1 ABEIZY 20 - Mara Bible RV (BSI)

Ahabâ nata Aramia adyuhna

¹ Aramia bei Benhadâ cha a pheisaih zydua pakhy ta. Abei sythôh nata pano ta ano chhâh a châ ei ta, arâzy nata talailihzy chhao hnei ta. Samâri lâ khy ta, dôh ta, a dyuh ta.

² Izarei bei Ahabâ lâta khihpi chhôh lâ lyuhchâpazy tuah ta, Ahabâ hnohta, “Benhadâ ta hetana heta a tah:

³ ‘Na tâkâ nata na ngôhzy kha kei eih châ ei ta, na lapinô pha chaipazy nata na sawzy chhao kei eih ama châ,’ a tah,” tah ei ta.

⁴ Izarei bei ta a vaw chhy ta, “Hy ei zibeipa abei y, na reipa hawhta, kei he nâma eih châ na ta, ei hneipa zydua nâma eih a châ,” tah ta.

⁵ Lyuhchâpazy cha vawh heih ei ta, Ahabâ hnohta, “Benhadâ ta hetana heta a tah: ‘Na tâkâ nata na ngôh zy, na lapinôzy nata na sawzy eina hlâ awpa chi a châ,’ tahpa ta, nâ lâta lyuhchâpazy ei vaw tuah tarawpa ta,

⁶ mylâ tahmâ ti heta nâ chakaotuhpazy nâ lâ vaw tuah aw na ta, nâma o nata châ chakaotuhpazy o vaw hrao aw ei ta, nâ lyna a châpa hmo zydua la aw ei ta, ama siekhei khai aw a tah,” tahpa ta chho ei ta.

⁷ Izarei bei cha a râh liata machâ zydua aw ta, ama hnohta, “Ngia teh u, he chyhsa he hmo pha lei ngaitapa tao â chhuahpa a châ hih. Kei lâta lyuhchâpazy vaw tuah ta, ei lapinôzy, ei sawzy, ei tâkâzy, ei ngôhzy a vaw haw ta, ei paeipa chhao châ vei,” tah ta.

⁸ Machâ zydua nata zawpi zydua ta a hnohta, “Nathlie khoh kha, paryhsa hra kha,” tah ei ta.

⁹ Chatawhcha Benhadâ lyuhchâpazy hnohta Ahabâ ta, “Ei zibeipa abei cha kei chho u la, ‘Châ chakaotuhpa tawhta nâ haw tuapa zydua kha ei tao aw, he hmo deikua he tao thei va na, a tah na,’ kei tah muh vy,” tah ta. Lyuhchâpazy cha sie ei ta, cha bie cha kei tlôkhei heih ei ta.

¹⁰ Benhadâ ta Ahabâ lâ lyuhchâpa tuah heih ta, a hnohta, “Nâ pazituhpa zydua heta Samâri khih buchadoh a rai ei sala, pazah kha chyu chhao ama to awpa a y khao leina taihta ei tao vei khiahta cha, khazohzy ta ei chô liata tao ei sala, cha hlâta pasa viapa chhao ta tao mawh ei sy,” tah ta.

¹¹ Izarei bei ta a chhy ta, “Benhadâ hnohta, ‘Chariah chhaichhi a tobi thlâh hapa cha, chariah chhaichhi a pahluh hapa hlâta â palai via beih vei,’ tahpa ta kei chho teh u,” tah ta.

¹² Cha bie cha Benhadâ ta abeizy nata byureih liata sahma a do ngâ nota thei ta, a chyhsazy hnohta, “A dyuh awpa ta a pachyh teh u,” tah ta. Khihpi a dyuh awpa ta a pachyh ei ta.

Ahabâ ta Benhadâ a pahnie

¹³ Hrohsopa pakha ta Izarei bei Ahabâ cha a kei hnia ta, a hnohta, “Abeipa ta hetana heta a tah: ‘He zawpi hluh ngaitapazy he na hmô ma? Moh teh, âmo he tanoh na ku liata ei cha pie aw. Chatanachata kei he Abeipa ei châ tahpa na pahno aw,’” tah ta.

¹⁴ Ahabâ ta, “Ahy ma chariah cha a pahnie aw?” tah ta. Hrohsopa ta, “Abeipa ta hetana heta a tah: ‘Bia ryureituhpazy a chakaotuhpa sahlaozy ta ama pahnie aw,’” tah ta. Ahabâ ta, “Ahy ma adyuhna a pathao aw?” tah ta. Hrohsopa ta, “Nâ ta na pathao aw,” tah ta.

