1 ABEIZY 5 - Mara Bible RV (BSI)

Achhyna o sa awpa achhuanohna

¹ Sawlawmaw cha a paw su a thla awpa ta sathaw ama thu haw tahpa Tyre bei Hirâ ta a thei nahta, a chakaotuhpazy Sawlawmaw lâ tuah ta. Hirâ he Dâvi a pasô kawpa a châ.

² Sawlawmaw ta Hirâ cha bieta ta, a hnohta,

³ “Ei paw Dâvi kha a chariahpazy ta chadô ei ta, amâ dyuh ngâ thlâh hapa vâta, Abeipa ta a chariahpazy cha a pheipazah ry liata a so hlâlei kha cha, Abeipa a Khazohpa châta o sapa thei vei tahpa na pahno.

⁴ Tahmâ deikua cha Abeipa ei Khazohpa ta su to liata thlalôhna eina pie haw. Khakhaipazy y khao leipa ei ta, vâchhiena chhao y khao vei.

⁵ Abeipa ta ei paw Dâvi hnohta, ‘Na sawchapawpa, nâma châ thla awpa ta na beidyuchhai liata ei patyusapa ta ei moh châta o cha a sa aw,’ tahpa ta a vaw rei hapa hawhta, tahmâ Abeipa ei Khazohpa moh châta o sa awpa ei chhuah.

⁶ Chavâta Lebanaw sidy thozy na thlupa awpa ta biepie mah y. Nâ chakaotuhpazy chhao châ chakaotuhpazy hry liata a vaw hlao aw ei ta, châ chakaotuhpazy hlao cha na reipa hawhta ei cha pie aw. Sidaw mo hawhta tho a thlu thaipa eima hry liata y veih ei tahpa na pahno,” tah ta.

⁷ Hirâ cha Sawlawmaw biezy a thei nahta, a ly ngaita ta, “He phopi rônahpa chô liata ryurei awpa ta sawchapaw sopa Dâvi hnohta a piepa Abeipa cha tanoh reithaipa ta y mawh sy!” tah ta.

⁸ Hirâ ta Sawlawmaw lâ chyhsa tuah ta, a hnohta, “Bie eina tapa chi kha vaw thei na ta, sidy tho kyh liata nata meisah vyhpa tho kyh liata, na khopa maih ei vaw tao lymâ aw.

⁹ Nâ chakaotuhpazy ta Lebanaw tawhta tilaipi taihta za phaoh aw ei ta, apâ hawhta chahrysa aw ei na ta, a su na raopa lâ tlôkhei awpa ta tilaipi liata ei za pasiesa aw. A su a za tlô nahta pathlâsa aw ei na ta, nâ vaw la aw. Nâ chhao ta ei chhôhkhazy niedo a tôhpa ta ei khopa na tao hra aw,” tah ta.

¹⁰ Chatanachata Hirâ ta Sawlawmaw cha a khopa zie ta sidy tho nata meisah vyhpa tho zy pie ta.

¹¹ Sawlawmaw ta Hirâ chhôhkhazy nie awpa ta sâh kachu 20,000 nata sathaw chariehpa kachu 20,000 a pie. Cha hawhna chata Sawlawmaw ta Hirâ cha kô chareih ta a pie lymâ.

¹² Abeipa ta bie â taihpa hawh tlai ta, Sawlawmaw cha sona ta tobi ta. Hirâ nata Sawlawmaw cha ama likah liata biehrai tao ei ta, a dyryh ngaitapa ta ama y lymâ.

¹³ Bei Sawlawmaw ta Izarei zydua hry tawhta raihriatuhpa py padua ta, ama zydua ta 30,000 ama châ.

¹⁴ Âmo cha Lebanaw lâ tuah ta, thy kha thy kha ta, a thla thla ta amâ thla lymâ. Lebanaw liata thla kha y ei ta, o liata thla no ama y tyh. Adônirâ cha raihriatuhpazy hyutuhpa a châ.

¹⁵ Sawlawmaw ta hmo a phaohpa 70,000 nata alô a khaipa 80,000 tlâh râh liata a hnei.

¹⁶ Sawlawmaw ta raihria vaituhpa 3,300 hnei ta, âmo he rai mohôhtuhpa nata hriatuhpazy vaituhpa ama châ.

¹⁷ Alô khaipazy ta o abôna paryh awpa ta, abei biepiepa ta alô lai ngaitapa nata alô mâ ru ngaitapazy ama khai lymâ.

¹⁸ Sawlawmaw chyhsa zôthaipazy, Hirâ chyhsa zôthaipazy nata Kebâli mozy ta alô khai ei ta, o sa nawpa tho nata lô zy ama pachhuahpanoh.