1 ABEIZY 8 - Mara Bible RV (BSI)

Achhyna o lâ Byh a ngiakheipa a châ

¹ Sawlawmaw ta Abeipa Biehrai Byh cha, Dâvi khihpi Zaio tawhta la papua awpa ta, Izarei pathla chhituhpa zydua, Izarei machâzy nata Izarei chi hyutuhpa zydua cha, Bei Sawlawmaw hmiakô liata a luah awpa ta Zerusale liata awpakhy ta.

² Chatanachata Izarei chapaw zydua cha thla sarina, Ethâni thla kyhchhi daihti liata Bei Sawlawmaw lâta a hmaohpakhy ei ta.

³ Izarei machâ zydua a vy ei ta, theihthaipazy ta Byh cha a sy ei ta.

⁴ Abeipa Byh, ahmaohna poh o nata poh o liata hmobaoh pathaihpa zydua a sy ei ta. Chazy cha theihthaipazy nata Livai chizy ta amâ sy.

⁵ Bei Sawlawmaw nata a hmiakô liata Izarei zawpi a hmaohpakhypa zydua cha, Byh hmiakô liata Sawlawmaw hnohta y ei ta, mietaku nata viahchao tôhpa hluhpi ta atheihna hlâ ei ta, a hluhzie cha paki tiah awpa nata rei tiah awpa châ vei.

⁶ Chatanachata theihthaipazy ta Abeipa Bieh­rai Byh cha, Achhyna o chhôh supathaihpa liata a y nawpa su liata a ngiakhei ei ta, Cherubi mathlawzy ry liata Su Pathaih Chaipa liata soh ei ta.

⁷ Cherubizy cha Byh luh chô liata ama mathlaw pakai ei ta, cherubizy ta Byh nata asyna lâzy cha pahli ei ta.

⁸ A lâzy cha a seih kawpa vâta, Achhyna o chhôh supathaihpa hmiakô liata Su Pathaihpa tawhta a pawhmaozy hmô theipa a châ. Khôtho lâ tawh deikua hmô theipa châ vei. Chazy cha tanoh taihta cha liata a y thlâh haw.

⁹ Lôphia miano tah leipa ta cha, Byh chhôh liata hmo hropa khâpa hmah y vei. Cha lôphiazy cha Izi râh tawhta ama kaw pua nota, Abeipa ta Izarei sawzy hnohta bie a hraina su Hôribâ Tlâh liata Mawsi ta a khôpazy a châ.

¹⁰ Su Pathaihpa tawhta theihthaipazy ama vaw puapa nahta, Abeipa o cha meihdo ta vaw bie khai ha ta,

¹¹ meihdo vâna chata theihthaipazy cha chakao awpa ta a duah thei khao veih ei. Abeipa rônahna ta Abeipa o cha a bie khai haw.

Sawlawmaw ta Abeipa a reithai

¹² Chatawhcha Sawlawmaw ta, “‘Meihdo chhapa liata ei pahrâ aw,’ Abeipa ta tah ta.

¹³ Na chhâzaw pahrâna su châta, O rônahpa ei cha sapa haw,” tah ta.

¹⁴ Izarei zawpi zydua amâ dua thlâh ha nota, abei cha zawpi lâ a heih ta, Izarei sawzy châta byhnâ aw ta.

¹⁵ Sawlawmaw ta, “Ei paw Dâvi hnohta a pakah ta bie a taih ta, a ku ta a bietai a patlôtuhpa Abeipa, Izarei Khazohpa cha reithaipa ta y mawh sy!

¹⁶ Abeipa ta, ‘Izi râh tawhta ei phopi Izarei ei chhi papua noh tawhta, ei moh y nawpa o sa nawpa su châta, Izarei chizy hry liata kheihawhpa khih hmahta a tlyh beih va na. Châhrasala ei phopi Izarei hyutuhpa châta Dâvi cha ei tlyhpa a châ,’ tah ta.

¹⁷ Ei paw Dâvi khata Abeipa, Izarei Khazohpa moh châta o sa khona a palôh liata vaw hnei ta.

¹⁸ Châhrasala Abeipa ta ei paw Dâvi hnohta, ‘Ei moh châta o sa khona palôh hnei chi ta, cha hawhpa palôh na hneipa cha na tao pha na.

¹⁹ Châhrasala nâma ta o cha sa aw va chi. Sawchapawpa na sa awpa ta ei moh châta o cha a sa aw,’ tah ha ta.