¹⁵ Chatanachata Ahabâ cha bia ryureituhpazy a chakaotuhpa sahlaozy cha pakhy ta, ama zydua ta maluh 232 ama châ. Âmo khai tawhta Izarei saw zydua tawhta pheisaihzy pakhy ta, ama zydua ta 7,000 ama châ.

¹⁶ Nohchhô locho nota pua ei ta. Benhadâ nata ano a baotuhpa bei sythôh nata pano zy cha byureih liata parina taihta sahma vaw doh ngâ kaw ei ta.

¹⁷ Bia ryureituhpazy a chakaotuhpa sahlaozy pua tua ei ta. Benhadâ ta chyhsa tuah ta, âmo ta, “Samâri khihpi tawhta pheisaihzy ama vaw pua,” tahpa ta Benhadâ cha chho ei ta.

¹⁸ Benhadâ ta, “A dyh awpa ta a vaw puapa ama châ khiahta cha, a hrohpa ta patu u la, a dyuh awpa ta a vaw puapa ama châpa chhao ta, a hrohpa ta patu pyly muh vy,” tah ta.

¹⁹ Bia ryureituhpazy a chakaotuhpa sahlaozy nata âmo a pazipa pheisaihzy cha khihpi tawhta pua ei ta.

²⁰ Amâ supa chyu thie ei ta. Aramia mo cha a râpai ha ei ta. Izarei mo ta âmo cha a chadai ei ta, Aramia bei Benhadâ cha arâ kiah ta, arâ pheisaihzy chhao ta a râ ha ta.

²¹ Izarei bei cha kei pua ta, arâ nata talailihzy cha chhawh ta, Aramia mo cha thata thie ta.

²² Hrohsopa ta Izarei bei cha a kei hnia ta, a hnohta, “Na tha a patlô rili la, na taozie awpa pachâ mah y. Hâhkô châhvâ a vaw chhi tita, Aramia bei he a cha za siehnao heih aw,” tah ta.

²³ Aramia bei chakaotuhpazy ta a hnohta, “Ama khazohzy he tlâh khazohzy châ ei ta, chavâta keimo hlâta ama tha a tlô viapa a châ. Bypi liata a dyuh ei sih la, âmo hlâta eima tha a tlô via cheingei aw.

²⁴ Chavâta he hawhta tao mah y: beizy he ama yna tawhta pasie khai la, âmo su liata pheisaih hyutuhpazy soh aw chi ta,

²⁵ na pahlei hapa pheisaih zie kha ta pheisaih padua heih la, arâ vyuhpa ta arâ, talailih vyuhpa ta talailih na padua heih aw. Chatanachata bypi liata a dyuh aw pi ta, âmo hlâta eima tha a tlô via cheingei aw,” tah ei ta. Ama bie cha a pyh ta, cha hawhna chata tao ta.

Ahabâ ta Benhadâ a pahnie heih

²⁶ A kô heihpa châhvâ daihti liata, Benhadâ cha Aramia pheisaihzy pakhy ta, Izarei a dyuh awpa ta Aphe khih lâ khy ta.

²⁷ Izarei sawzy cha a pahmaohpakhy ei ta, ama nie awpazy a phaopa ta, Aramia mo a dyuh awpa ta pua ei ta. Izarei sawzy cha mie hri chyhpa hri no lyupa ta Aramia mo hmiakô liata riehmo paryh ei ta. Aramia mo deikua cha a râh dua ta bie thlâh ha ei ta.

²⁸ Khazohpa chyhsa ta Izarei bei cha a kei hnia ta, bie a chho ta, a hnohta, “Abeipa ta hetana heta a tah: ‘Aramia mo ta, “Abeipa cha tlâhzy khazoh châ ta, saikaozy khazoh châ vei,” tah ei ta, chavâta he zawpi hluh ngaitapazy he na ku liata cha pie aw na ta, kei he Abeipa cha ei châ tahpa nama pahno aw,’” tah ta.

²⁹ Noh sari chhôh cha â riaaipa ta ama riehmo chyu liata y ei ta. A noh sarina noh ta a dyuh pathao ei ta. Izarei sawzy ta Aramia alei pheisaih 100,000 tlai noh kha chhôh ta thie ei ta.

³⁰ Ahrohpazy cha Aphe khih chhôh lâ a râ ei ta, amâ râsaipa pheisaih 27,000 cha thokhy ta cho thlu ha ei ta. Benhadâ chhao a râ ta, khihpi chhôh liata chhôhpadâhpa chhôh chaipa liata a ngia ta.

