1 ABEIZY 6 - Mara Bible RV (BSI)

Sawlawmaw ta Achhyna o a sa

¹ Izarei sawzy Izi râ tawhta ama kaw pua tawhta kô za palih nata sychariena kô, Izarei chô liata Sawlawmaw â beina kô palihna, Zivi thla, thla nona liata Abeipa o cha sa pathao ta.

² Bei Sawlawmaw ta Abeipa châta o a sapa cha a doh lâ dy sycharu châ ta, a hâ la dy kih châ ta, â sâhna lâ dy sythôh a châ.

³ Achhyna o hmia lâta aikah cha, o hâ nata pakhopa ta, a hâ lâ dy kih châ ta, a doh lâ dy hrawh a châ.

⁴ Achhyna o pâhchhô liata opy buahpazy pahy ta, opy tôhtlâhzy cha a vâhchapiapa ta a tao.

⁵ Achhyna o khôtho lâta pâhchhô nata a chhôh lâta pâhchhô zy padôpa ta, pâhchhôzy pasusapa ta, o cha a chhâh ta sa ta, chhôhpadâhpazy a tao.

⁶ A ry chai chhâh cha dy pangawh kawh ta, a liah chhâh dy charu kawh ta, a chhâh thôhna cha dy sari a kawh. Pâhchhô liata pâhchhô tlâhzy chahraoh byuh lei awpa ta, pâhchhô patusanazy khôtho liata a tao.

⁷ Alô chaona su liata khai chiehpa alôzy ta Achhyna o cha sapa a châ. Chatanachata o sa chhôh zydua ta, syulô pyu, ahrei pyu nata thua chhaichhi pyu kheihawhpa hmahta Achhyna o liata thei awpa y vei.

⁸ A ry chai chhâh chhikao cha Achhyna o chho lâchhâh ta y ta, cha tawhta a liah chhâh lâ kiana nata a liah chhâh tawhta chhâh thôhna lâ kiana kahmizy a y.

⁹ Cha hawhna chata Achhyna o cha sa ta, a paloh haw. Achhyna o pâkôzy châta sidy tho hmâh ta, a vâphuh chhao sidy thophia a dia.

¹⁰ Achhyna o padôpa ta, chhôhpadâhpa dy pangawh a sâhpazy tao ta, chazy cha sidy tho ta Achhyna o nata pazaopa a châ.

¹¹ Abeipa bie Sawlawmaw hnohta vaw tlô ta,

¹² “He Achhyna o na sa haipa kyh liata, ei bieraopazy a pyhpa ta, ei ryureinazy a ngiahpa ta, ei biepiepa zydua zyhpa ta nâ chhih khiahta cha, na paw Dâvi hnohta bie ei vaw taih hapazy kha nâma liata ei patlô aw.

¹³ Izarei sawzy hry liata pahrâ aw na ta, ei phopi Izarei he siesai aw va na,” tah ta.

¹⁴ Chatanachata Sawlawmaw ta Achhyna o cha sa ta, paloh ha ta.

¹⁵ O chhôh lâ pâhchhô cha sidy thophia ta patho ta. Siphiah tawhta a chô lâ vâphuh taihta a chhôh lâ cha tho bai khai ta, a siphiah châta meisah vyhpa thophia a phaw.

¹⁶ Achhyna o chhôh, o hnôh lâ daih liata Su Pathaih Chaipa tao ta, cha cha dy kih ta taopa a châ. Siphiah tawhta vâphuh taihta sidy thophia sai ta chhôhpa a châ.

¹⁷ Su Pathaih Chaipa hmia lâ daih liata Achhyna o chhôh cha a doh lâta dy sypalih a châ.

¹⁸ O chhôh lâta sidy thozy liata pawpi pabyuhpa nata paw pakaipa nothlahpazy khiepa châ ta, o chhôh zydua cha sidy tho ta khu khai ta, alô rai a lâ vei.

