1 KAWRINI 16 - Mara Bible RV (BSI)

Mopathaihpazy châta thyuna

¹ Mopathaihpazy châta thyuna kyh kha he hawhta a châ. Kalatia râh Awnanopazy hnohta bie ei piepa hawhta, nâmo chhao vaw tao hra teh u.

² Ei vy tita thyuna khei chhyhpa a châ lei nawpa ta, hâta noh hmiatuapa lia maihta, chyhsa to byhnâ nama topa lymâ hawhta thyuna sohpakhypa ta nama pachô lymâ aw.

³ Chatanachata ei vaw tlô tita, nama hmopiepazy cha Zerusale lâ phaoh awpa ta, chyhsa nama ngâpazy cha châ chhaota ei pasiesa aw ei.

⁴ Ei sie hra awpa a pha khiahta cha, sie aw na ta, eina zi aw ei.

Pawla khitly achhuahna

⁵ Mâsidônia râh chahryh a chhuah na ta, Mâsidônia râh ei chahryh khai tawhta, nâmo ei cha vaw tly aw ei.

⁶ Ei khitlyna nata ei siena lâ maihta eina deichhy awpa ei chi ta, nama hnohta bohpi ei châh thlâh thei. Chasipaw chhôh zydua a châ thei ngyu aw.

⁷ Tahmâ ei sie pâ ta châ hmô awpa ei cha pha tah va na. Abeipa ta a pasaih khiahta cha, nama hnohta khachâ rakha ma y awpa ei chhuah.

⁸ Châhrasala Pentikaws noh taih cha Ephesi khih liata ei vaw y chy aw.

⁹ Chakaona hlaotloh nawpa ta ei châta ochhi kawh ngaitapa â pahy. Dyuhtuhpazy chhao ama hluh ngaita.

¹⁰ Timawthy a vaw tlô tita, nama hry liata kâchhie leipa ta paysa muh vy. Kei hawhta Abeipa rai a hria haipa a châ.

¹¹ Unawhzy chhaota kei lâ â vy awpa mokhâh na ta, a phapa ta a vaw tlô thei nawpa ta, a khitlyna liata vaw deichhy muh vy.

¹² Eima unawhpa Apawlôsâ kyh liata cha, unawh hropazy chhaota nâmo lâ a vy awpa ta a haw na ta, châhrasala a vy awpa paryhsa mâh vei. Ryhpaohna daihti a hmô tita â vy aw.

¹³ A vaih u la, ngiapâna liata â ipata a duahpa ta, riahphapa ta y u la, thatlôpa ta y teh u.

¹⁴ Nama taopa maih kyhpachâna ta taopa châ mawh sy.

¹⁵ Unawh saih u, Stiphanasâ chhôhkhazy kha Akai râh liata Krizyhpa hmiatuapa châ ei ta, mopathaihpazy chakaona raihria liata â pie pasai ngaitapa ama châzie nama pahno.

¹⁶ Cha hawhpa chyhsazy liata a ngiarih awpa ta châ haw ei na ta, eima hrialâhpa zydua nata a hriapasapa zydua liata chhao a ngiarih awpa ta ei châ haw ei.

¹⁷ Stiphanasâ, Fawtunatâ nata Akaikâ zy amâ vypa he ei ly kaw. Nama y leipa chhao a hno leipa ta eina tao ei.

¹⁸ Ei thlahpa tha na patlô ei ta, nâmo thlahpa tha ama cha patlô hra. Cha hawhpa chyhsazy cha palyupalih teh u.

Anaohna

¹⁹ Asia râh Awnanopazy ta ama châ naoh. Akuilâ nata Priskilâ nata ama o liata Awnanopa a pakhypazy ta Abeipa liata palôh hmeiseihpa ta ama châ naoh.

²⁰ Unawh zydua ta ama châ naoh. Nâmo chhao apahnâna pathaihpa ta a naoh raihrie teh u.

²¹ He anaohna he, kei, Pawla ta keima ku tlai ta ei ropa a châ.

²² Ahy rai Abeipa kyh a pachâ leipa cha chhiesapa ta y mawh sy. Mârânâthâ! Eima Beipa, a vy mah y!

²³ Abeipa Zisu ngiachhiena nama hnohta y mawh sy.

²⁴ Krista Zisu liata ei kyhpachâna he nama zydua hnohta y mawh sy. Amen.