1 ABEIZY 4 - Mara Bible RV (BSI)

Sawlawmaw beimachâzy

¹ Bei Sawlawmaw cha Izarei zydua bei ta y ta,

² hezy he a beimachâzy ama châ: Zadô sawchapawpa Azariah cha theihthaipa châ ta,

³ Sisâ sawchapaw Elihôre nata Ahiza cha chârohtuhpazy châ ei ta, Ahilu sawchapawpa Zehôsaphâ cha thâtih rohtuhpa a châ.

⁴ Zehôdâ sawchapawpa Benai cha pheisaih hyutuhpa châ ta, Zadô nata Abiathâ cha theihthaipazy ama châ.

⁵ Nâthâ sawchapawpa Azariah cha bia a vaotuhpazy hyutuhpa châ ta, Nâthâ sawchapawpa Zabu cha theihthaipa nata abei viasa châna a pakaoh.

⁶ Ahisâ cha abei o liata hyutuhpa châ ta, Abadâ sawchapawpa Adônirâ cha raihriapazy hyutuhpa a châ.

⁷ Sawlawmaw ta Izarei zydua chô liata hyutuhpa pahrawh hleino hnei ta, âmo cha abei nata a chhôhkhazy châta niedo a pachâtuhpazy ama châ. Hyutuhpa pakha ta kô kha ta thla kha châ lymâ ta niedo amâ tôh aw.

⁸ Hezy he ama mohzy a châ: Epharai tlâh râh a vaotuhpa cha Behu a châ.

⁹ Bedeke ta Mâkazi, Sâbi, Beseme nata Elôbehanâ khihzy a vao ta,

¹⁰ Behese ta Arubô, Sôkô nata Hepha râh zydua â vao.

¹¹ Bebinadâ ta Daw râh tlâh sâhpa zydua â vao. Ano he Sawlawmaw sawchanônô Tâpha lapinô ta a hneipa a châ.

¹² Ahilu sawchapawpa Bânâ ta Tânâ, Mekidô nata Zezari nohdi Zarethâ khihpi kiapâh liata a ypa Besia kao zydua nata Besia tawhta Abemehôlâ taih a vao ta, Zôkamia râhri taihta â vao.

¹³ Bekebe ta Ramôkilia bia â vao. Ano heta Kilia râh liata a ypa Manase sawchapawpa Zairâ khihzy a vao ta, Bâsanâ liata a ypa, Kilia râh liata a ypazy to pâ ta, Bâsanâ râh liata Akaw bia liata thokhy nata dawh chhikao lâhrei a hneipa khihpi rônahpa sycharu â vao ei.

¹⁴ Idô sawchapawpa Ahinadâ ta Mâhanai khihpi a vao ta,

¹⁵ Ahimazi ta Nâthalai râh â vao. Ano he Sawlawmaw sawchanô Bâsemâ lapinô ta a hneipa a châ.

¹⁶ Husai sawchapawpa Bânâ ta Asera râh nata Belô khih a vao ta,

¹⁷ Pârua sawchapawpa Zehôsaphâ ta Iskâra râh a vao ta,

¹⁸ Elâ sawchapawpa Simei ta Benzami râh â vao.

¹⁹ Uri sawchapawpa Kebe ta Kilia râh, Amawri bei Sihaw râh nata Bâsanâ bei Ôkâ râh zy â vao. Cha râh liata ryureituhpa hropa pakha a y hra.

Sawlawmaw sona nata hneirôna

²⁰ Zudâh nata Izarei cha tilaipi ngiahkâ sadi zie tlai ta hluh ei ta. Niepa ta doh ei ta, thapha ngaitapa ta y tyh ei ta.

²¹ Sawlawmaw cha Ufrâti tawhta Philistinâ râh nata Izi râhri taihta râh zydua chô liata ryureih ta. Ano lâ râhpawzy pie ei ta, a hro chhôh zydua ta Sawlawmaw cha ama chakao lymâ.

²² Sawlawmaw abei o liata noh kha ta ama niepa cha viahdie dipa kachu hmo sythôh nata viahdie hrâhpa kachu hmo sycharu,

²³ viahchao tôhpa pathawhpa po hrawh, sibiepa pabâsapa viahchao pô kih nata mietaku za kha châ ta, he thota zuneihpazy, sakhihzy, sasuzy, awh thawhpazy â hlao.

²⁴ Ufrâti notla lâ râh zydua, Tiphasa tawhta Kâza taihta Ufrâti notla lâ râh bei zydua chô liata ryureih ta, a chheipâh râh zydua nata a dyryh ngaitapa ta a y lymâ.

²⁵ Sawlawmaw hro chhôh zydua ta Zudâh nata Izarei cha, Dânâ tawhta Besebâ taihta, chyhsa to ama kre zôh ry liata nata ama theiku kô ry liata thlalôh ngaitapa ta ama y.

²⁶ Sawlawmaw cha a talailih a daophipa arâzy pasyna o 40,000 hnei ta, arâ pheisaih 12,000 a hnei .

²⁷ Hyutuhpa pahrawh hleinopazy heta âmo topa thla chyu liata, Bei Sawlawmaw châta nata Bei Sawlawmaw tlâhkhai liata a dôhtuhpa zydua châta niedo ama pie tyh. Khâpa hmah paphahlasa veih ei.

²⁸ Ama tao awpa raopa chyu hawhta, hyutuhpa zydua ta arâzy nata arâ chahrapazy châta bâli sâh nata sawphaozy â ngiahna su lâ ama pie lymâ.

²⁹ Khazohpa ta Sawlawmaw cha sona nata novâhna thata pie ta, tilaipi ngiahkâ liata sadi zie hawh tlai ta palôh kawhna a pie.

³⁰ Chatanachata Sawlawmaw sona cha nochhi râh lâta chyhsa zydua sona nata Izi sona zydua a khô haw.

³¹ Chyhsa zydua hlâta so via ta, Ezrâ pathla Ethâ hlâta so via ta, Mâhô sawchapawpa Hemâ, Kâkaw nata Dâdâ zy hlâ chhao ta so via ta, a chheipâh râh zydua hry liata a mo thata a pathâh.

³² Bieso 3,000 reih ta, hla 1,005 a phi.

³³ Tho thâtih zy reih ta, Lebanaw liata sidy tho tawhta pâhchhô liata a pyuhpa hisaw thâtih taihta a reihpa a châ. Râhsa thâtih, pavaw thâtih, alyhpasa thâtih nata nga thâtih zy chhao a reih theipa a châ.

³⁴ Chatanachata Sawlawmaw sona nathlie awpa ta, râh to tawhta chyhsazy a vy ei ta, a sona thâtih a theipa, lei bei zydua chhao ta ama vaw ngai lymâ.