1 ABEIZY 22 - Mara Bible RV (BSI)

Ahabâ nata hrohso pakheipazy

¹ Kô thôh chhôh cha Aramia nata Izarei a dyuh leipa ta y ei ta.

² Châhrasala a kô thôhna kô liata, Zudâh bei Zehôsaphâ cha Izarei bei lâta zu ta.

³ Izarei bei ta a chakaotuhpazy hnohta, “Ramôkilia khihpi he keimo eih a châ tahpa pahno thlâh ha tlôhpa ta, khâpa vâta ma Aramia bei ku tawhta chhu leipa ta a chalihsai thlâh hapa ma eima châ tly?” tah ta.

⁴ Zehôsaphâ hnohta, “Ramôkilia khihpi he einâ vaw dyuhkhei khoh aw chi ma?” tah ta. Zehôsaphâ ta Izarei bei hnohta, “Nâ nata kei cha miakhapa châ pi ta, ei phopi nata na phopi chhao miakhapa châ ei ta, keima arâzy nata nâma arâzy chhao miakhapa mah ama châ tâh,” tah ta.

⁵ Zehôsaphâ ta Izarei bei hnohta, “Abeipa bie a saohiah ha tua mah y,” tah ta.

⁶ Izarei bei ta hrohsopa za palih rachhôh awpakhy ta, ama hnohta, “Ramôkilia khihpi a dyuh awpa ta ei sie aw ma, ei chalih aw?” tah ta. Âmo ta, “A kaw dyuh teh, Abeipa ta Ramôkilia khihpi cha abei ku liata a pie aw,” tah ei ta,

⁷ Châhrasala Zehôsaphâ ta, “He liana heta Abeipa hrohsopa hropa pakha chhâ eimâ saohiah via awpa y khao veih ei ma?” tah ta.

⁸ Izarei bei ta Zehôsaphâ hnohta, “Abeipa miah a saohiahpa awpa chyhsa pakha cha y ta, ano cha Imlâ sawchapawpa Mikai a châ. Châhrasala ano la ei hao kaw, keima kyh a phana lâta hrohsona bie reih beih vei, a chhiena lâ sai ta a reih tyhpa a châ,” tah ta. Zehôsaphâ ta, “Abei ta cha hawhta tah khah sy,” tah ta.

⁹ Izarei bei ta beimachâ pakha aw ta, a hnohta, “Imlâ sawchapawpa Mikai kha kei aw para teh,” tah ta.

¹⁰ Izarei bei nata Zudâh bei Zehôsaphâ cha Samâri thokhy chhikao kiapâh sawhri liata abei poh a bupa ta, ama beidyuchhai chyu liata a tyuh ei ta. Hrohsopa zydua ta ama hmiakô liata hrohsona bie phuah ei ta.

¹¹ Kenânâ sawchapawpa Zedekia ta thua kizy a tao ta, abei hnohta, “Abeipa ta hetana heta a tah, ‘Hezy hmâpa heta Aramia mo cha ama leidia khaina taihta na daih aw ei,’” tah ta.

¹² Hrohsopa hropa zydua chhao ta, “Ramôkilia lâ cha khy la kaw pahnie teh, Abeipa ta Ramôkilia cha abei ku liata a pie aw,” tahpa ta hrohsona bie phuah hra ei ta.

Mikai ta Ahabâ zikyu â râ

¹³ Mikai aw awpa ta lyuhchâpa ama tuapa ta Mikai hnohta, “Pachâ teh, hrohsopazy ta reih kha tlapa ta abei khozie ta bie reih khai ei ta, nâma bie chhao âmo bie nata palyupa ta, abei khozie ta kei reih hra mah y,” tah ta.

¹⁴ Châhrasala Mikai ta, “Abeipa hrona reipa ta ei reih, Abeipa ta ei hnohta a reipa deita ei reih aw,” tah ta.

¹⁵ Abei kô a tlô nahta, abei ta a hnohta, “Mikai, Ramôkilia a dyuh aw­pa ta eima sie aw ma, ei chalih aw?” tah ta. Mikai ta, “Khy la kaw pahnie teh. Abeipa ta Ramôkilia cha abei ku liata a pie aw,” tah ta.

¹⁶ Abei ta a hnohta, “Abeipa moh ta biehmeiseihpa reipa dei leipa ta cha, ei hnohta khâpa bie hmah rei lei awpa ta ei khazie ma bie ei cha pataihsa aw?” tah ta.

