1 ABEIZY 19 - Mara Bible RV (BSI)

Zezebel chipa ta Elaizâh â râ

¹ Ahabâ ta Elaizâh hmotaopa zydua nata zaozi ta hrohsopa zydua a thie hapa thâtihzy cha Zezebel chho ta.

² Zezebel ta Elaizâh lâ chyhsa tuah ta, a hnohta, “Kha hrohsopazy hrona na lapa hawhna kha ta, mylâ tahmâ daihti liata nâma hrona chhao ei la leipa khiahta cha, khazohzy ta ei chô liata tao ei sala, cha hlâta pasa viapa chhao ta tao mawh ei sy,” tah ta.

³ Elaizâh cha chi kaw ta, thyu ta, a hrona pabohsa awpa ta a râ ta. Zudâh râh Besebâ khih kei tlô ta, cha liata a chakaotuhpa cha siesai ta.

⁴ Elaizâh cha râhchawhpa lâ noh kha sie via ta, ophi buh ry liata a tyuh ta, thi awpa ta hiah ta, “Â daih ha na, Hy Abeipa y, ei hrona he tahmâ la thlâh ha bâ mah y. Nâ pathlatuhpazy hlâta pha via hlei va na,” tah ta.

⁵ Ophi buh ry liata a zia ta, a mô ha ta. Vâlyuhchâpa ta vaw hria ta, a hnohta, “Thyu la nie teh,” tah ta.

⁶ Mohmia pasaih ta, alô sahpa liata pakâhpa viahchhâ nata ti beih a luh chô liata hmô ta. Niepa ta doh ta, a zia heih ta.

⁷ Abeipa vâlyuhchâpa cha a ei nona ta a vy heih ta, vaw hria ta, a hnohta, “Thyu la, nie teh, na sie nawpa a hla tlôh ta,” tah ta.

⁸ Elaizâh cha thyu ta, niepa ta doh ta. Cha pati thatlôna chata Khazohpa tlâh Hôribâ taihta noh sypalih nata zâ sypalih sie ta.

Elaizâh hnohta Abeipa â luah

⁹ Lôpu miakha kei tlô ta, cha liata a rie ta. Abeipa bie a hnohta vaw tlô ta, Abeipa ta a hnohta, “He liata khâpa ma na tao, Elaizâh?” tah ta.

¹⁰ Elaizâh ta, “Abeipa, Pheisaihzy Khazohpa châta phahnai a ngiah ngaita tyh na ta. Izarei sawzy hra ta na biehrai tleisai ei ta, na maisâhzy pacho ei ta, na hrohsopazy zaozi ta chhawhsao ei ta, keima, keima deita he a laibâhpa y na ta, keima chhao he ei hrona na la amâ chhuah,” tah ta.

¹¹ Abeipa ta, “Pua la tlâh liana hao ta Abeipa hmiakô liata a kei duah teh,” tah ta. Chatawhcha moh tua u, Abeipa ta Elaizâh cha vaw chapia ta, thlihpi thatlôpa nata ru ngaitapa ta tlâhzy cha vaw pacho ta, Abeipa hmiakô liata lôkâhpazy a patlawchheih ta, châhrasala Abeipa cha thlih liata y leipa ta. Thlih a pathli khai tawhta alo a vaw sih ta, châhrasala Abeipa cha alosihpa liata y leipa ta.

¹² Alo â sih khai tawhta mei vaw pua ta, châhrasala Abeipa cha mei liata y leipa ta. Mei khai tawhta ao nai zualuapa vaw pua ta.

¹³ Elaizâh ta cha cha a thei nahta, a viahkao pasipa ta a hmia a khu ta, kei pua ta, lôpu paka liata a kei duah ta. Ao vaw pua ta, a hnohta, “He liata khâpa na tao, Elaizâh?” tah ta,

¹⁴ Elaizâh ta, “Abeipa, Pheisaihzy Khazohpa châta phahnai a ngiah ngaita tyh na ta. Izarei sawzy hra ta na biehrai tleisai ei ta, na maisâhzy pacho ei ta, na hrohsopazy zaozi ta chhawhsao ei ta, keima, keima deita he a laibâhpa y na ta, keima chhao he ei hrona na la amâ chhuah,” tah ta.

¹⁵ Abeipa ta a hnohta, “Na vaw siena lâta a lie la, Dâmaskâ râhchawhpa lâta sie mah y. Na tlô nahta, Hâze cha Aramia bei châta sathaw na thu aw.

¹⁶ Nisi sawchapawpa Zehu chhao Izarei bei châta sathawthu aw chi ta, Saphâta sawchapawpa Elaisâh cha, nâma su châ thla awpa hrohsopa châta sathaw na thu aw.

¹⁷ Hâze zaozi tawhta a râpa maih cha Zehu ta thie aw ta, Zehu zaozi tawhta a râpa maih cha Elaisâh ta a thie aw.

¹⁸ Châhrasala Izarei râh liana heta Bâlâ hmiakô liata pakhu paneih beih leipa nata Bâlâ a pahnâ beih leipa chyhsa sâh sari kei châta ei pahlôh aw,” tah ta.

Elaisâh awna

¹⁹ Elaizâh cha cha su tawhta sie ta, Saphâta sawchapawpa Elaisâh cha kei hmô ta. Elaisâh cha viahchao tôhpa bao hrawh hleino ta alei vaw palie ngâ kaw ta. A bao hrawh hleinona cha ano ta haoh ta. Elaizâh ta kei pangai ta, a viahkao pasipa thy thlu ta.

²⁰ Elaisâh cha viahchao tôhpazy siesaipa ta, Elaizâh cha a chadai ta, a hnohta, “Ei châ haw na, ei nô nata ei paw a kei pahnâ ha tua ei sala, cha khai tawhta ei cha pazi aw,” tah ta. Elaizâh ta a hnohta, “Va kua la, na chô liata hmo ei taopa deikua kha a thei thlâh ha mah y,” tah ta.

²¹ Elaisâh cha Elaizâh a pazipa tawhta kua ta, viahchao tôhpa bao kha la ta, atheihna ta hlâ ta. A sazy cha viahchao raopaky thozy ta pasyuh ta, chyhsazy pie ta, nie ei ta. Chatawhcha thyu ta, Elaizâh cha a chadai ta, chakao ha ta.