1 ABEIZY 9 - Mara Bible RV (BSI)

Sawlawmaw hnohta Abeipa â luah

¹ Sawlawmaw ta Zehôvâh Khazohpa o nata abei o cha sa khai ta, o a sa khohpa zydua a paloh khaipa nahta,

² Kibiô liata a hnohta â luahpa hawhna khata, Abeipa cha Sawlawmaw hnohta a vaw luah heih ta.

³ Abeipa ta a hnohta. “Na thlahchhâna nata na hiana, ei hmiakô liata na tlôkheipazy kha ei vaw thei haw. He Achhyna o na sapa he pathaisa na ta, he liata ei moh chhâzaw ta ei paysa haw. He liana heta ei mo nata ei palôh khâ a y ngâ thlâh ha aw.

⁴ Nâ chhao, na paw Dâvi hawhta palôh dopa nata siapa phaopa ta ei mohmô liata y la, bie ei cha piepa zydua tao la, ei bieraopazy nata ei pachianazy na zyh khiahta cha,

⁵ na paw Dâvi hnohta, ‘Izarei beidyuchhai liata a tyuh awpa na pathla tawhta chie aw veih ei,’ tahpa ta bie ei vaw taih hapa hawhta, Izarei chô liata nâ beina beidyuchhai cha chhâzaw ta ei pa-i aw.

⁶ Nâmo tlyma, nama pathlazy tlyma, eina zipa tawh ei chi ta na tleisaipa ta, nama hmiakô liata ei sopa ei biepiepazy nata ei bieraopazy zyh leipa ta, khazoh hropazy pangaipa ta, âmo cha chakaopa ta namâ chhy khiahta deikua cha,

⁷ Izarei cha râh ei piepa tawhna heta chhawh pathlah aw na ta, ei moh châta Achhyna o ei pathaisapa chhao he ei mohmô tawhta ei pasie syulyu ha aw. Chatanachata Izarei cha a chhiena lâta pakhona bieso châta nata pasipasawhna bie châta phopizy hry liata hmâpa a châ aw.

⁸ He o he raona a pachona a châ aw. A chapiapa maihta noâhpa ta ama hmaotô chie aw ei ta, ‘Khazia ma Abeipa ta he râh nata he o he, he hawhta a tao ha tly?’ tah aw ei ta,

⁹ chyhsazy ta, ‘Ama pathlatuhpazy Izi râh tawhta a chhi papuatuhpa Abeipa ama Khazohpa siesai ei ta, khazoh hropazy a patupa ta, a chhy ei ta, ama chakaopa vâta, Abeipa ta he chhiena zydua he ama chô liata a patlôsapa a châ,’ ama tah aw,” tah ta.

Sawlawmaw raihria hropazy

¹⁰ Sawlawmaw ta o miano, Abeipa o nata abei o cha, kô kih chhôh sa ta, a paloh tawhta,

¹¹ Tyre bei Hirâ ta Sawlawmaw cha sidy thozy, meisah vyhpa thozy nata ngôhzy a byuhna zie hawhta â tôh khaipa vâta, Bei Sawlawmaw ta Hirâ cha Kâlili râh liata a ypa khih kih pie ta.

¹² Hirâ cha Sawlawmaw ta khihpi a piepazy mo awpa ta Tyre tawhta a zu ta, châhrasala cha khihpizy chata palysa leipa ei ta.

¹³ Sawlawmaw hnohta, “He khih eina piepazy chi he kheihawhpa khihzy ma ama châ tly, ei unawhpa?” tah ta. Chavâta cha râh cha tanoh taihta Kabu tahpa a châ.

¹⁴ Hirâ ta abei hnohta ngôh talent 120 a vaw paphao hapa kha châ ta.

¹⁵ Bei Sawlawmaw ta rai hria awpa ta chyhsa a pathyu raruahna chhâpa cha, Abeipa o, ano o, diahsua, Zerusale thokhy, Hâzaw khihpi, Mekidô khihpi nata Keze khihpi zy padua awpa a byuhpa vâta a châ.

¹⁶ Izi bei Phiraoh ta khy ta Keze khih la ta, mei ta rao ta, cha khihpi liata a ypa Kâna mo thie ta, khihpi cha a sawchanô, Sawlawmaw lapinô hnohta thyukhei châta a pie.

¹⁷ Sawlawmaw ta Keze khihpi cha paduapathi ta, Mathi Behôrô khihpi chhao a paduapathi.

¹⁸ Bâlathâ khihpi nata Zudâh râhchawhpa liata Tâmâri khihpi paduapathi ta.

¹⁹ Hmo sopakhyna khihpi a hneipa zydua, a talailihzy sona khihpizy, a arâ pheisaih khihpizy nata a padua khohpa maih cha, Zerusale khihpi liata nata Lebanaw liata nata a khinarâh chhôh zydua liata Sawlawmaw ta a padua lymâ.

²⁰ Izarei saw a châ leipa Amawri mo, Hiti mo, Perizi mo nata Zebu mo laibâhpa zydua,

²¹ cha liata ama pathla laibâhpa a ypa, Izarei sawzy ta ama pahleipadia khai thei leipazy cha, Sawlawmaw ta seizy ta tao ta, cha hawhna chata tanoh taihta ama y.

²² Izarei sawzy deikua cha, Sawlawmaw ta sei ta tao leipa ta, pheisaihzy, a chakaotuhpazy, a beimachâzy, a pheisaih hyutuhpazy, a talailih hyutuhpazy nata a arâ pheisaihzy ta a tao ei.

²³ Âmo cha Sawlawmaw raihria chô liata hyutuhpazy châ ei ta, raihria vaituhpazy cha ama zydua ta 550 ama châ.

²⁴ Phiraoh sawchanô deikua cha Dâvi khihpi tawhta Sawlawmaw ta ano châta o a sapa lâ khy ta. Sawlawmaw ta a o cha diahsua chhôhpa ta.

²⁵ Sawlawmaw ta Abeipa châta maisâh a taopa liata kô kha ta ei thôh raopa hlâna nata aryhna hlâna hlâ tyh ta. Abeipa hmiakô liata maisâh liana chata ropahâhpazy chhao rao tyh ta. Chatanachata Achhyna o cha a paloh haw.

²⁶ Bei Sawlawmaw ta Edômâ râh liata Tilaipi Saihpa ngiahkâ Elô kiapâh liata a ypa Eziôkebe su liata balyh py padua ta.

²⁷ Hirâ ta ano a chakaotuhpa tilaipi yzie a pahnopa balyh chyhsazy cha, Sawlawmaw chakaotuhpazy hnohta balyh liata hria awpa ta tuah ta.

²⁸ Balyh chyhsazy cha Ôphi lâ sie ei ta, cha tawhna chata ngôh talent 420 vaw phaoh ei ta, Bei Sawlawmaw lâta ama vaw tlôkhei.