³¹ A chakaotuhpazy ta a hnohta, “Tahmâ pachâ teh, Izarei pathla beizy cha chyhsa a ngiachhie thei ngaitapa bei ama châ tahpa eima thei. Latho poh a saipa ta, eima luh chaori ta buhpa ta Izarei bei lâ pua ei suh u. Na hrona a cha pahlôh thlâh ha ngyu aw,” tah ei ta.

³² Chatanachata latho poh a saipa ta, ama luh chaori ta a buhpa ta, Izarei bei lâ cha vawh ei ta, a hnohta, “Châ chakaotuhpa Benhadâ ta, ‘Ngiachhiepa ta na pahlôh mawh sy,’ a cha tah,” tah ei ta. Ahabâ ta, “A hroh thlâh ha chy ma? Ano cha ei unawhpa mah a châ tâh,” tah ta.

³³ Chyhsazy chata hmo yzie a phapa ta ngia ei ta, a palôh hmeiseihpa a reipa a châ aw tahpa pangiasapa ta, “A châ na, ano cha na unawhpa Benhadâ na a châ,” thlai tah ei ta. Ahabâ ta, “Vawh u la, Benhadâ cha a vaw chhi muh vy,” tah ta. Benhadâ cha ano lâ vaw pua ta, Ahabâ ta ano talailih liata pakiasa ta.

³⁴ Benhadâ ta a hnohta. “Ei paw ta na paw tawhta khihpi a vaw la hapazy kha cha pie pakhua heih aw na ta, ei paw ta Samâri liata sohdaohna su a taopa hawhna khata, Dâmaskâ liata sôdaohna su na tao hra aw,” tah ta. Ahabâ ta, “Cha biehrai cha tao sih la ei cha pasiesa aw,” tah ta. Chatanachata a hnohta bie hraih ta, pasiesa ha ta.

Benhadâ pasiesapa thaileichâna

³⁵ Hrohsopazy sawchapawpa hry liata pakha ta, Abeipa biepiepa hawhta a viasapa hnohta, “Ngiachhiepa ta na vaw phy tua,” tah ta. Châhrasala cha chyhsa chata phy khoh leipa ta.

³⁶ A hnohta, “Abeipa ao na zyh leipa vâta, keima tawhta na siepata nahta, chakeibarôhneipa ta a cha tai aw,” tah ta. Ano tawhta a siepata nahta, chakeibarôhneipa ta a vaw tyh ta, tai ha ta.

³⁷ Chyhsa hropa kei hmô heih ta, a hnohta, “Ngiachhiepa ta na vaw phy tua,” tah ta. Cha chyhsa chata vaw phy ta, hmah paphao ha ta.

³⁸ Hrohsopa cha sie ta, lâpi liata abei cha a vaw byh ta, chyhsa ta ama pahno lei nawpa ta a khiriena ta a mo khu ha ta.

³⁹ Abei a vaw tlô nahta, abei cha awsao ta, a hnohta, “Châ chakaotuhpa he adyuhna rupa su lâ vawh na ta, chyhsa pakha a vaw heih ta, kei lâta chyhsa pakha a vaw chhi ta, ei hnohta, ‘He chyhsa he vaw vaih mah y, a lei khiahta cha, ano hrona vyuhpa ta nâma hrona lapa a châ aw, a châ vei khiahta cha, tâkâ talent miakha na pie awpa a châ,’ na tah ta.

⁴⁰ Châ chakaotuhpa he helâ haolâ ta ei rai â tymâ kawpa vâta, ano cha a vaw sie syulyu haw,” tah ta. Izarei bei ta a hnohta, “Cha hawhna chata na chô liata pachiapa a châ aw, nâma tlai ta biechhâna na tao ha cha zaw,” tah ta.

⁴¹ A mo â khuna cha thlai la ta, hrohsopa pakha a châ tahpa Izarei bei ta pahno ha ta.

⁴² Hrohsopa ta abei hnohta, “Abeipa ta hetana heta a tah: ‘Pahleipadia awpa ta ei raopa chyhsa na ku tawhta na papua hapa vâta, ano hrona vyuhpa ta nâma hrona, ano phopi vyuhpa ta nâma phopi na pahlei aw,’ a tah,” tah ta.

⁴³ Izarei bei cha pachâchhie ngaita­pa nata palôh châ lei ngaitapa ta Samâri lâ sie ta, a o lâ a di ha ta.