1 KAWRINI 11 - Mara Bible RV (BSI)

Achhyna o liata yzie awpa

¹ Kei ta Krista hâ ei lapa hawhna heta, nâmo chhao ei hâ nâ la hra teh u.

² Ato liata nâ thei ei chi ta, pachuna ei cha piepazy nama zyh lymâpa vâta ei cha reithai ei.

³ He deikua he nama pahno awpa ei khoh: Chapaw luh cha Krista châ ta, chanô luh cha chapaw châ ta, Krista luh cha Khazohpa a châ.

⁴ Chapaw ta a luh a khupa ta thlah a chhâ khiahta tlyma, bie a chho khiahta tlyma cha, a luh maoh a paphyuhpa a châ.

⁵ Chanô ta a luh a khu leipa ta thlah a chhâ khiahta tlyma, bie a chho khiahta tlyma deikua cha, a luh maoh a paphyuhpa a châ. Chanô châta luh khu leipa nata luh pôlôpa cha miakhapa a châ.

⁶ Chanô cha a luh â khu khoh leipa khiahta cha, a sâ ngyu lâlao mawh sy. Châhrasala chanô châta sâ ngyupa nata luh pôlôpa cha nozachhihpa a châpa vâta, a luh a khu mawh sy.

⁷ Chapaw cha Khazohpa lyupa nata Khazohpa rônahna a châpa vâta, a luh â khu awpa châ vei. Chanô deikua cha chapaw rônahna a châ.

⁸ Chapaw cha chanô tawhta taopa châ leipa ta, chanô deikua cha, chapaw tawhta taopa a châ.

⁹ Chapaw cha chanô châta taopa châ leipa ta, chanô deikua cha, chapaw châta taopa a châ.

¹⁰ Cha vâta nata vâlyuhchâpazy vâ chhao rai ta, chanô cha a chô liata biehneituhpa a y tahpa ngiana châta a luh â khu awpa a byuh.

¹¹ Abeipa liata deikua cha, chanô cha chapaw a hlao leipa ta y thei leipa ta, chapaw chhao chanô a hlao leipa ta y thei vei.

¹² Chanô cha chapaw tawhta a puapa a châpa hawhta, tahmâ cha chapaw chhao chanô tawhta a pihpa a châ hra. Ato zydua deikua cha Khazohpa tawhta a puapa a châ.

¹³ Nâmosasyh ta a pachia teh u. Chanô ta luh a khu leipa ta Khazohpa lâta thlahchhâpa cha â ngia ma?

¹⁴ Chapaw cha a sâ â paseih khiahta cha, ano châta nozachhihpa a châ tahpa nama pikheipa palôh chhao ta cha pahnosa veih ei ma?

¹⁵ Chanô châta deikua cha, a sâ â paseih khiahta cha, a rônahna a châ. A sâ cha â khu awpa ta piepa châ tlôh ta.

¹⁶ He kyh liata a paeipa ama y khiahta cha, taozie hropa hnei ma pi, Khazohpa Awnanopa chhao ta hnei hra vei.

Abeipa tlâhkhai

¹⁷ He hmozy liata deikua cha, cha reithai thei veih ei na. Nama pha via nawpa lâ châ leipa ta, nama rao via nawpa lâta namâ pakhy tyh.

¹⁸ A hmiatua chai ta, Awnanopa sahlao namâ pakhy nahta, nama hry liata a pachhaihna a y tyh tahpa ei thei. Ei zo pâ thlâh haw.

¹⁹ Nama hry liata a hmeiseihpazy amâ lâ thei nawpa ta, py achhaihna chhao cha a y awpa rai a châ.

²⁰ Namâ pakhy nahta, Abeipa Zâpati nie awpa ta a pakhypa châ veih ei chi.

²¹ Nama nie nahta, chyhsa to nâmo pati chyu nama nie tyh. Chavâta pakha a nodi ta, pakha a pari.

²² Khazia! Niedo nawpa o hnei veih ei chi ma? Khazia Khazohpa Awnanopa mohnaopa ta, khâpa hmah hnei leipazy maoh nama paphyuhsa? Nama hnohta khâpa ei reih aw? Ei cha reithai aw ei mâ? Cha reithai tiarâh veih ei na.

²³ Nama hnohta ei cha pie pachhuahpa ei he Abeipa tawhta ei hmôpa a châ. Abeipa Zisu cha patusapa ta a y zâ ta, viahchhâ la ta,

²⁴ alyna bie a rei khai nahta, eichheih ta, “He he ei sapa nama châta piepa a châ. Einâ thei thlâh nawpa ei chi ta, he he tao tyh muh vy,” tah ta.

²⁵ Cha hawhna chata, zâpati ama nie khai nahta, nyu la ta, “He nyu he ei thisaih liata biehrai thiehpa cha a châ. Nama dona maihta einâ thei thlâh ha nawpa ei chi ta, he he tao tyh muh vy,” tah ta.

²⁶ He viahchhâ he nama niena maih nata nyu he nama dona maihta, â vy heih hlâlei cha Abeipa thina nama pamosa tyhpa a châ.

²⁷ Chavâta ahy rai a nie tlâh châ leipa ta viahchhâ a niepa tlyma, Abeipa nyu a dohpa tlyma cha, Abeipa pôhpa nata thisaih chô liata a moleipa vâta thailei a châ aw.

²⁸ Chavâta chyhsa ta anosasyh a pasia sala, cha khai tawhta, viahchhâ cha niepa ta, nyu cha doh mawh sy.

²⁹ Abeipa pôhpa a châpa pahno leipa ta, a niepa nata a dohpa maih cha, ano thaileichâ nawpa ta a niepa nata a dohpa a châ.

³⁰ Chavâta nama hry liata chyhsa hluhpi chiehleipa nata tlâhleipa ta y ei chi ta, thokha chhochhi cha ama thi haw.

³¹ Keimosasyh ta eimâ mohpasia ha khiahta cha, thaileichâpa ta y aw ma pi.

³² Abeipa ta thailei miah a pachâsa nahta deikua cha, chhoreipa ta eima y tyh. Chatanachata khizaw thailei a pachâsa tita, thailei pachâsapa ta y aw ma pi.

³³ Chavâta unawh saih u, nie awpa ta namâ pakhy tita, a hâ pakhy tyh muh vy.

³⁴ Namâ pakhyna cha thaileichâna a châ pathlei lei nawpa ta, ahy rai a nodi khiahta cha, o liata nie ha mawh sy. Hmo hropa kyhzy cha, ei vy tita ei pasia aw.