²⁰ Abeipa ta a bietai cha tahmâ a patlô haw. Abeipa ta bie â vaw taipa hawh tlai ta, ei paw Dâvi su liata kei a duahpa ta, Izarei beidyuchhai liata a tyuh na ta, Abeipa, Izarei Khazohpa moh châta o cha ei sa haw.

²¹ Cha liata Abeipa ta miah pathlatuhpazy Izi râh tawhta â chhi papua nota ama hnohta bie a hraipa, Abeipa biehrai yna Byh y nawpa su ei tao haw,” tah ta.

Achhyna o hlâna thlahchhâna

²² Chatawhcha Sawlawmaw cha Izarei a hmaohpakhypa zydua mohmô ta Abeipa maisâh hmiakô liata a duah ta, avâ lâ a ku pazawh ta,

²³ hetana heta thlahchhâ ta: “Hy Abeipa, Izarei Khazohpa y, nâ hawhpa Khazohpa he, chô lâ avâ liata nata ry lâ alei liata y tlâ veih ei. Nâma cha biehrai patlô chi ta, pathipalôh tlokhuh ta na bie a zyhpa châ chakaotuhpazy chô liata ngiachhiena a palâsa tyhpa na châ.

²⁴ Châ chakaotuhpa ei paw Dâvi hnohta na bietai na patlô haw. Na pakah ta reih chi ta, tanoh na ku ta na patlô haw.

²⁵ Chavâta Hy Abeipa, Izarei Khazohpa y, châ chakaotuhpa ei paw Dâvi hnohta, ‘Na pathlazy ta ama lâpizy pakhâta ta pachâ ei sala, nâ ta ei lâpi nâ chhihpa hawhna heta, âmo chhao ta ei lâpi amâ chhih lymâ khiahta cha, Izarei beidyuchhai liata ei hmiakô lia a tyuh awpa chyhsa na pathlazy tawhta chie aw veih ei’, tahpa ta bie nâ vaw taihpa kha patlô mah y.

²⁶ Chavâta, Hy Izarei Khazohpa y, châ chakaotuhpa ei paw Dâvi hnohta na reipa bie kha ngiachhiepa ta pa-i mah y.

²⁷ “Châhrasala Khazohpa cha alei chô liata a pahrâ tlai aw ma? Pachâ tua, avâ nata avâ a sâh chaipa liata hmah nâ tlôh leipa châ ta, he o ei sapa liata chhochhi cha nâ tlôh lei pachai aw dia!

²⁸ Chatahrasala Hy Abeipa ei Khazohpa y, châ chakaotuhpa ta a cha padona nata a thlahchhâna he nathlie la, tanoh ta na hmiakô liata châ chakaotuhpa thlahchhâna nata hiana he rie pachâ mah y.

²⁹ Chatanachata he su lâ he a vaw heih la, châ chakaotuhpa ta he su lâ a heihpa ta a thlahchhâna he nathlie la, ‘Cha liata ei moh a y aw,’ na tahna su, he o lâ tlai he chhô nah zâ ta na mo tawpâ thlâh ha mah y.

³⁰ Châ chakaotuhpa nata na phopi Izarei sawzy ta he su lâ a heihpa ta thlah ama chhâ tita, ama hianazy vaw nathlie tyh mah y. Na pahrâna su vârâh tawhta vaw nathlie la, na thei tita, a ngiahthai tyh mah y.

³¹ “Chyhsa ahy tlyma a vaih chô liata hmo a paraopa vâta bie pataihsa awpa byuh sala, he o lâ a vypa ta na maisâh hmiakô liata bie â taih khiahta cha,

³² vârâh tawhta vaw nathlie la, châ chakaotuhpazy cha pachia la, thailei a châpa cha a hmotaopa a luh chô liata patlôsapa ta viarithô la, mosiapa cha thaipachâsa la, a siana yzie hawhta lymâ pie mah y.

³³ “Na phopi Izarei sawzy ta na chô liata ama moleipa vâta, chariah hmia liata nawh ha ei sala, nâ lâ a vaw heih heihpa ta, na moh a châhkheipa ta, he o liata thlahchhâpa ta ama cha hiah tita,

³⁴ vârâh tawhta vaw nathlie la, na phopi Izarei moleina cha a ngiahthai la, ama pathlatuhpazy na piepa râh lâ a chhi heih mah y.

