1 ABEIZY 2 - Mara Bible RV (BSI)

Dâvi ta Sawlawmaw a pachu

¹ Dâvi cha a thi nawpa daihti a hnia ha ta. A sawchapawpa Sawlawmaw cha biepie ta, a hnohta,

² “Khizaw ryhpa hawhta, kei chhao ei sie nawpa daihti â hnia haw. Thatlôpa ta y la, chapawsaw kawpa ta y mah y.

³ Na hmotaopa maih nata nâ heina lâ maihta thlaochhipa ta na y lymâ thei nawpa ta, Mawsi Ryhpa liata ropa hawhta, Abeipa na Khazohpa ta bie a cha piepazy a pyh la, a lâpizy a chhih la, a bieraopazy, a biepiepazy, a ryhpazy nata a pahnokheinazy zyh mah y.

⁴ Chatanachata Abeipa ta keima kyh liata, ‘Na pathlazy ta ama lâpi pakhâta ta pachâ ei sala, ama pathipalôh tlokhuh ta nata ama thlahpa tlokhuh ta ei hmiakô liata ngâchhihpa ta ama y khiahta cha, Izarei beidyuchhai liata a tyuh awpa chie aw veih ei,’ tahpa ta a reipa kha a pa-i aw.

⁵ “Zeru sawchapawpa Zôabâ ta ei chô liata a hmotaopa kha na pahno: Izarei pheisaihzy hyutuhpa pano, Nerâ sawchapawpa Abane nata Zethe sawchapawpa Amâsâ zy chô liata a hmotaopa kha na pahno. Âmo kha thie ta, adyuhna liata thisaih palopa cha adyhna daihti liata phuh la ta, thaileina a hnei leipa thisaih cha a chai liata chaisaih nata a phei liata pheikyzy liata a kia hapa kha a châ.

⁶ Chavâta na sona hmâh la, pha na tahzie hawhta tao mah y, a luh pawhpa cha thlalôhpa ta Athihkhih lâ pasiesa khah y.

⁷ Kilia chyhsa Bâzilai sawchapawzy chô liata deikua cha ngiachhiena palâsa la, âmo cha na tlâhkhai liata pati a dôhtuhpa hry liata pahlao hra mah y. Na unawhpa Absalaw tawhta ei râ nona khata, âmo cha thapasa ngaitapa ta keima lâ a vypazy ama châ.

⁸ Bahuri khihpa Benzami pathla Kerâ sawchapawpa Simei chhao na hnohta y ta, ano cha Mâhanai lâ ei sie noh ta chhiesana pha lei ngaitapa ta chhie nâ sapatuhpa a châ. Na dy awpa ta Zawdâh lâ â zu nota, ‘Zaozi ta cha thie aw va na,’ tahpa ta Abeipa moh ta bie a taih na ta.

⁹ Châhrasala ano cha thaileina a hnei leipa hawhta na pachâ awpa châ vei. Chyhsa sopa châ chi ta, a chô liata na tao awpa na pahno aw. A luh pawhpa cha thisaih chhaota Athihkhih lâ na pasiesa awpa a châ,” tah ta.

Dâvi thina

¹⁰ Dâvi cha a pathlatuhpazy hnohta a mô ta, Dâvi khihpi liata pabu ha ei ta.

¹¹ Izarei chô liata Dâvi â beina kô zydua cha kô sypalih a châ. Hebraw liata kô sari a bei ta, Zerusale liata kô sythôh nata kô thôh â bei.

¹² Chatanachata Sawlawmaw cha a paw Dâvi beidyuchhai liata a tyuh ta, â khinarâh chhao liahsa pa-ipa a châ.

Sawlawmaw abeina

¹³ Haki sawchapawpa Adôniza cha Sawlawmaw nô Bâsebâ lâ vawh ta. Bâsebâ ta, “Phana kyh lâta a vypa na châ ma?” tah ta. Adôniza ta, “Phana kyh a châ,” tah ta.

¹⁴ Adôniza ta, “Na hnohta bie rei awpa ei hnei,” tah ta. Bâsebâ ta, “Reih teh,” tah ta.

¹⁵ Adôniza ta, “Abeinarâh he keima eih châ ta, Izarei zydua chhao ta kei he bei châ awpa ta ama hnabeiseihpa ei châpa na pahno. Châhrasala khinarâh cha Abeipa ta ei unawhpa châta a rao hapa vaw châ palie ta, chavâta ei unawhpa eih a châ hapa he a châ.

