1 KAWRINI 15 - Mara Bible RV (BSI)

Krista thyuheihna

¹ Unawh saih u, thâtihpha cha chho ei na ta, a pyh ei chi ta, a pahniehna ta nama hmâpa thâtihpha kyh cha, cha chho chanei heih awpa ei ei khoh.

² Bie ei cha chhopa ei kha, namâ ngiapâ thlâhthlipa châ leipa ta, khâchâ nama patu khiahta cha, cha liana chata pachha haipa ta nama y.

³ Hezy he bie peimawh chaipa ei daopa nâmo ei cha chho pachhuahpa ei kha a châ: Biehrai bie hawhta Krista cha eima moleina vâta thi ta,

⁴ pabupa ta y ta, Biehrai bie hawhta a noh thôhna noh ta pathyupa ta y ta,

⁵ Kephâ hnohta a luah ta, cha hnôhlâ ta pahrawh hleino hnohta a luah ta.

⁶ Cha khai tawhta unawh za pangawh hlâta hluh via hnohta ei kha tlai ta a luah ta, chazy hry liata thokha cha a mô ha hra ei sala, a hluh via syulyu cha ama hroh thlâh ha chy.

⁷ Cha khai tawhta Zâmie hnohta a luah ta, lyuhchâpa zydua hnohta â luah heih.

⁸ A chhâ chaina ta, a daihti leipa ta a pihpa keima hnohta chhao â luah.

⁹ Kei la lyuhchâpazy hry liata chyh chaipa châ na ta, Khazohpa Awnanopa ei taolapa vâta, lyuhchâpa ta bi tlâh chhao châ va na.

¹⁰ Châhrasala Khazohpa ngiachhiena vâ deita ta, he ei châna he a to theipa ei châ. A ngiachhiena eina piepa cha hraoleipa châ vei. Cha dei châ leipa ta, lyuhchâpa zydua hlâta hriapasa via na ta, cha chhao cha keima hriapa châ leipa ta, Khazohpa ngiachhiena ei hnohta a ypa ta a hriapa tlao a châ.

¹¹ Kei chhao, âmo chhao, thâtihpha cha chho pi ta, nâmo chhao ta thâtihpha cha namâ ngiapâ.

Athihpa thyuheihna

¹² Krista cha athihpa hry tawhta pathyupa a châpa kyh phuahpa a châ tlôh khiahta cha, kheihtazieta nama hry liata thokha ta athihpa thyuheihna y vei nama tah thei?

¹³ Athihpa thyuheihna a y vei khiahta cha, Krista chhao pathyupa ta y aw vei.

¹⁴ Krista kha pathyupa ta a y vei khiahta cha, eima bie chhopa he hraoleipa châ aw ta, namâ ngiapâna chhao hraoleipa a châ aw.

¹⁵ Athihpazy thyuheihna y vei tahpa bie he, biedopa a châ khiahta cha, Khazohpa ta Krista a pathyu leipa tlai a pathyupa hawhta a duakheipa châ aw pi ta, Khazohpa kyh liata pahnokheituhpa pakheipa eima châ aw.

¹⁶ Athihpazy pathyupa ama châ vei khiahta cha, Krista chhao kha pathyupa châ aw vei.

¹⁷ Krista kha pathyupa a châ vei khiahta cha, namâ ngiapâna cha aruapa châ aw ta, nama moleinazy liata nama y thlâh ha chy tahna a châ.

¹⁸ Krista liata a môpazy ama leidia haw tahna a châ hra aw.

¹⁹ He hro chhôh châ deita ta Krista liata hnabeiseihna a hneipa eima châ khiahta cha, chyhsa zydua liata ngiachhie chhih chaipa eima châ aw.

²⁰ Châhrasala Krista cha athihpazy hry tawhta pathyupa ta a y hmeiseihpa a châ, a môpazy thyuheihna hmia a sahtuhpa a vaw châ haw.

²¹ Chyhsapa vâta thina vaw y ta, chyhsapa vâ lilaw ta athihpa thyuheihna a vaw y.

²² Âdâh liata chyhsa zydua ama thipa hawhta, Krista liata chyhsa zydua pahropa ta ama y aw.

²³ Châhrasala ama daihti chyu liata a châ aw. Krista cha thyuheihna hmia a sahtuhpa châ ta, â vy heihna liata Krista eihzy pathyupa ama châ aw.

²⁴ Cha khai tawhta chhâna a vaw tlô aw. Cha tita Krista ta ryureina, biehneina nata hmotaotheina zydua pahnie khai aw ta, Paw Khazohpa hnohta khinarâh a hlâ aw.

²⁵ A chariahpa zydua a phei ry liata a soh khai hlâlei Krista cha â bei chy aw.

²⁶ Chariah hnôhchaipa pahnie awpa cha thina a châ,

²⁷ Biehrai ta, “Khazohpa ta ato a phei ry liata a soh,” a tahpa hawhta. “A ry liata ato sopa a châ,” a tahpa heta, Krista ry liata ato a sohtuhpa Khazohpa cha Krista ry liata sopazy hry liata a hlao vei tahpa a palâsa.

²⁸ A ry liata ato sopa a châ ti ta, Sawchapawpa tlai chhao cha, ano ry liata ato a sohtuhpa Khazohpa liata a ngiarih aw ta, chatanachata Khazohpa cha ato liata ato a châ ha aw.

²⁹ Chata châ leipa sala, athihpa vyuhpa ta bâti châpa cha khâpa phahnaina a hnei aw? Athihpazy pathyupa ama châ chachei lei awpa khiahta cha, khazia chyhsazy ta âmo vyuhpa ta bâti ama châ tyh?

