1 ABEIZY 21 - Mara Bible RV (BSI)

Ahabâ ta Nâbô kre sadô a chhu

¹ Cha hnôhlâ ta hetana heta vaw châ ta. Zezari chyhsa Nâbô ta kre sadô hnei ta, a kre sadô cha Samâri bei Ahabâ o kiapâh liata a ypa a châ.

² Ahabâ ta Nâbô hnohta, “Na kre sadô he ei o kiapâh liata a ypa a châpa vâta, âhnalasi taona sadô châta keima na pie teh, a vyuhpa ta kre sadô pha viapa ei cha pie aw. Na khoh via khiahta cha, a tâkâ lâta â phuhpa hawhta a mâ ei cha pie aw,” tah ta.

³ Châhrasala Nâbô ta Ahabâ hnohta, “Nâ pathlatuhpazy ryu ei cha pie awpa cha Abeipa ta pasaih khah sy,” tah ha ta.

⁴ Zezari chyhsa Nâbô ta cha hawhpa bie a hnohta a reipa vâna chata, Ahabâ cha pachâchhie ngaitapa nata palôh châ lei ngaitapa ta a o la a di ta. Nâbô ta, “Nâ pathlatuhpazy ryu cha pie thei aw va na,” khâchâ tah ha tlôh ta. Chatanachata a rakhô liata a zia ta, hiakha lâ a heih ta, pati rai nie khoh khao leipa ta.

⁵ A lapinô Zezebel ta ano lâ vawh ta, a hnohta, “Khazia na thlahpa cha cha tlatlu ta a pachârôh ta, pati chhao na nie thei khao vei?” tah ta.

⁶ Ahabâ ta Zezebel hnohta, “Zezari chyhsa Nâbô hnohta, ‘Na kre sadô he na chaleisa teh. Na khoh via khiahta cha, kre sadô hropa ei cha pie aw,’ tah na ta, ano ta, ‘Ei kre sadô he cha pie aw va na,’ tahpa ta einâ chhy hapa vâta a châ,” tah ta.

⁷ A lapinô Zezebel ta a hnohta, “Izarei bei châ va chi ma? Thyu la pati nie la, palôh thaphapa ta y mah y. Zezari chyhsa Nâbô kre sadô cha keima ta ei cha pie aw,” tah ta.

⁸ Chatanachata Ahabâ moh ta châ roh ta, Ahabâ châ chahnaona ta chahnao ta, cha cha Nâbô yna khihpi liata a pahrâlâhpa machâzy nata chhituhpazy lâ paphao ta.

⁹ Châzy liana chata, “Kâhvilei daihti phuah u la, zawpi hry liata Nâbô cha chaluahpa ta dyuchhai peimawhpa liata nama patyusa aw.

¹⁰ Ano dady ta chyhsa dyutlai leipa pano patyusa aw ei chi ta, ‘Khazohpa nata abei chô liata chhie na sa’, tahpa ta ama vaw leih aw. Chatawhcha puakhei aw ei chi ta, alô ta nama vawhsao aw,” tah ta.

¹¹ Nâbô pahrâna khihpi chyhsazy, khihpi liata a pahrâpa machâzy nata chhituhpazy ta Zezebel ta âmo lâ bie a paphaopa hawhta tao ei ta. Âmo lâta châ a paphaopa liata ropa hawhta,

¹² kâhvileipa daihti phuah ei ta, zawpi hry liata Nâbô cha chaluahpa ta dyuchhai peimawhpa liata patyusa ei ta.

¹³ Ano dady ta chyhsa dyutlai leipa pano a vaw tyuh ei ta. Dyutlai leipa pano ta zawpi hmiakô liata Nâbô cha vaw leih ei ta, “Nâbô heta Khazohpa nata abei chô liata chhie a sa,” tah ei ta. Chatanachata khihpi khôtho lâ puakhei ei ta, alô ta vawh ei ta, thi ha ta.

