1 ABEIZY 7 - Mara Bible RV (BSI)

Sawlawmaw ta abei o a sa

¹ Sawlawmaw ta ano o chhao sa ta, kô hrawh hleithôh a sa tawhta o cha palohpa a châ.

² “Lebanaw Tho O” tahpa ta moh bipa ta, Sawlawmaw ta abei o cha a sa. A doh lâ dy za kha seih ta, a hâ lâ dy sypangawh kawh ta, dy sythôh â sâh. Sidy otôh tlâh palih ta patlâhpa chô liata palaih nata pâkôzy sidy tho hmâpa a châ.

³ Tlâh kha liata otôh tôh hrawh hleipangawh lymâ ta bôpa ta, otôh tôh sypalih nata tôh pangawh chô liata o chhâh cha sidy tho ta khupa a châ.

⁴ A kâ lâta pâhchhôzy liata opyzy tlâh thôh ta patlâh ta, opyzy cha â dadypa ta taopa ama châ.

⁵ Ochhi nata opy zydua cha ki palih ta taopa châ ei ta, opyzy cha tlâh thôh ta patlâhpa ta, opy py kha nata py kha â dadypa ta taopa a châ.

⁶ Otôh hluhpi a hneipa aikah tao ta, a doh lâ dy sypangawh seih ta, a hâ lâ dy sythôh a kawh. Aikah hmia liata laitlâ y ta, cha hmia liata chôkhu a hneipa otôhzy a y.

⁷ Beidyuchhai Aikah tao ta, he he ryurei nawpa su a châpa vâta, Ryureina Aikah tahpa ta awpa a châ. Cha cha siphiah tawhta palaih taihta sidy tho ta khupa a châ.

⁸ Ryureina Aikah hnôhlâ dôhpachhôh tlyhmia chhâna lâ liata abei pahrâ nawpa o y ta, cha cha aikah nata a lyupa ta sapa a châ. Sawlawmaw ta a lapinô, Phiraoh sawchanô châta chhao, aikah nata â lyupa ta o a sapa hra.

⁹ He o zydua he alô pha ngaitapazy hmâpa ta sapa a châ. Alôzy cha â su thaipa ta khai pachie khai hapa châ ta, a hmia a hnôh ta thoâna ta pamihpa a châ. He hawhna heta o abôna tawhta a palaih taihta nata dôhpachhôh tlyhmia kawh ngaitapa zy tao khaipa a châ.

¹⁰ O abôna cha alô pha ngaitapa, alô laipapi, alô dy hrawhpazy, alô dy chariepazy ta paryhpa a châ.

¹¹ Cha chô lâ ta alô pha ngaitapa, â supa ta khai chiehpazy nata sidy thozy a y.

¹² Dôhpachhôh tlyhmia kawh ngaitapa cha, alô khaipa tho thôh nata sidy thophia tho kha ta â dôpa ta dôhpa châ ta, cha hawhna chata Abeipa o dôhpachhôh tlyhmia nata aikah chhao taopa a châ.

Achhyna o chhaichhizy

¹³ Bei Sawlawmaw ta chyhsa tuah ta, Tyre khihpi tawhta Hirâ a vaw chhi ei ta.

¹⁴ Hirâ cha Nâthalai chi nôhmei sawchapawpa châ ta, a paw cha Tyre khihpa, dawh a daih thaipa a châ. Sona nata novâhna ta a biepa chyhsa châ ta, dawh daina kyh liata kheihawhpa rai a tao thaipa, zôthai ngaitapa a châ. Hirâ cha Bei Sawlawmaw lâ a vy ta, a rai zydua a hriapa lymâ.

¹⁵ Hirâ ta Dawh tôh miano â khopa ta leih ta, he dawh tôhzy he â sâhna lâ dy hrawh hleicharie châ ta, dy hrawh hleino â hlôpa a châ. A karyhpa ta taopa châ ta, zô palih a chha.

¹⁶ Dawh tôhzy pawhmao liata pataoh awpa ta, dawh leihpa lubyuhpa miano, dy pangawh raihrie a sâhpa ta a tao.