³⁰ Khâpa vâta ma keimo chhao he dawh tato ta hro chichhihpa ta eima y tyh?

³¹ Unawh saih u, Krista Zisu eima Beipa liata ei châ palaikhei kaw ei. Chavâta ei reih aw, noh chareih ei thi tyh!

³² Chyhsapa lâ tawhta reipa ta la, Ephesi khih liata sahrâhpazy nata eimâ tupa kha, ei châta khâpa a phahnai aw? Athihpazy pathyupa ama châ vei khiahta cha, “Mylâ thi tlôh aw pi ta, Chavâta nie sih la, doh suh u.”

³³ Dôpa ta y khah u. “Viasa moleipazy ta viasa nôchâ phapa ama parao tyh.”

³⁴ Siana lâta a hra u la, molei khao khuh vy. Thokha cha Khazohpa pahnona rai hnei veih ei chi. Nama maophyuh nawpa ta he bie he ei reih.

Thyuheihna pôhpa

³⁵ Thokha ta, “Kheihta ma athihpazy cha pathyupa ama châ aw? Pôhpa kheihawhpa hneipa ta ma amâ vy aw?” nama tah thei ngyu aw.

³⁶ Nâ, ahrupa! Chi na pabupa cha a thi tua leipa ta cha, pyuh aw vei.

³⁷ Sâh chi nata chihropazy he, a kô pabu pâ leipa chi ta, a chi deita ta na pabu tyh.

³⁸ Châhrasala Khazohpa ta ano khozie lymâ hawhta a kô pie ta, chi nanopazy ta kô nanopa ama hnei chyu.

³⁹ Sapa zydua he sapa chi kha châ veih ei. Chyhsa sapa a nano ta, sahroh sapa a nano ta, pavaw sapa a nano ta, nga sapa chhao â nano.

⁴⁰ Avâ hmozy nata alei hmozy y ei ta, châhrasala avâ hmozy rônahna cha a nano ta, alei hmozy rônahna chhao â nano.

⁴¹ Noh rônahna cha a nano ta, thlâpâ rônahna chhao â nano. Awhsizy rônahna a nano ta, awhsi nata awhsi chhao ama rônahna a lyu vei.

⁴² Athihpa thyuheihna chhao, cha hawhta a châ. Pabupa cha thu theipa châ ta, pathyupa cha thu thei leipa a châ.

⁴³ Palyupalih leipa ta pabupa châ ta, rônahpa ta pathyupa a châ. Chiehleipa ta pabupa châ ta, hmotaotheipa ta pathyupa a châ.

⁴⁴ Chyhsapa pôhpa ta pabupa châ ta, thlahpa pôhpa ta pathyupa a châ. Chyhsapa pôhpa a y khiahta cha, thlahpa pôhpa chhao a y aw.

⁴⁵ Chavâta, “Chyhsa hmiatua chaipa Âdâh cha chyhsa hrohpa a vaw châ,” tahpa ta ropa a châ. Âdâh hnôhchaipa cha hrona pietuhpa thlahpa a vaw châ haw.

⁴⁶ Châhrasala thlahpa lâ kyh y tua leipa ta, chyhsapa lâ kyh y tua ta, cha khai tawhta thlahpa lâ kyh cha a vaw ypa a châ.

⁴⁷ Âdâh hmiatuapa cha alei tawhtapa châ ta, dohlei ta taopa a châ. Âdâh panona deikua cha vârâh tawhtapa a châ.

⁴⁸ Dohlei ta taopa chyhsapa hawhna khata, lei chyhsazy cha châ ei ta; vârâh tawhta chyhsapa hawhna khata, vârâh chyhsazy cha ama châ.

⁴⁹ Dohlei ta taopa chyhsapa lyuna eima hneipa hawhta, vârâh tawhta chyhsapa lyuna chhao eima hnei hra aw.

Bienyupa nata pahniena

⁵⁰ Unawh saih u, he bie he ei cha chho ei. Sapa nata thisaih heta Khazohpa khinarâh to thei leipa aw ta, thi theipa heta thi thei leipa to thei aw vei.

⁵¹ Nathlie teh u, bienyupa ei cha chho ei. Eima zydua ta a mô khai leipa aw pi ta, châhrasala pananopa ta eima y khai aw.

⁵² Chiahmie hnôhchaipa a paro tita, sôkha ta, movi hlâta pananopa ta eima y khai aw. Cha tita, athihpazy cha thi khao lei awpa ta pathyupa châ aw ei ta, keimo chhao pananopa ta eima y ha aw.

⁵³ He thu theipa he thu leipa ta a tobi aw ta, thi theipa he thi thei leipa ta â tobi aw.

⁵⁴ Thu theipa cha thu thei leipa ta a tobipa ta, thi theipa cha thi thei leipa ta â tobi tita, “Thina cha pahniena ta a palâ haw.

⁵⁵ Hy thina, na pahniena cha khataih liata a y haw? Hy thina, na châmaih cha khataih liata a y haw?” tahpa bie kha a vaw tlô aw.

⁵⁶ Thina châmaih cha moleina châ ta, moleina hmotaotheina cha ryhpa bie a châ.

⁵⁷ Châhrasala eima Beipa Zisu Krista zawhzi ta pahniena miah pietuhpa Khazohpa cha reithaipa ta y mawh sy.

⁵⁸ Chavâta unawh kho ngaitapazy saih u, â ipa ta a duah u la, papie thei lei awpa ta a pachyu teh u. Nama hriapasana cha Abeipa liata hraoleipa châ vei tahpa pahnopa ta, Abeipa raihria cha phahnai ngiah ngaitapa ta hria lymâ teh u.