³⁵ “Na phopi Izarei sawzy na chô liata ama moleina vâta, avâ khaw chi ta, avâ rai pasuasa leipa ta ama rie na pathei tita, he su lâ a heihpa ta thlahchhâ ei sala, na moh a châhkheipa ta, ama moleina amâ heihsai khiahta cha,

³⁶ vârâh tawhta vaw nathlie la, châ chakaotuhpa na phopi Izarei sawzy moleina cha a ngiahthai mah y. Lâpi dopa a chhih awpa ta âmo cha pachu la, ryuto châta na phopi na piepa râh liana he avâ pasuasa heih tyh mah y.

³⁷ “Chakâhna tlyma, potlana tlyma, chawhkaraina tlyma, hmyna tlyma, khawsu tlyma, chângyu tlyma râh liata vaw y sala, ama chariahpa ta ama khihpizy dôhpa ta, potlana nata pasana kheihawhpa rai vaw tlô sala,

³⁸ ama palôh pasana pahno chyupa ta, mopakha ta tlyma, Izarei zawpi ta tlyma, he o lâ he a heihpa ta ama ku pazawh ei sala, thlahchhâna nata hiana ama vaw tlôkhei khiahta cha,

³⁹ na pahrâna su vârâh liata vaw nathlie la, a ngiahthai mah y. Ama palôh na pahnopa nata ama hrozie lymâ hawhta, chyhsa to chô liata hria la tao mah y. Nâma, nâma deita he Âdâh pathla zydua palôh a pahnotuhpa châ tlôh chi ta.

⁴⁰ Chatanachata miah pathlatuhpazy na piepa râh liata ama pahrâ chhôh zydua ta ama cha chi lymâ aw.

⁴¹ “Cha hawhna hra chata, chihropa chyhsa, na phopi Izarei saw a châ leipa chhao na moh vâta râh hlapi tawhta â vy aw.

⁴² Na moh rônahpa nata na ku thatlôpa nata na bâh pazawhpa thâtih ama theipa vâta a vy aw ei ta, he o lâ a heihpa ta thlah ama chhâ tita,

⁴³ na pahrâna su vârâh liata vaw nathlie la, chihropa ta a cha hiapa cha taopa mah y. Chatanachata khizaw phopi zydua ta na moh pahno aw ei ta, Izarei sawzy ta eima cha chipa hawhta, âmo chhao ta cha chi aw ei ta, o ei sapa he na moh a phaohpa a châ tahpa ama pahno aw.

⁴⁴ “Na phopi ta ama chariah a dyuh awpa ta sie ei sala, kheihawhpa lâpi lâ tawhta na tuapa chhao ta, nâ tlyhpa khihpi nata na moh châta ei sapa o lâ he a heihpa ta Abeipa lâ thlah ama chhâ khiahta cha,

⁴⁵ ama thlahchhâna nata ama hiana cha vârâh liata vaw nathlie la, ama chhâh a châ mah y.

⁴⁶ “Chyhsa ahy hmah a molei beih leipa y veih ei. Na phopi chhao ta na chô liata ama molei tita, ama chô liata na pathi ia ta, chavâta ama chariahpa ku liata âmo cha pie chi ta, chariahpa râh lâhlapi lâta tlyma, lâhnia liata tlyma, sei ta a chhipa ta y ei sala,

⁴⁷ sei ta amâ chhina râh liata ama palôh zy ananopa ta, ro ei sala, âmo a patutuhpazy râh liana chata, ‘Hmo vaw parao ha pi ta, â do lei ngaitapa nata molei ngaitapa ta eima vaw tao haw,’ tahpa ta cha hiah ei sala,

⁴⁸ sei ta a chhituhpa ama chariahpazy râh liana chata, ama pathipalôh tlokhuh ta nata ama thlahpa tlokhuh ta ro ei sala, âmo pathlatuhpazy hnohta na piepa ama râh nata nâ tlyhpa khihpi nata na moh châta ei sapa o lâ he a heihpa ta, nâ lâta thlah ama chhâ khiahta cha,

⁴⁹ ama thlahchhâna nata ama hiana cha, na pahrâna su vârâh liata vaw nathlie la, ama chhâh a châ mah y.

⁵⁰ Na chô liata hmo a paraopa na phopi nata na chô liata hmo ama paraopa zydua cha a ngiahthai la, sei ta a chhituhpazy ta ama ngiachhie thei nawpa ta, sei ta a chhituhpazy liata ngiachhiena pahlaosa mah y.