¹⁷ Mikai ta, “Izarei zydua cha vaituhpa a hnei leipa mietakuzy hawhta, tlâhzy liata viavipa ta ama ypa hmô na ta, Abeipa ta, ‘He sahlaozy he hyutuhpa hnei khao veih ei, chyhsa to ama o chyu lâta thlalôhpa ta a di mawh ei sy,’ a tah,” tah ta.

¹⁸ Izarei bei ta Zehôsaphâ hnohta, “Keima kyh liata la a phana lâta hrohsona bie reih awh vei, a chhiena lâ sai na a châ aw tahpa cha chho va na ma kha?” tah ta.

¹⁹ Mikai ta, “Chavâta Abeipa bie he nathlie teh: Abeipa cha a beidyuchhai liata â tyupa hmô na ta, vâmo zydua ta a chavei chachâh ta a kiapâh liata amâ duapa ei hmô.

²⁰ Abeipa ta, ‘Ahabâ cha Ramôkilia lâ pakhysa ta, cha liata pao awpa ta ahy ma a reipasao aw?’ tah ta. Pakha ta hmo miakha reih ta, ahropa ta hmo hropa reih ta.

²¹ Chatawhcha thlahpa pakha vaw pua ta, Abeipa hmiakô liata a duah ta, ‘Kei ta ei reipasao aw,’ tah ta.

²² Abeipa ta a hnohta, ‘Khâpa ta maw?’ tah ta. Ano ta, ‘Vawh aw na ta, a hrohsopa zydua pakah liata thlahpa haih thaipa ei kei châ aw,’ tah ta. Abeipa ta, ‘Kei reipasao aw chi ta, na pahnie aw. Vawh la, cha hawhna chata kei tao teh,’ tah ta.

²³ Chavâta tahmâ he pachâ tua, Abeipa ta na hrohsopa zydua pakah liata thlahpa haih thaipa soh ta, Abeipa ta na rao nawpa kyh a phuah haw,” tah ta.

²⁴ Cha khaipa nahta, Kenânâ sawchapawpa Zedekia ta a vaw hnia ta, Mikai baih liata vaw chabaih ta, a hnohta, “Kheihta ma Abeipa Thlahpa cha kei tawhta puapa ta, na hnohta bie a reih thai aw?” tah ta.

²⁵ Mikai ta, “Pachâ teh, chhôhpadâhpa chhôh chaipa liata a nyu awpa ta nâ ngia noh ta na pahno aw,” tah ta.

²⁶ Izarei bei ta, “Mikai he patu u la, khihpi ryureituhpa Amawna nata bei sawchapawpa Zôasâ lâ a chhi pakhua u la,

²⁷ ama hnohta, ‘Abei ta hetana heta a tah: “Thlalôhpa ta ei vaw kua heih hlâlei cha, he chyhsa he patâhna o liata khô u la, viahchhâ chyhta nata ti chyhta dei nama pie aw,” a tah,’ tahpa ta nama chho aw,” tah ta.

²⁸ Mikai ta, “Thlalôhpa ta na vaw kua heih khiahta cha, Abeipa ta keima hmâpa ta bie a rei leipa a châ aw,” tah ta. Mikai ta, “Nâmo, phopi zydua saih u, nathlie teh u!” tah ta.

Ahabâ nawhna nata thina

²⁹ Chatanachata Izarei bei nata Zudâh bei Zehôsaphâ cha Ramôkilia khihpi lâ khy ei ta.

³⁰ Izarei bei ta Zehôsaphâ hnohta, “Chysia nanopa a tobipa ta ei lânazie panano aw na ta, adyuhna lâ ei sie hra aw. Nâ deikua abei poh a bu mah y,” tah ta. Chatanachata Izarei bei cha â lânazie panano ta, adyuhna lâ cha sie ta.

³¹ Aramia bei ta a talailih pheisaih hyutuhpa sythôh nata panozy hnohta, “Mochyhpa tlyma, molaipa tlyma a dyuh tlâ leipa u la, Izarei bei deita a dyuh muh vy,” tahpa ta biepie ta.

³² Talailih pheisaih hyutuhpazy ta Zehôsaphâ ama hmô nahta, “Izarei bei a châ huh,” tah ei ta. Ano cha a heihnaopa ta a dyuh ei ta. Zehôsaphâ cha thata awh ta.

³³ Talailih pheisaih hyutuhpazy ta Izarei bei châ vei tahpa ama pahno nahta, Zehôsaphâ ama chadaipa cha kuasai ha ei ta.

