1 KAWRINI 1 - Mara Bible RV (BSI)Anaohna 1 Pawla, Khazohpa khozie ta Krista Zisu lyuhchâpa ta awpa nata eima unawhpa Sôsthene ta 2 Kawrini khih liata a ypa, mopathaihpazy châ awpa ta Krista Zisu liata pananopa Khazohpa awnanopa nata su to liata eima Beipa Zisu Krista, âmo Beipa nata keimo Beipa moh a padopa zydua eima châ naoh. 3 Khazohpa eima Paw nata Abeipa Zisu Krista tawhta ngiachhiena nata thlalôhna nama hnohta y mawh sy. Alyna bie reina 4 Krista Zisu liata Khazohpa ngiachhiena piepa nama châpa vâta, Khazohpa hnohta alyna bie khâ ei reih tyh. 5 Ano vâta biereina kyh nata pahnona kyh zydua liata, kyh to liata pahneirôhsapa ta nama y. 6 Cha hawhna chata Krista thâtih a pahnotuhpa nama châna cha nâmo liata pa-ipa ta a y. 7 Chavâta eima Beipa Zisu Krista aluahna nama hâna liata, thlahpa hmopiepa khâpa hmah a phahla veih ei chi. 8 Eima Beipa Zisu Krista noh liata, seina hnei leipa ta nama y thei nawpa ta, ano ta a chhâna taihta tha a cha patlô aw ei. 9 A Sawchapawpa eima Beipa Zisu Krista akaona liata nâmo châ awtuhpa Khazohpa cha ngâchhihpa a châ. Awnanopa achhaihna 10 Unawh saih u, nama hry liata achhaihna rai a y lei nawpa ta, nama zydua reiraohpa ta, palôh miakha nata pachâna miakha phaopa ta a pôhkha awpa ta, eima Beipa Zisu Krista moh ta ei châ haw ei. 11 Unawh saih u, nama hry liata aeichhiana a ypa kyh Klôi chhôhkhazy ta na chho ei ta. 12 Ei rei khohpa cha he he a châ. Pakha ta, “Kei Pawla py ei châ,” tah ta, pakha ta, “Kei Apawlôsâ py ei châ,” tah ta, mohropa ta “Kei Kephâ py ei châ,” tah ta, mohropa heih ta, “Kei Krista py ei châ,” nama tah. 13 Krista cha pachhaihpa ta a y ma? Pawla cha nama châta khaipâpa ta a y ma? Cha vei khiah, Pawla moh ta bâti nama châ ma? 14 Krispâ nata Kaiâ dei leipa ta cha, nama hry liata ahy hmah bâti ei cha pachâsa leipa vâ ei ta, Khazohpa hnohta alyna bie ei reih. 15 Chavâta ei moh ta bâti nama châ tahpa ahy hmah reih thei veih ei. 16 Stiphanasâ chhôhkha deikua cha bâti ei pachâsa tlai ei. Cha khô lâ cha chyhsa hropa bâti ei pachâsa tlyma pahno khao va na. 17 Krista ta bâti pachâsa awpa ta na tuah leipa ta, thâtihpha chho awpa ta tlao eina tuah. Chyhsapa sona bie ta chho va na, chataleipatala Krista kraws hmotaotheina cha hraoleipa ama pachâsa pathlei aw na. Krista, Khazohpa sona nata hmotaotheina 18 Kraws bie cha leidia haipazy châta hruna châ ta, keimo, pachha haipazy châta deikua cha, Khazohpa hmotaotheina a châ. 19 “Asopazy sona pahleipadia aw na ta, Athaipazy novâhna ei thy aw,” tahpa ropa a châ. 20 Chyhsa sopa cha khataih liata a y? Châthaipa cha khataih liata a y? He khizaw liata bie ei thaipa cha khataih liata a y? Khazohpa ta khizaw sona cha hruna ta tao ha vei ma? 21 Khazohpa sona liata cha, khizaw ta sona hmâpa ta Khazohpa a pahno thei vei tawhta cha, biechhona hrupa hmâpa ta a ngiapâpazy pachhapa cha Khazohpa ta pha a tah ngaita. 22 Zuzy ta ngiana a hnaw ei ta, Krikâhzy ta sona ama tlua tyh. 23 Keimo deikua cha, Krista khaipâpa thâtih eima chho. Cha cha Zuzy châta achapiana châ ta, Zenitaizy châta hruna a châ. 24 Zuzy ama châpa chhao ta, Krikâhzy ama châpa chhao ta, awpazy châta cha, Krista cha Khazohpa hmotaotheina nata Khazohpa sona a châ. 25 Khazohpa hruna cha chyhsapa sona hlâta so via ta, Khazohpa chiehleina cha chyhsapa thatlôna hlâta a thatlô via. 26 Unawh saih u, a cha awna ei he pachâ tua u. Khizaw lâ tawhta thliepa ta cha, nama hry liata chyhsa sopa hluh veih ei chi. Hmotaotheipa chhao hluh leipa ei chi ta, nôpawpa saw hluh hra veih ei chi. 27 Châhrasala Khazohpa ta asopazy maoh paphyuh nawpa ta, khizaw hmo hrupazy tlao a tlyh ta, thatlôpazy maoh paphyuh nawpa ta, chiehleipazy tlao â tlyh. 28 Hmo a ypazy hraoleipa a pachâsa thei nawpa ta, Khazohpa ta khizaw ta nawraihpa nata mohnao chhihpa ta a pachâpazy a tlyh ta, hmo a y leipazy chhao â tlyh. 29 Chavâta Khazohpa hmiakô liata ahy hmah a palai thei aw veih ei. 30 Nâmo deikua cha, ano zawhzi ta Krista Zisu liata nama y. Ano cha keimo châta Khazohpa tawhta sona vaw châ ta, eima siana, pathaihna nata chatlaina a châ hra. 31 Chavâta Biehrai ta a ropa hawhta, “A palaipa maihta Abeipa a palaikhei mawh sy.” |