¹⁷ Dawh tôh pawhmao liata lubyuhpa cha dawh sao ta khupa châ ta, dawh sao miakha cha dawh bâlia miasari ta chapaipa a châ. Lubyuhpa miakha châta dawh sao miakha lymâ a tao.

¹⁸ Dawh tôh pawhmao liata lubyuhpa khuna dawh sao padôpa ta, pawmikarânâ tlâh no ta paziah ta, lubyuhpa hropa châta chhao cha hawhta a tao.

¹⁹ Aikah liata otôhzy pawhmao liata lubyuhpazy cha lilipaw lyupa ta taopa châ ta, dy palih a sâhpa ta taopa a châ.

²⁰ Dawh tôh mianopazy pawhmao liata lubyuhpazy y ta, chazy cha dawh sao kiapâh liata â hlôpa ta taopa chô lâta taopa a châ. Cha lubyuhpazy liana cha pawmikarânâ nothlahpa za no raihrie sopa châ ta, lubyuhpa padôpa ta tlâh no ta taopa a châ.

²¹ Dawh tôhzy cha Achhyna o aikah liata bô ta. Chho lâ chhâh ta tôh kha bô ta, a moh Zaki bi ta, maw lâ chhâh ta tôh kha bô ta, a moh Bôaza a bi.

²² Dawh otôhzy pawhmao liata lubyuhpazy cha lilipaw lyupa ta taopa châ ta, cha hawhna chata otôh taona rai cha palohpa a châ.

Dawh tipâh

²³ Chatawhcha dawh tipâh ahlôpa lai ngaitapa tao ta. A chhôh dy hrawh tla ta, dy pangawh a sâh ta, dy sythôh ahlôpa a châ.

²⁴ Tipâh tlâh ry liata, dy kha liata titheih theih hrawh lymâ ta, tipâh a dôna taihta titheihzy pataohpa a châ. Titheihzy cha tlâh no ta paziahpa châ ta, tipâh nata leih pâpa a châ.

²⁵ Tipâh cha viahchao tôhpa pô hrawh hleino chô liata patyupa châ ta, pô thôh maw lâ a heih ta, pô thôh notla lâ a heih ta, pô thôh chho lâ a heih ta, pô thôh nochhi lâ â heih. Viahchao tôhpazy chô liana chata tipâh cha patyupa châ ta, a chhôh lâ ama chao ama chhy khai.

²⁶ Tipâh cha pazah tie chha ta, nyu tlâh hawhta a tlâh taopa châ ta, lilipaw lyupa ta taopa a châ. Tibyh 2,000 â tlôh.

²⁷ Patyuna miahrawh dawh ta tao ta. Patyuna cha a doh lâ dy palih seih ta, a hâ lâ dy palih kawh ta, dy thôh â sâh.

²⁸ He he patyuna taonazie a châ: dawhphiazy y ta, dawhphiazy cha a tlâhzy ta patusapa a châ.

²⁹ A tlâhzy ta patusapa dawhphiazy liana cha chakeibarôhneipazy, viahchao tôhpazy nata cherubi nothlahpazy a choh ta, chakeibarôhneipazy nata viahchao tôhpazy chô lâ nata ry lâ ta a tlâhzy liata pawpi nothlahpazy taopa a châ.

³⁰ Patyuna to ta dawh tiaki miapalih nata dawh lâhreizy hnei ta, a ki palihzy liata biebuh ahniehnazy y ta, ahniehnazy cha a kâ to liata pawpi nothlahpazy taopa ta leihpa a châ.

³¹ Patyuna chhôh liana cha biebuh so nawpa byh taopa châ ta, â hlôpa ta a paka taopa a châ. A chô lâ dy kha a chaluah ta, a ry lâ dy kha nata khophie â pamôh. A paka cha â ngia kawpa ta khiepa a châ. Patyuna dawhphiazy deikua cha ki palih a hnei, â hlô veih ei.

³² A tiaki miapalihzy cha dawhphiazy ry lâta y ta, tiaki ngaihzy cha patyuna nata a zaopa ta taopa a châ. Tiaki cha dy kha nata khophie â sâh.

³³ Patyuna tiakizy cha talailih tiaki hawhta taopa châ ta, a ngaihzy, a kiahzy, a patusana tlâhzy nata tiaki khaohzy cha leihpa sai a châ.