¹⁹ Abeipa Biehrai Byh so nawpa ta, Achhyna o chhôh chaipa liata supathaihpa tao ta.

²⁰ Cha supathaihpa cha a doh lâ dy kih, a hâ lâ dy kih, â sâhna lâ dy kih châ ta, ngôh suapa ta pahu khaipa a châ. Sidy maisâh chhao ngôh suapa ta a pahu hra.

²¹ Sawlawmaw ta Achhyna o chhôh cha ngôh suapa ta pahu khai ta, ngôh ta pahupa chhôhpadâhpa pathaihpa hmialâ liata ngôh bâliazy a parai.

²² Achhyna o chhôh lâ zydua cha ngôh ta pahu khai ta, Achhyna o chhôh supathaihpa liata maisâh chhao a pôhpalôhpa ta ngôh ta a pahu khai.

²³ Chhôhpadâhpa pathaihpa liana chata, dy hrawh raihrie a sâhpa ta cherubi miano ôli tho ta tao ta.

²⁴ Cherubi mathlaw miakha cha dy pangawh seih ta, cherubi mathlaw hiakha lâ chhao dy pangawh seih hra ta, a mathlaw miakha pawhmao tawhta mathlaw hiakha lâ pawhmao taihta dy hrawh a seih.

²⁵ Cherubi hropa chhao dy hrawh seih hra ta, cherubizy cha â khopa nata yzie a lyupa ta taopa a châ.

²⁶ Cherubi miakha cha â sâhna lâ dy hrawh châ ta, cherubi hropa chhao, cha tlu ta â sâh hra.

²⁷ Cherubizy cha Achhyna o chhôh chaipa liata soh ta. Cherubizy cha ama mathlaw pakai ei ta, miakhapa mathlaw ta pâhchhô hiakha lâ hria ta, ahropa mathlaw ta pâhchhô hiakha lâ hria hra ta, ama mathlawzy cha Achhyna o liah khophie liata amâ tyh.

²⁸ Cherubizy chhao cha ngôh ta a pahu hra ei.

²⁹ Achhyna o pâhchhô zydua padôpa ta, a chhôh lâ chhao, khôtho lâ chhao, cherubizy, thiahrâ kôzy nata pawpi pakaipa nothlahpazy khiepa ta tobi ta.

³⁰ Achhyna o siphiah chhao a chhôh lâ nata khôtho lâ ngôh ta a pahu khai.

³¹ Chhôhpadâhpa pathaihpa lâ angiana châta, a tôhtlâh miapangawh a hneipa ochhizy cha ôli tho ta tao ta.

³² Cha ôli tho ochhi mianopazy cha cherubizy, thiahrâ kôzy nata pawpi pakaipa nothlahpazy khiepa ta tao ta, chazy cha ngôh ta pahu ta, cherubizy nata thiahrâ kôzy cha ngôh ta a thia ei.

³³ Cha hawh pyly ta, Achhyna o chhôh pipa lâ angiana ochhi chhao, ôli tho ta a tôhtlâh miapalih hneipa ta a tao.

³⁴ Meisah vyhpa tho ochhi miano tao ta, ochhi miakha liata thophia miano cha thlâhkadi theipa châ ta, ochhi hropa liata phia no chhao thlâhkadi theipa a châ hra.

³⁵ Chazy chô liata cherubizy, thiahrâ kôzy nata pawpi pakaipa nothlahpazy khie ta, â tlâkhâh kawpa ta ngôh ta pahu khaipa a châ.

³⁶ Achhyna o dôhpachhôh tlyhmia cha alô khaipa tho thôh nata sidy tho tlâh kha ta pathopa ta a tao.

³⁷ Kô palihna, Zivi thla liata, Abeipa o sa awpa ta lôbô bôpa châ ta,

³⁸ kô hrawh hleikhana, Buli thla, thla chariena liata, Achhyna o cha a zydua ta, patohpatianazie hawh tlai ta paloh khaipa a châ. Kô sari tlai a sa.