ Pakha ta, “Kei Pawla py ei châ,” tah ta, mohropa ta, “Kei Apawlôsâ py ei châ,” nama tah chhôh ta cha, sapa chyhsa châ thlâh ha chy veih ei chi mâ?

⁵ Apawlôsâ cha khâpa ma a châ? Pawla chhao cha khâpa ma a châ? Chakaotuhpa, nâmo châ pangiapâsatuhpa deita ama châ. Cha chhao cha Abeipa ta a piepa lymâ hawhta ama hria chyupa a châ.

⁶ Kei ta loh na ta, Apawlôsâ ta ti bao ta, Khazohpa ta a palaiseihsa.

⁷ A palaiseihsatuhpa Khazohpa dei leipa ta cha, a lohtuhpa nata ti a baotuhpazy khâpa hmah châ veih ei.

⁸ A lohtuhpa nata ti a baotuhpa cha miakha ama châ. Ama hriapasazie hawhta lymâ ama hmô chyu aw.

⁹ Keimo he Khazohpa hrialâhpazy châ pi ta, nâmo Khazohpa lyu châ ei chi ta, Khazohpa o sapa nama châ.

¹⁰ Khazohpa ta ngiachhiena eina piepa lymâ hawhta, o satuhpa zôthaipa taozie hawhta, kei ta lôbô bô na ta, mohropa ta a chô liata o ama sa. Chyhsa to ta lôbô chô liata o ama sa awpa kyh liata a sohsi chyu mawh ei sy.

¹¹ Lôbô bô ha chiehpa dei leipa ta cha, lôbô hropa ahy hmahta bô thei khao veih ei. Cha lôbô cha Zisu Krista a châ.

¹² Châhrasala lôbô chô liana chata ahy rai ta ngôh ta tlyma, tâkâ ta tlyma, lôsôhpa ta tlyma, tho ta tlyma, sibiepa ta tlyma, sawphao ta tlyma, o a sa khiahta cha,

¹³ mei ta pasia aw ta, Noh ta a palâhâh awpa vâta, o sapazy cha ama châna dopa â vaw lâ chyu aw. Kheihta ma ama hria tahpa mei ta a pasia aw.

¹⁴ Ahy rai lôbô chô liata o a sapa â duah thlâh ha khiahta cha, cha chyhsa cha lymâ a hmô aw.

¹⁵ Ahy rai a raihriapa a kâ khai khiahta cha, cha chyhsa cha ky aw ta, ano pôhpa deikua cha mei liata a siepahliepa hawhta pachhapa a châ aw.

¹⁶ Khazohpa Achhyna o châ ei chi ta, Khazohpa Thlahpa nâmo liata a pahrâ tahpa pahno veih ei chi mâ?

¹⁷ Ahy rai Khazohpa Achhyna o a parao khiahta cha, cha chyhsa cha Khazohpa ta a parao aw. Khazohpa Achhyna o cha pathaih tlôh ta, cha Achhyna o cha nâmo nama châ.

¹⁸ Ahy hmahta anosasyh ta a dôvei khah sy. Nama hry liata ahy rai, he chhâ liata a so kawpa hawhta â pachâ khiahta cha, a vaw so thei nawpa ta ahrupa lâta a lie mawh sy.

¹⁹ He khizaw sona he, Khazohpa pachâ ta hruna châ tlôh ta. “Khazohpa ta chyhsa sopazy cha, âmo so piehpiena ta a paao tyh,” tahpa ta ropa a châ.

²⁰ “Abeipa ta asopazy pachâna pahno ta, hraoleipa a châ tahpa a pahno,” tahpa a châ hra.

²¹ Chavâta ahy hmahta chyhsazy a palaikhei khah sy. Hmo to zydua nâmo eih a châ.

²² Pawla ma, Apawlôsâ ma, Kephâ ma, khizaw ma, hrona ma, thina ma, tahmâ daihti ma, hmialâ daihti ma, a zydua ta nâmo eih sai a châ.

²³ Krista eih châ ei chi ta, Krista cha Khazohpa eih a châ.