³⁴ Patyuna ki palih liata ahniehna miapalih y ta, cha ahniehnazy cha patyuna nata pazao khaipa a châ.

³⁵ Patyuna chô liata dawh ri â hlôpa, dy khophie a sâhpa y ta, cha cha patyuna tlâh nata dawhphiazy nata pazaopa ta leihpa a châ.

³⁶ Patyuna ahniehnazy nata dawhphiazy cha, a su ruapa maih liata cherubizy, chakeibarôhneipazy, thiahrâ kôzy nata pawpi nothlahpazy ta a pabie.

³⁷ Cha hawhna chata patyuna miahrawh cha tao ta, a zydua ta â khopa nata â lyupa ta leihpa a châ.

³⁸ Chatawhcha dawh biebuh miahrawh tao ta. Biebuh cha a chhôh dy palih a thupa châ ta, kachu sypalih â tlôh. Patyuna miahrawhzy châta biebuh miakha chyu taopa a châ.

³⁹ Chatawhcha patyunazy cha Achhyna o chho lâ liata miapangawh soh ta, Achhyna o maw lâta miapangawh soh hra ta, tipâh laipa cha chho nochhi lâ liata a patyu.

⁴⁰ Hirâ ta beihzy, buchâh linazy nata biebuhzy tao hra ta. Chatanachata Hirâ ta Abeipa o sana liata Bei Sawlawmaw châta a tao awpa zydua cha patlô ta.

⁴¹ Hezy he a tao: Dawh tôh miano, dawh tôh pawhmao liata dawh lubyuhpa miano nata dawh tôhzy pawhmao liata dawh lubyuhpazy khu nawpa ta dawh sao miano tao ta,

⁴² dawh tôhzy pawhmao liata dawh luh byuhpazy chô liata biebuhzy khuna dawh sao mianozy liata, tlâh no ta patlâh awpa pawmikarânâ nothlahpa 400 tao ta.

⁴³ Patyuna miahrawh nata patyuna chô liata so awpa biebuh miahrawh tao ta,

⁴⁴ tipâh miakha nata a ry liata viahchao tôhpa pô hrawh hleino a tao.

⁴⁵ Beihzy, buchâh linazy nata biebuhzy chhao a tao. Cha Abeipa o liata hmobaoh, Hirâ ta Bei Sawlawmaw châta a taopa zydua cha, dawh patliesapa ta taopa ama châ khai.

⁴⁶ Chazy cha abei ta Zawdâh bypi liata Sukô nata Zarethâ likawh beihlei su liata leih ta.

⁴⁷ Hmobaohzy cha hluh ngaita ta, khopathliah tiah awpa a châ leipa vâta, Sawlawmaw ta hmobaoh zydua cha khopathliah hlei vei. Chavâta dawh hmobaohzy amâ hrina ziepa cha pahnopa châ vei.

⁴⁸ Sawlawmaw ta Abeipa o hmobaoh zydua cha tao ta. Ngôh maisâh, ngôh ta taopa Ypâna viahchhâ tlâhkhai,

⁴⁹ Achhyna o chhôh supathaihpa hmiakô liata, chho lâ miapangawh nata maw lâ miapangawh ta sopa ngôh suapa meiôh tôhzy; ngôh pawpizy, ngôh meiôhzy, ngôh chaikiezy;

⁵⁰ ngôh suapa ta taopa nyuzy, meiôh lao chakienazy, biebuhzy, ropahâhpa beihkohzy nata mei lanazy a tao. Achhyna o chhôh chaipa, Su Pathaih Chaipa lâ angiana nata Achhyna ochhôh pipa lâ angiana ochhi patunazy chhao ngôh ta a tao khai.

⁵¹ Cha hawhna chata Bei Sawlawmaw ta Abeipa o châta a tao awpa zydua cha patlô ta. A paw Dâvi ta Abeipa lâ a vaw hlâ hapa tâkâzy, ngôhzy nata hmobaohzy cha Sawlawmaw ta a ngiakhei ta, Abeipa o liata sôh sopakhyna suzy liata soh khai ta.