1 KAWRINI 14 - Mara Bible RV (BSI)

Reihtheileipa kyh

¹ Kyhpachâna a chadai u la, thlahpa hmopiepazy khoh u la, biechho chakaona hmopiepa khoh pachai teh u.

² Reihtheileipa ta bie a reihpa cha, chyhsazy hnohta a reihpa châ leipa ta, Khazohpa hnohta a reihpa tlao a châ. Ahy hmahta a reipa cha pahno thei veih ei, Thlahpa ta bienyupa a reihpa a châpa vâta.

³ Biechhotuhpa deikua cha, chyhsazy hnohta taopathina bie, pasyuna bie nata thlapalôhna biezy a reih tyh.

⁴ Reihtheileipa ta bie a reihpa cha, ano deita taopathi ta, biechhotuhpa deikua cha Awnanopa a taopathi.

⁵ Nama zydua ta reihtheileipa ta bie reih khai ha u la ei tah kaw, châhrasala biechho thei khai ha u la ei tah pachai. Reihtheileipa cha Awnanopa thapatlô nawpa ta chhopasiatuhpa ama y leipa khiahta cha, biechhotuhpa cha reihtheileipa ta bie a reihpa hlâta a rônah via.

⁶ Tahmâ he unawh saih u, reihtheileipa ta bie reipa ta nama hnohta a vy aw sah la, aluahna tlyma, pahnona tlyma, biechhona tlyma, pachuna bie tlyma, nama hnohta reih tlôh leipa aw sah la, kheihta eina phahnaikhei thei aw ei chi?

⁷ Hrona hnei leipa hmozy chhao he, siaramo tlyma, totâ tlyma, ao chybia hneipa ta a paro leipa khiahta cha, khâpa hla ma ama pasasa tahpa kheihta chyhsa ta a pahno thei aw?

⁸ Chiahmie chhao he chybia hnei leipa ta a paro khiahta cha, ahy ma a dyuh awpa ta a mâ aw?

⁹ Cha hawhna chata nâmo chhao, pahno thei leipa bie nama paleih ta nama reih khiahta cha, kheihta ma nama bie reipa cha chyhsa ta a pahno thei aw? Aruapa liata bie a reihpa nama châ aw.

¹⁰ Khizaw liata reih nanopa chi hluhpi y ta, yzie a hnei leipa reih y tlâ vei.

¹¹ Châhrasala a reih yzie ei pahno tlôh leipa khiahta cha, cha reih a cheihpa châta kei cha chihropa châ aw na ta, ano chhao kei châta chihropa a châ aw.

¹² Cha hawha chara nâmo chhao Thlahpa hmopiepa to awpa nama tlaichhai kawpazy cha, Awnanopa thapatlô nawpa ta tlaichhai u la, tlua muh vy.

¹³ Chavâta reihtheileipa ta bie a reihpa ta a chhopasia thei nawpa ta thlahchhâ mawh sy.

¹⁴ Reihtheileipa ta thlah ei chhâ khiahta cha, ei thlahpa cha thlahchhâ tlai ta, ei palôh deikua cha hmâh va na.

¹⁵ Kheihta a châ aw tly? Thlahpa ta thlahchhâ aw na ta, ei palôh chhao ta ei chhâ aw. Thlahpa ta hla sa aw na ta, ei palôh chhao ta ei sa aw.

¹⁶ Na thlahpa ta alyna bie na reih khiahta cha, reihtheileipa hmopiepa a to leipa ta na biereipa pahno leipa aw ta, kheihta ma alyna bie na reipa cha “Amen” a tah thei aw?

¹⁷ Nâ la alyna bie na reih pha kaw ngyu ma, mohropa deikua taopathi hlei vei.

¹⁸ Nâmo zydua hlâta reihtheileipa ta bie ei reih hluh viapa vâta Khazohpa hnohta alyna bie ei reih.

¹⁹ Chtahrasala Awnanopa pakhyna liata la, reihtheileipa ta biesâ thy kha reipa hlâta, mohropazy ei pachu thei nawpa ei ta, reih theipa ta biesâ miapangawh reipa pha ei tah via.

²⁰ Unawh saih u, hawti palôh phaoh khah u. Moleina kyh liata cha hawsaih hawhta châ u la, palôh lâta deikua cha pitlohpa ta y teh u.