³⁴ Châhrasala chyhsa pakha ta â chhuahpa vâta châ leipa ta, a libaw a kei ta a ka chakhyhna liata, Izarei bei cha a chariah chhaichhi nata a chachôhna vyhphao likawh liata kei ka ta. Izarei bei ta a talailih haohtuhpa hnohta, “A lie la, adyuhna tawhna heta na puakhei teh, hmah ei phaoh haw,” tah ta.

³⁵ Cha noh ta adyuhna cha ru via lymâ ta. Abei cha a talailih liata deichaka ei ta, Aramia mo lâ a heihpa ta paduasa ei ta, a hmah thisaih cha talailih siphiah liata thata loh ta, zâlâ ta thi ha ta.

³⁶ Noh tla chy ta pheisaihzy lâta, “Chyhsa to âmo khih chyu lâta sie ei sala, chyhsa to âmo râh chyu lâta sie mawh ei sy!” tahpa ta awh ei ta.

³⁷ Chatanachata abei cha thi ha ta, Samâri lâ a ri phaoh ei ta, Samâri liata ama pabu haw.

³⁸ Talailih cha Samâri tipo kiah liata pasi ei ta, Abeipa bie ta a vaw rei hapa hawhta, izy ta a thi palie ei ta, âzuahnôzy ta a chhôh liata ama ngai amâ si.

³⁹ Ahabâ thâtih hropazy, a hmotaopa zydua, sianaoh o a sapa nata khihpi a paduapa zydua kyh cha Izarei beizy thâtih rona châbu liata ropa a châ.

⁴⁰ Ahabâ cha a pathlatuhpazy hnohta a mô ta, a sawchapawpa Ahazia ta ano su liata â bei.

Zudâh bei Zehôsaphâ

⁴¹ Izarei bei Ahabâ kô palih â bei kô ta, Âsâ sawchapawpa Zehôsaphâ cha Zudâh chô liata a bei pathao ta.

⁴² Zehôsaphâ cha â bei pathao nota kô sythôh nata kô pangawh châ ta, Zerusale liata kô kih nata kô pangawh â bei. A nô moh cha Azubâ châ ta, Sihi sawchanô a châ.

⁴³ A paw Âsâ lâpi a chhihpa zydua a chhih hra ta. Lâpi tleisai cheita leipa ta, Abeipa mohmô liata hmo dopa tao ta. Su sâhpazy deikua cha paraopa châ leipa ta, Izarei phopi ta su sâhpazy liata atheihnazy hlâ ei ta, ropahâhpazy ama rao thlâh ha chy.

⁴⁴ Zehôsaphâ cha Izarei bei nata chhao adyhna tao ta.

⁴⁵ Zehôsaphâ thâtih hropazy, a thatlôna a palâsana kyh nata chariah â dyuhna kyhzy cha, Zudâh beizy thâtih rona châbu liata ropa a châ.

⁴⁶ A paw Âsâ a hro nota achhyna su liata chapaw âzuahpazy cha, râh tawhta a pamua khai ha ei.

⁴⁷ Edômâ râh liata bei y leipa ta, bei vyuhpa ta a ypa ta ryureih ta.

⁴⁸ Zehôsaphâ ta ngôh a vaw phaoh awpa ta Ôphi lâ a sie awpa Tâsi balyh py padua ta, châhrasala balyhzy cha Eziôkebe liata a rao khai hapa vâta sie thei leipa ei ta.

⁴⁹ Ahabâ sawchapawpa Ahazia ta Zehôsaphâ hnohta. “Keima nâ chakaotuhpazy he nâma châ chakaotuhpazy nata balyhzy liata hmaohkha ta sie ei sy,” tah ta. Châhrasala Zehôsaphâ ta paryhsa vei.

⁵⁰ Zehôsaphâ cha a pathlatuhpazy hnohta a mô ta, a pathlatuhpazy hnohta a mapaw Dâvi khihpi liata pabu ei ta. A sawchapawpa Zehôrâ ta ano su liata â bei.

Izarei bei Ahazia

⁵¹ Zudâh bei Zehôsaphâ kô hrawh hleisari â bei kô ta, Ahabâ sawchapawpa Ahazia cha Samâri liata Izarei chô liata a bei pathao ta, Izarei chô liata kô no â bei.

⁵² Abeipa mohmô liata moleina hmo tao ta, a paw lâpi a chhihpazy, a nô lâpi a chhihpazy nata Izarei a pamoleisapa Nebâ sawchapawpa Zerôbaw lâpi a chhihpazy a chhih hra ta.

⁵³ A paw taopa maih tao hra ta, Bâlâ chakaopa ta, a chhy ta, chavâta Abeipa, Izarei Khazohpa cha a hie pahâh ha ta.