1 KAWRINI 10 - Mara Bible RV (BSI)

Nothlahpa a chhy lei awpa ta zikyurâna

¹ Unawh saih u, he hmo he nama pahno lei awpa khoh va na. Miah pathlatuhpa zydua kha meihdo ry liata y khai ei ta, ama zydua ta tilaipi ama chaka khai.

² Ama zydua ta meihdo nata tilaipi liata Mawsi hnohta a ngiarihpa ta bâti ama châ.

³ Ama zydua ta thlahpa pati miakha nie ei ta,

⁴ ama zydua ta thlahpa ti miakha ama doh. Âmo a zituhpa thlahpa Lôpanô tawhta ti doh ei ta, cha Lôpanô cha Krista a châ.

⁵ Châhrasala ama hry liata chyhsa hluh via chô liata Khazohpa palôh châ leipa ta, ama rizy râhchawhpa liata hiepatlapa ta a y.

⁶ Hmo moleipa ama khohpa hawhta eima khoh hra lei nawpa ta, cha hmozy cha keimo châta pamosana a châ.

⁷ “Niedoh awpa ta zawpi a tyuh ei ta, lâ awpa ta ama thyu,” tahpa ropa hawhta, âmo hawhta nothlahpa a chhy hra khuh vy.

⁸ Ama hry liata thokha ta apatlana moleina tao ei ta, noh kha ta chyhsa 23,000 ama thipa hawhna khata, keimo la apatlana moleina liata eima tlaih awpa châ vei.

⁹ Ama hry liata thokha ta Abeipa pasia ei ta, parih ta a pahleipadia hapa hawhna ei khata, keimo la Abeipa pasia khah ei suh u.

¹⁰ Ama hry liata thokha ta paphôh ei ta, pahleipadiatuhpa ta a pahleipadia hapa hawhna ei khata, keimo la paphôh khah ei suh u.

¹¹ Khazy kha pamosana châta ama chô liata a vaw tlôpa châ ta, keimo, daihti chhâna liata a ypazy pachuna châta ropa a châ.

¹² Chavâta â duahpa ta â pachâpa cha a chado mawh sy, chataleipatala a pao pathlei aw na.

¹³ Chyhsa chô liata a tlô tyhpa reipasaonazy dei leipa ta cha, reipasaona hropa nama chô liata tlô beih vei. Khazohpa cha ngâchhihpa châ ta, nama pahnie lei awpa reipasaona namâ tyh awpa pasaih aw vei. Reipasaona nama pahnie thei nawpa ta, reipasaona raohpa ta a râ nawpa lâpi a cha taopa aw ei.

¹⁴ Chavâta kho ngaitapazy saih u, nothlahpa achhyna a râsai teh u.

¹⁵ Chyhsa sopazy hnohta reipa hawhta ei reih. Ei bie reipa he pachâ teh u.

¹⁶ Byhnâ tona nyu châta byhnâ eima aw tyhpa he, Krista thisaih a hlykheina châ vei mâ? Viahchhâ eima pachhaih tyhpa he, Krista pôhpa a hlykheina châ vei mâ?

¹⁷ Viahchhâ cha tlâ kha a châpa hawhta, cha viahchhâ tlâ kha tawhta a niepa keimo, chyhsa hluhpi chhao pi he, pôhpa miakha eima châ.

¹⁸ Izarei phopi kha pachâ tua u. Atheihna sa a niepazy kha maisâh a hlykheipazy châ veih ei ma?

¹⁹ Khâpa ma rei ei chhuah? Nothlahpa lâta atheihna hlâpa cha khâpa hmah châ leipa ta, nothlahpa chhao cha khâpa hmah châ vei, ei tah mâ?

²⁰ Tah va na. Ngiapâleipazy atheihna cha Khazohpa lâta hlâpa châ leipa ta, ahripazy lâta ama hlâ tyhpa a châna kyh ei reipa a châ. Nâmo la ahripazy namâ hlykhei awpa cha khokhei veih ei na.

²¹ Abeipa nyu nata ahripa nyu doh pakaoh thei veih ei chi. Abeipa tlâhkhai nata ahripa tlâhkhai dôh pakaoh thei hra veih ei chi.

²² Abeipa cha a hia patliasapa ta, a hie pahâh eimâ chhuah mâ? Ano hlâta eima tha a tlô via mâ?

Ngiapâtuhpazy khotalaina

²³ “Ato zydua ei châta tao pasaipa a châ,” châhrasala ato tao khaipa pha hlei vei. “Ato tao pasaipa a châ,” châhrasala ato taopa ta chyhsa taopathi hlei vei.

²⁴ Chyhsa ta ano pha nawpa tlua leipa sala, mohropa pha nawpa tlao tlua mawh sy.

²⁵ Sa zuana liata ama zuapa maih cha, chhie nata pha pahnona hmâpa ta, khâpa hmah hiahri leipa ta nie thlâh ha mah y.

²⁶ “Alei he Abeipa eih châ ta, a chhôh liata hmo zydua chhao Abeipa eih a châ.”

²⁷ Ngiapâleipa chyhsa pakha ta pati nie cha hrua ei sala, nie awpa namâ chhuah khiahta cha, nama hmiakô liata sopa maih nie u la, nama chhie nata pha pahnona hmâh u la, bie hiahri khuh vy.

²⁸ Chyhsa ta, “He he atheihna châta hlâpa a châ,” tahpa ta a cha chho khiah ei ta deikua cha, châ chhotuhpa vâta nata chhie nata pha pahnona vâta, nama nie awpa châ vei.

²⁹ Nâma chhie nata pha pahnona kyh reih leipa na ta, mohropa chhie nata pha pahnona kyh ei reipa tlao a châ. Khazia ei khotalaina cha, chyhsa hropa chhie nata pha pahnona ta a pachia aw?

³⁰ Alyna chôta ei nie khiahta cha, alyna bie reina chôta ei niepa pati vâta, khazia reipachhiepa ei châ aw?

³¹ Chavâta nama nie tlyma, nama doh tlyma, nama taopa maih Khazohpa rônahna châta tao muh vy.

³² Zuzy chhao, Krikâhzy chhao, Khazohpa Awnanopa chhao, amâ hlua nawpa hmo khâpa hmah tao khuh vy.

³³ Kei chhao ta, chyhsa hluhpi pachha ama châ thei nawpa ta, keima athôhna tlua leipa na ta, chyhsazy athôhna tluapa ta, hmo ei taopa to liata chyhsa to palysa tlao ei chhuah tyh.