¹⁶ Tahmâ he hmo miakha cha hia awpa hnei na ta, rie na ei khah y,” tah ta. Bâsebâ ta, “Reih teh,” tah ta.

¹⁷ Adôniza ta, “Sunâ zuah Abisâ he ei lapinô châta na pie awpa ta, ngiachhiepa ta Bei Sawlawmaw na chhopa mah y, nâma bie cha paryhsa leipa ta y aw vei,” tah ta.

¹⁸ Bâsebâ ta, “A pha na, abei cha ei cha chhopa aw,” tah ta.

¹⁹ Bâsebâ cha Adôniza hmo hiapa chhopa awpa ta Bei Sawlawmaw lâ vawh ta. Abei cha kaw thyu ta, a nô cha a vaw ly ta, a hmiakô liata a bôh ta. A beidyuchhai liata a tyuh heih ta, abei nô châta dyuchhai palasa ta, Bâsebâ cha abei chachâh lâta a tyuh ta.

²⁰ Bâsebâ ta, “Hmo chynawh kawpa miakha cha hia awpa hnei na ta, paryhsa leipa ta y khah y,” tah ta. Abei ta a hnohta, “Hiah mah y, ei nô, paryhsa leipa ta y aw va na,” tah ta.

²¹ Bâsebâ ta, “Sunâ zuah Abisâ he na unawhpa Adôni­zah pie la, a lapinô ta pahneisa mah y,” tah ta.

²² Bei Sawlawmaw ta a nô cha a chhy ta, a hnohta, “Kheihtazie ta ma Sunâ zuah Abisâ cha Adôniza châta na vaw hia thlâh haw? Adôniza cha bei pachâsa awpa ta hiapa lâlao châh chi, ano cha ei uhta a châpa he! Theihthaipa Abiathâ nata Zeru sawchapawpa Zôabâ zy chhao ano chhâh a châhpa ama châpa kha,” tah ta.

²³ Bei Sawlawmaw cha Abeipa moh ta bie a taih ta, “He bie vâna heta Adôniza hrona he pahleipa a châ leipa khiahta cha, Khazohpa ta ei chô liata tao sala, cha hlâta pasa viapa chhao ta tao mawh sy!

²⁴ A bietai hawhta na padua ta, ei paw Dâvi beidyuchhai liata na patyusa ta, phopi ta nâ paduatuhpa Abeipa hrona reipa ta ei reih. Adôniza he tanoh tlai heta thie awpa a châ,” tah ta.

²⁵ Bei Sawlawmaw ta Zehôdâ sawchapawpa Benai tuah ta, ano ta Adôniza cha chhawh ta, thi ha ta.

²⁶ Abei ta theihthaipa Abiathâ hnoh­ta, “Anathô khih liata na o lâ a di teh. A thi tlâh châ chi ta, châhrasala ei paw Dâvi hmiakô liata Abeipa Zehôvâh Byh a sy tyhpa na châpa vâta nata ei paw rietheitaona zydua liata a vaw taokhei tyhpa na châpa vâta, tahmâ la cha thie mâh aw va na,” tah ta.

²⁷ Sawlawmaw ta Abiathâ cha Abeipa theihthaipa a châna pabâh ta, chatanachata Abeipa ta Eli chhôhkha kyh Silô liata a reipa kha a vaw tlôpa a châ.

²⁸ Cha thâtihzy cha Zôabâ ta a vaw thei nahta, Abeipa poh o lâ a râ ta, maisâh kizy kei patu ta. Zôabâ heta Absalaw kha cha a chhâh â châh lei tarawpa ta, Adôniza chhâh deikua cha a châh ta.

²⁹ Bei Sawlawmaw hnohta, “Zôabâ cha Abeipa poh o lâ a râ ta, maisâh thaby liata a y thlâh ha,” tahpa ta chho ei ta. Sawlawmaw ta Zehôdâ sawchapawpa Benai tuah ta, a hnohta, “Khy la, kaw thie teh,” tah ta.

³⁰ Benai cha Abeipa poh o lâ khy ta, Zôabâ hnohta, “Abei ta bie a cha pie, kaw pua teh,” tah ta. Zôabâ ta, “Kaw pua aw va na, he liata tlâ ei thi aw,” tah ta. Benai cha abei lâ vawh ta, a hnohta, “Zôabâ ta hetana heta tah ta, hetana heta einâ chhy,” tah ta.