²¹ Ryhpa châbu liata, “Reih hro a cheihpa phopi hmâh aw na ta, Chihropa hmaokah hmâpa ta, He phopi hnohta bie ei reih aw; Chatanachôta na nathlie hlei aw veih ei, Abeipa ta a tah,” tahpa ta ropa a châ.

²² Chavâta reihtheileipazy cha ngiapâtuhpazy châta ngiana châ leipa ta, ngiapâleipazy châta ngiana a châ. Biechhopa deikua cha, ngiapâleipazy châta ngiana châ leipa ta, ngiapâtuhpazy châta ngiana a châ.

²³ Chavâta Awnanopa apakhyna liata, nama zydua ta reihtheileipa ta bie nama rei khiahta cha, khôtho chyhsazy tlyma, ngiapâleipazy tlyma a vaw ngia ei sala, palôh a ki leipa hawhta cha pachâ aw veih ei ma?

²⁴ Nama zydua ta bie nama chho khiahta deikua cha, ngiapâleipa tlyma, khôtho chyhsa tlyma a vaw ngia sala, a thaileizie nama zydua ta nama palâsapa châ aw ta, nama zydua ta nama pasiapa a châ aw.

²⁵ A palôh liata nyupazy palâsapa châ aw ta, â khu lâta pao aw ta, Khazohpa a chhypa ta, Khazohpa cha nama hry liata a y hmeiseih tlai tahpa ta a phuah aw.

Pakhyna siezie

²⁶ Cha khiahta la unawh saih u, kheihta a châ aw? Namâ pakhy nahta, chyhsa to ta hla, pachuna bie, aluahna, reihtheileipa nata a chhopasiana zy nama hnei chyu. Hmo to zydua he taopathina châta châ khai mawh sy.

²⁷ Reihtheileipa ta bie a reihpa ama y khiahta cha, pano tlyma, a hluh chai ta pathôh tlyma châ sala, pakha pakha ta reih ei sala, chhopasiatuhpa y mawh sy.

²⁸ Chhopasiatuhpa ama y leipa khiahta cha, Awnanopa pakhyna liata cha, a thlih thlâh ha ei sala, âmo nata Khazohpa hnohta reih mawh ei sy.

²⁹ Hrohsopa pano tlyma, pathôh tlyma ta bie reih ei sala, ama biereipa cha mohropazy ta pakhâta ta pachâ mawh ei sy.

³⁰ Cha liata a tyuhpa pakha hnohta aluahna a vaw tlô khiahta cha, bie a reih tuapa cha a chalih mawh sy.

³¹ Chyhsa zydua ta a chu ei sala, thlahpalôhpa ta ama y thei nawpa ta, nama zydua ta bie reih thei khai ei chi ta, pakha pakha ta rei awpa a châ.

³² Hrohsopazy thlahpa cha hrohsopazy biehneina ry liata a y.

³³ Khazohpa cha tymâna Khazohpa châ leipa ta, adyhna Khazohpa châ tlôh ta. Mopathaihpazy Awnanopa to liata taozie hawhta,

³⁴ chanôzy cha Awnanopa pakhynazy liata a chalihpa ta y mawh ei sy. Bie rei pasaipa châ veih ei. Ryhpa ta a reipa hawhta, a ngiarihpa ta ama y awpa a châ.

³⁵ A chu khohpa ama hnei khiahta cha, o lâta ama vahpazy ama hiahri awpa a châ. Chanô châta Awnanopa pakhyna liata bie reipa cha nozachhihpa châ tlôh ta.

³⁶ Khazohpa bie cha nâmo tawhta a puapa ma a châ? A châ vei khiah, nâmo hnohta dei ma Khazohpa bie cha a vaw tlô?

³⁷ Chyhsa ta hrohsopa hawhta tlyma, thlahpa chyhsa hawhta tlyma, â pachâ khiahta cha, nama hnohta bie ei ropazy he Abeipa biepiepa a châ tahpa pahno mawh sy.

³⁸ Cha cha a pahno vei khiahta cha, ano chhao pahnopa châ aw vei.

³⁹ Chavâta unawh saih u, bie chho awpa tlaichhai kaw u la, reihtheileipazy ta bie reipa chhao pakhâ khuh vy.

⁴⁰ Châhrasala hmo to zachhihpa nata chybia hneipa ta taopa châ mawh sy.