1 KAWRINI 12 - Mara Bible RV (BSI)

Thlahpa hmopiepazy

¹ Chavâta unawh saih u, thlahpa hmopiepazy kyh liata, nama pahno lei awpa khoh va na.

² Ngiapâleipa nama châ no kha, nothlahpa reih pathlie thai leipazy lâta a chhipa ta y ei chi ta, lâpi paviasapa ta nama ypa nama pahno.

³ Chavâta he he nama pahno awpa ei khoh: Khazohpa Thlahpa chhihthapa ta bie a reihtuhpa ta, “Zisu cha chhiesapa a châ!” tah beih vei. Ahy hmahta Thlahpa Pathaihpa chhihthana dei leipa ta cha, “Zisu cha Abeipa a châ,” tah thei veih ei.

⁴ Hmopiepa chi hluhpi y ta, Thlahpa deikua cha pakha a châ.

⁵ Chakaona chi hluhpi y ta, Abeipa deikua cha pakha a châ.

⁶ Raihria chi hluhpi y ta, Khazohpa deikua cha pakha a châ. Chyhsa to hnohta ama raihria châ chyu ta hmotaotheina a pie ei.

⁷ Thlahpa hmopiepazy cha zawpi pha nawpa ta chyhsa to hnohta piepa a châ.

⁸ Chyhsa pakha hnohta Thlahpa liata sona bie piepa châ ta, chyhsa hropa hnohta Thlahpa lia lilaw ta pahnona bie piepa a châ.

⁹ Mohropa hnohta Thlahpa lia lilaw ta ngiapâna piepa châ ta, ahropa hnohta, cha Thlahpa lilaw ta patlâh theina piepa a châ.

¹⁰ Thokha hnohta hmonoâhpa tao theina piepa châ ta, ahropa hnohta hrohsona bie phuah theina piepa a châ. Chyhsa hropa hnohta thlahpa nanopazy pahrua thaina piepa châ ta, mohropa hnohta reihtheileipa ta bie rei theina piepa châ ta, ahropa hnohta reihtheileipa chhopasia theina piepa a châ.

¹¹ Cha zydua cha Thlahpa pakha raihria châ ta, chyhsa to hnohta a khozie hawhta a rai chyu ei.

Pôhpa miakha, pachiahpa hluhpi

¹² Pôhpa he miakha châ ta, pachiahpa hluhpi a hnei. Pôhpa pachiahpa zydua cha hluh hra sala, pôhpa cha miakha a châpa hawhta, Krista chhao cha hawhpa a châ.

¹³ Eima zydua ta, Zuzy chhao, Krikâhzy chhao, sei chhao, khotalaipa chhao, pôhpa miakha châ awpa ta Thlahpa miakha ta bâti pachâsapa châ pi ta, Thlahpa miakha tawhta padosapa eima châ khai.

¹⁴ Pôhpa cha miakha dei châ leipa ta, pachiahpa hluhpi a hnei.

¹⁵ Phei ta, “Ku ei châ leipa vâta pôhpa liata a hlao va na,” tah sala, cha vâna chata pôhpa liata â hlao leipa châ hlei vei.

¹⁶ Nakao ta, “Mo ei châ leipa vâta pôhpa liata a hlao va na,” tah sala, cha vâna chata pôhpa liata â hlao leipa châ hlei vei.

¹⁷ Pôhpa zydua he mo châ khai sala, pyu theina cha khataih liata a y aw? Pôhpa zydua he nakao châ khai sala, roh theina cha khataih liata a y aw?

¹⁸ Khazohpa ta pachiahpa to he, pôhpa liata a khona lia maihta a paysa chyupa a châ.

¹⁹ Cha zydua cha pachiahpa miakha châ ei sala, pôhpa cha khataih liata a y aw?

²⁰ Pachiahpa hluhpi y ta, pôhpa deikua miakha a châ.

²¹ Mo ta ku hnohta, “Châ ngiah va na,” tah thei leipa ta, luh chhao ta phei hnohta, “Châ ngiah va na,” tah thei hra vei.

²² Cha cha rei leipa ta, pôhpa pachiahpa chiehleipa hawhta a lâpazy cha peimawh via pachaipa ama châ.

²³ Pôhpa pachiahpa palyupalih tlâh leipa ta eima pachâpazy cha palyupalih via pi ta, eima pôhpa pachiahpa a ngia leipazy cha eima tobi via tyh.

²⁴ Eima pôhpa pachiahpa a ngiapazy cha, pangiasa via byuh hlei vei. Khazohpa ta pôhpa he paryh ta, angiana a hnei leipa pachiahpazy cha palyupalihna a pie via ei.

²⁵ Chatanachata pôhpa liata achhaihna y leipa aw ta, pachiahpazy ta â khopa ta amâ baokhâ raihrie thei aw.

²⁶ Pachiahpa miakha pasa a tao tita, pachiahpa zydua ta taokhei ei ta, pachiahpa miakha palyupalihpa ta a y tita, pachiahpa zydua ta amâ lykhei tyh.

²⁷ Nâmo sahlao he Krista pôhpa châ ei chi ta, a pachiahpa nama châ chyu hra.

²⁸ Khazohpa ta Awnanopa liata chakaotuhpazy rao ta, miakhana liata lyuhchâpazy, mianona liata hrohsopazy, miathôhna liata pachutuhpazy a rao. Cha khai tawhta hmonoâhpa taotuhpazy, patlâhna hmopiepa a hneipazy, chyhsa bao khohna hmopiepa a hneipazy, ryurei thaina hmopiepa a hneipazy nata reihtheileipa hmopiepa a hneipazy a rao ei.

²⁹ Chyhsa zydua lyuhchâpa ama châ khai ma? Chyhsa zydua hrohsopa ama châ khai ma? Chyhsa zydua pachutuhpa ama châ khai ma? Chyhsa zydua ta hmonoâhpa ama tao khai ma?

³⁰ Chyhsa zydua ta patlâh theina hmopiepa ama hnei khai ma? Chyhsa zydua ta reihtheileipa ta bie ama reih khai ma? Chyhsa zydua ta reihtheileipa ama chhopasia thei khai ma?

³¹ Khâpa rai châ sala, hmopiepa rônah viapazy cha tlaichhai pachai teh u. Chatanachata lâpi pha viapa ei cha pahmô aw ei.