⁵¹ Âmo cha nâma phopi nata na ryuto châ awpa ta, Izi râh, thua patisana hry tawhta nâ chhi papuapazy cha tlôh ei ta.

⁵² Châ chakaotuhpa nata na phopi Izarei hiana lâta na mo padeih la, ama cha padona maihta na nah vaw pachôh mah y.

⁵³ Hy Abeipa Zehôvâh y, miah pathlatuhpazy Izi râh tawhta nâ chhi papua nota châ chakaotuhpa Mawsi hnohta na vaw rei hapa hawhta, âmo cha na ryuto châta khizaw phopi zydua hry tawhta na pananopa ama châ hih,” tah ta.

⁵⁴ Sawlawmaw cha Abeipa lâta thlahchhâna nata hiana zydua a hnei khai nahta, Abeipa maisâh hmiakô liata pakhu paneihpa ta avâ lâ ku pazawhpa ta a yna tawhta thyu ta.

⁵⁵ A duah ta, Izarei zawpi a hmaohpakhypa zydua cha byhnâ awpa ta, ao paro ngaitapa ta,

⁵⁶ “A bietai zydua hawhta, a phopi Izarei sawzy apahâna a pietuhpa Abeipa cha reithaipa ta y mawh sy. A chakaotuhpa Mawsi hmâpa ta a bietai phapa zydua kha, a vaw tlô leipa bie miakha hmahta y vei.

⁵⁷ Miah pathlatuhpazy hnohta a ypa hawhna khata, Abeipa eima Khazohpa cha eima hnohta y sala, miah siesai leipa sala, miah pathlua khah sy.

⁵⁸ Chatanachata miah pathlatuhpazy bie a vaw pie hapa hawhta, a biepiepazy, a bieraopazy nata a ryureinazy zyh ta, a lâpi zydua a chhih awpa ta, eima palôh ano lâta a paheisa thei aw.

⁵⁹ He ei bie reipazy, Abeipa hmiakô liata hiana ei tlôkheipazy he, chhô nah zâ ta Abeipa eima Khazohpa lâta a hnia sala, noh chareih ta â ngiahna lymâ hawhta, a chakaotuhpa nata a phopi Izarei chhâh he a châh lymâ mawh sy.

⁶⁰ Chatanachata khizaw phopi zydua ta Abeipa deita he Khazohpa cha a châ, Khazoh hropa y veih ei, tahpa ama pahno aw.

⁶¹ Chavâta tanoh hawhna heta, Abeipa eima Khazohpa chô liata palôh phapakipa phaoh lymâ u la, a bieraopazy a chhihpa ta, a biepiepazy zyh lymâ muh vy,” tah ta.

⁶² Chatawhcha abei nata a hnohta a ypa Izarei saw zydua ta Abeipa hmiakô liata atheihna hlâ ei ta.

⁶³ Sawlawmaw ta Abeipa lâta aryhna hlâna châta viahchao tôhpa 22,000 nata mietaku 120,000 Abeipa lâ hlâ ta. Cha hawhna chata abei nata Izarei saw zydua ta Abeipa o cha hlâ ei ta.

⁶⁴ Cha noh lilaw liata, Abeipa o laihmia lâta dôhpachhôh tlyhmia liah chaipa cha, Bei Sawlawmaw ta Abeipa hmiakô liata pathaisa ta. Cha liata raopa hlâna, niepa hlâna nata aryhna hlâna thawzy hlâ ta. Abeipa hmiakô liata dawh maisâh cha raopa hlâna, niepa hlâna nata aryhna hlâna thaw hlâ nawpazy châta a chyh tu hapa vâta, dôhpachhôh tlyhmia liata hlâpa a châ.

⁶⁵ Cha daihti liata Sawlawmaw ta kyhchhi noh sari tao ta. Lebôhamâ tawhta Izi Chavah taihta Izarei saw zydua a ki khaipa ta, zawpi hluhpi Abeipa eima Khazohpa hmiakô liata tlôpakhy ei ta.

⁶⁶ A noh chariena noh ta zawpizy cha papaisa ta, abei cha byhnâ awpa ei ta, Abeipa ta a chakaotuhpa Dâvi nata a phopi Izarei chô liata phana a palâsapa zydua vâta, a ly ngaitapa nata palôh tlâh ngaitapa ta ama o chyu lâ amâ di haw.