¹⁴ Zezebel hnohta chyhsa tuah ei ta, “Nâbô cha alô ta vawpa châ ta, a thi haw,” tahpa ta kei pachhosa ei ta.

¹⁵ Zezebel ta Nâbô cha alô ta vawh ei ta, a thi haw, tahpa a theipata nahta, Ahabâ hnohta, “Thyu la, Zezari chyhsa Nâbô ta a kre sadô chalei awpa a cha pasai leipa kha kei hnei teh. Nâbô cha hroh khao vei, a thi haw,” tah ta.

¹⁶ Nâbô a thi haw tahpa a theipata nahta, Ahabâ cha thyu ta, Zezari chyhsa Nâbô kre sadô lâ cha zu ta, sadô cha hnei ha ta.

Abeipa ta Ahabâ thailei a pachâ

¹⁷ Abeipa bie cha Tisabi chyhsa Elaizâh hnohta vaw tlô ta,

¹⁸ “Thyu la, Samâri liata a ypa Izarei bei Ahabâ a tyh aw­pa ta zu teh. Nâbô kre sadô liata a y no a châ. Cha sadô cha hnei awpa ta a zu.

¹⁹ A hnohta, ‘Abeipa ta hetana heta a tah: “Thie chi ta, na hnei pâ ha aw ma?” a tah,’ tah ta. Chatawhcha a hnohta, ‘Abeipa ta hetana heta a tah: “Izy ta Nâbô thisaih ama paliena su liana tlai heta nâma thisai chhao izy ta ama palie aw,” a tah,’” tah ta.

²⁰ Ahabâ ta Elaizâh hnohta, “Eina vaw hmô ha chi ma, nâ ei khakhaipa?” tah ta. Elaizâh ta a chhy ta, “Abeipa mohmô liata hmo pha leipa tao awpa ta nâmasasyh ta nâ zua hapa vâta, ei cha hmô ha heih hih.

²¹ Pachâ teh, na chô liata chhiena vaw patlôsa aw na ta, na hneirôna zydua ei pahlei khai aw. Na pathla zydua pamua aw na ta, Izarei liata Ahabâ pathla chapaw zydua, sei chhao, khotalaipa chhao, ei chhawh pathlah khai ha aw ei.

²² Ei hie eina pahâhpa vâ chi ta nata Izarei na pamoleisapa vâta, na pathlazy cha Nebâ sawchapawpa Zerôbaw pathlazy hawhta tao aw na ta, Ahiza sawchapawpa Bâsâ pathlazy hawhta ei tao aw.

²³ Zezabi kyh liata chhao Abeipa ta, ‘Izy ta Zezebel cha Zezari thokhy chhôh liata ama chaih aw,’ tah ta.

²⁴ Khihpi liata a thipa Ahabâ chhôhkha maih cha izy ta chaih aw ei ta, lyurâhpa liata a thipa a chhôhkha maih cha avâ pavawzy ta ama dyh aw,” tah ta.

²⁵ A lapinô Zezebel pasyupalipa ta Abeipa mohmô liata hmo pha leipa tao awpa ta âzuahpa Ahabâ hawhpa he ahy hmah y veih ei.

²⁶ Abeipa ta Izarei sawzy hmiakô liata a papuapa Amawri mo hmotaopa to hawhta tao ta, khazoh nothlahpazy a chhypa ta hmo pasichhih ngaitapazy a tao tyh.

²⁷ Ahabâ ta cha biezy cha a thei nahta, a chysiazy hrie ta, a sasaihpa ta latho poh a bu ta, kâhvileipa ta y ta, latho poh liata a zia ta, a thachhâ kaw ta.

²⁸ Tisabi chyhsa Elaizâh hnohta Abeipa bie vaw tlô ta, a hnohta,

²⁹ “Ahabâ ta ei hmiakô liata â panawhzie kha na hmô ma? Ei hmiakô liata â panawhpa vâta, ano chhâ liana heta la chhiena patlôsa aw va na. A sawchapawpa chhâ liata deikua cha a pathlazy chô liata chhiena ei patlôsa aw,” tah ta.