³¹ Abei ta a hnohta, “A reipa hawhna chata kaw tao la, thie la, pabu mah y. Chatanachata a chhâpa y leipa ta Zôabâ ta thisaih a palona tawhna khata, kei nata ei paw chhôhkha na pathaisapa a châ aw.

³² Ano hlâta chyhsa sia viapa nata pha viapa pano, Nerâ sawchapawpa Izarei pheisaih hyutuhpa Abane nata Zethe sawchapaw­pa Zudâh pheisaih hyutuhpa Amâsâ zy kha, ei paw Dâvi pahno leipa ta thyuhnao ta, zaozi ta a thiepa vâ ei ta, thisaih a palona maoh cha Abeipa ta ano luh chô liata a vaw palie thlu aw.

³³ Ama thisaih maoh cha Zôabâ luh chô liata nata a pathlazy luh chô liata chhâzaw ta a lie thlu aw ta, Dâvi nata a pathlazy chô liata nata a o nata a beidyuchhai chô liata deikua cha, Abeipa tawhta thlalôhna tlyzaw ta a y thlâh ha aw,” tah ta.

³⁴ Chatanachata Zehôdâ saw­chapawpa Benai cha khy ta, Zôabâ cha chhawh ta, thie ta, râhchawhpa liata a o liata ama pabu haw.

³⁵ Abei ta Zehôdâ sawchapawpa Benai cha, Zôabâ vyuhpa ta pheisaih hyutuhpa ta soh ta, abei ta Zadô cha Abiathâ vyuhpa ta theihthaipa ta a tao.

³⁶ Abei ta Simei kei paawsa ta, a hnohta, “Zerusale liana heta o a sa la, cha liata pahrâ mah y. Cha tawhtapa cha khataih lâ hmahta na pua awpa châ vei.

³⁷ Na pua noh, Kidaraw chavah na chaka noh cha, na thi noh a châ aw tahpa pahno mah y. Na thisaih cha nâma luh chô liata a y aw,” tah ta.

³⁸ Simei ta abei hnohta, “Na reipa cha a pha na, ei zibeipa abei reipa hawh tlai ta, châ chakaotuhpa heta a tao lymâ aw,” tah ta. Simei cha Zerusale liata noh hluhpi y ta.

³⁹ Kô thôh a tloh nahta, Simei seizy hry liata pano cha Mâkâ sawchapawpa Kâthâ bei Akisâ lâ a râ ha ei ta. Simei hnohta, “Na seizy cha Kâthâ liata ama y,” tahpa ta chho ei ta.

⁴⁰ Simei cha thyu ta, alâ ky padia ta, a seizy tlua awpa ta Kâthâ bei Akisâ lâ cha sie ta. Simei cha sie ta, a seizy cha Kâthâ tawhta a vaw liekhei ta.

⁴¹ Simei cha Zerusale tawhta Kâthâ lâ sie ta, â vaw lie haw, tahpa ta Sawlawmaw cha chho ei ta.

⁴² Abei ta chyhsa tuah ta, Simei cha kei paawsa ta, a hnohta, “‘Na pua noh, khataih su lâ rai na siena noh cha na thina noh a châ aw tahpa a siapa ta pahno mah y,’ tahpa ta Abeipa moh ta bie cha pataihsa na ta, zikyu liahsa châ râ ha va na ma? Nâ chhao ta ei hnohta, ‘Na reipa a pha na, ei zyh aw’ na tah mâh tâh.

⁴³ Khazia Abeipa lâta bie nâ taihpa nata kei ta biepiepa ei cha piepa na patlô vei?” tah ta.

⁴⁴ Abei ta Simei hnohta, “Ei paw Dâvi na pasasana zydua kha na palôh liata na pahno ngâ thlâh ha aw. Chyhsa na pasana kha Abeipa ta nâma luh chô liata a cha vaw palie thlu aw.

⁴⁵ Bei Sawlawmaw deikua cha thlaochhipa ta y aw ta, Dâvi beidyuchhai cha Abeipa hmiakô liata tlyzaw ta paduapa a châ aw,” tah ta.

⁴⁶ Abei ta Zehôdâ sawchapawpa Benai cha biepie ta, Benai cha pua ta, Simei cha chhawh ta, thi ha ta. Chatanachata khinarâh cha Sawlawmaw ku liata pa-ipa châ ha ta.