1 ABEIZY 3 - Mara Bible RV (BSI)

Sona châta Sawlawmaw thlahchhâna

¹ Sawlawmaw cha Izi bei Phiraoh nata azaona tao ta. Phiraoh sawchanô lapinô ta hnei ta. Ano o nata Abeipa o a sa khai hlâta nata Zerusale thokhy a dôh khai hlâlei cha Dâvi khihpi liata paysa chy ta.

² Abeipa moh châta o sapa a y mâh leipa vâta, Izarei phopi cha su sâhpazy liata atheihna hlâ tyh ei ta.

³ Sawlawmaw cha Abeipa kyhpachâpa ta, a paw Dâvi bieraopazy zyh ta. Atheihna nata hmohlâpazy deikua cha su sâhpazy liata a tao tyh.

⁴ Abei cha atheihna hlâ awpa ta Kibiô lâ sie ta. Cha cha su sâhpa kawh kawpa châ ta, cha maisâh chô liana cha Sawlawmaw ta raopa hlâna sâh kha a vaw hlâ tyhpa a châ.

⁵ Kibiô liana chata Abeipa cha Sawlawmaw hnohta zâ ta a mâ lâta a vaw luah ta. Khazohpa ta, “Hiah teh, khâpa ei cha pie aw,” tah ta.

⁶ Sawlawmaw ta, “Châ chakaotuhpa ei paw Dâvi kha na hmiakô liata ngâchhihna, siana nata palôh dopa phaopa ta a y tyhpa vâta, a chô liata ngiachhiena thata na palâsa. Cha ngiachhiena rônah ngaitapa cha a chô liata palâsa pazao chi ta, a beidyuchhai liata a tyuh awpa sawchapawpa chhao tanoh na pie haw.

⁷ Hy Abeipa ei Khazohpa y, châ chakaotuhpa he ei paw Dâvi su liata bei ta eina tao chi hih. Kei la hawtipa dei châ na ta, yzia dâh nata bierei kahthlâ chhao pahno thai va na.

⁸ Châ chakaotuhpa he nâ ta nâ tlyhpa na phopi, phopi rônahpa, zasâh manôh reih tiah leipa nata paki tiah leipazy hry liata ei y.

⁹ Chavâta châ chakaotuhpa he, na phopi chô liata ryu ei rei thei nawpa ta sona na pie mah y. Chatanachata a chhiepa nata a phapa ei pahrua thei aw. He tlu ta a hluhpa na phopi chô liana he ahy ma ryu a reih thei aw?” tah ta.

¹⁰ Sawlawmaw hmo hiapa chata Abeipa cha palysa ngaita ta.

¹¹ Khazohpa ta a hnohta, “Hro pasina hiah leipa chi ta, hneirôna hiah hra leipa chi ta, na chariahpazy thina chhao hia leipa chi ta, hmo dopa pahno thei nawpa novâhna tlao na hiapa vâta,

¹² pachâ teh, na bie hawhta tahmâ ei tao haw. Sona nata novâhna ei cha pie. Nâ hawhpa he, nâ na y hlâta y beih leipa ei ta, nâma khai tawhta chhao, nâ hawhpa he pua khao aw veih ei.

¹³ Na hia leipa hneirôna nata zachhihna chhao ei cha pie aw. Chatanachata na hro chhôh zydua ta, nâ hawhpa bei rai pua aw veih ei.

¹⁴ Na paw Dâvi ta ei lâpizy â chhihpa hawhta, nâ chhao ta ei lâpizy a chhihpa ta, ei bieraopazy nata ei biepiepazy na zyh khiahta cha, na hro ei pasisa aw,” tah ta.

¹⁵ Sawlawmaw cha a vaw hra ta, a mâ vaw châ ta. Chatawhcha Zerusale lâ vawh ta, Abeipa Biehrai Byh hmiakô liata a duah ta, raopa hlânazy nata aryhna hlânazy hlâ ta, a chakaotuhpa zydua châta kyhchhi a taopa ei.

Sawlawmaw sona

¹⁶ Noh kha cha chanô âzuahpa pano abei lâ a vy ei ta, a hmiakô liata a duah ei ta.

¹⁷ Chanô pakha ta, “Hy ei zibeipa y, he chanô nah heta o miakha liata pahrâ pi ta, o liata a y nota saw sa na ta.

¹⁸ Saw ei sa tawhta noh thôh a châ nahta, he chanô chhao he saw sa hra ta. Keimo dei ta y pi ta, o liata keimo hnohta a ypa chyhsa hropa y leipa ei ta, keimo pano dei ta o liata eima y.

¹⁹ He chanô heta zâ ta a saw a hnieh ta, a saw cha thi ha ta.

²⁰ Zâcho ta thyu ta, châ chakaotuhnô he ei mô chhôh ta, ei kiapâh liata ei sawcha­pawpa cha la ta, a chachôhna liata paziasa ta, a saw thipa cha keima chachôhna liata a vaw pazia.

²¹ A mylâ my ta ei saw sâhpi pazysa awpa ta thyu na ta, châhrasala thiruapa vaw châ thlâh ha ta. My ta ei vaw mo pasia nahta cha, keima sapa ei sawchapawpa kha vaw châ leipa ta,” tah ta.

²² Chanô hropa ta, “Châ vei, ahrohpa he keima sawchapawpa châ ta, athipa he nâma sawchapawpa a châ,” tah ta. Hmiatuapa khata, “Châ vei, athipa he nâma sawchapawpa châ ta, ahrohpa he keima sawchapawpa a châ,” tah heih ta. Cha hawhna chata abei hmiakô liata reih raihrie ei ta.

²³ Abei ta, “Pakha ta, ‘Ahrohpa he keima sawchapawpa châ ta, athipa he nâma sawchapawpa a châ,’ tah ta, ahropa ta, ‘Châ vei; athipa he nâma sawchapawpa châ ta, ahrohpa he keima sawchapawpa a châ,’ tah ha hra tlôh ta.

²⁴ Zaozi na vaw pie teh u,” tah ta. Zaozi cha abei hmiakô lâ vaw cheih ei ta.

²⁵ Abei ta, “Hawti a hrohpa kha bo no ta tai u la, â khophie pakha pie u la, â khophie ahropa pie teh u,” tah ta.

²⁶ A sawchapaw a hrohpa nô cha, a sawchapawpa a ngiachhie ngaitapa vâta, abei hnohta, “Hy ei zibeipa y, hawti a hrohpa he ano pie thlâh ha mah y. Hawti he rie thie khah y,” tah ta. Pakhanô deikua ta, “Keima eih châ leipa sala, nâma eih chhao châ hlei hra khah sa. Tai pachhô thlâh ha teh u,” tah ta.

²⁷ Chatawhcha abei ta a chhy ta, “Hawti a hrohpa kha a hmiatuapa chanô kha pie teh u, hawti kha thie khah u, ano tlai kha a nô cha a châ,” tah ta.

²⁸ Izarei saw zydua ta abei ta bietluna a taozie cha thei ei ta, ryureina dopa siekhei nawpa ta Khazohpa sona a chô liata a ypa ama hmôpa vâta, abei cha chi ngaita ei ta.