1 ABEIZY 18 - Mara Bible RV (BSI)

Elaizâh nata Ahabâ atyhna

¹ Noh hluhpi a khô tawhta, a kô thôhna kô liata, Abeipa bie Elaizâh hnohta vaw tlô ta, “Sie la, Ahabâ hnohta a kei luah mah y. Alei chô liata avâ ei pasuasa bâ aw,” tah ta.

² Elaizâh cha Ahabâ hnohta a luah awpa ta sie ta. Samâri râh liata chakâh mozoh tlô ta.

³ Ahabâ ta abei o liata hriatuhpazy hyutuhpa Ôbadia cha aw ta. Ôbadia cha Abeipa a chi kawpa chyhsa a châ.

⁴ Zezebel ta Abeipa hrohsopazy a thie no ei khata, Ôbadia he hrohsopa za kha a chhi ta, lôpu liata sypangawh sypangawh ta nyu ta, viahchhâ nata ti ta a pasatuhpa kha a châ.

⁵ Ahabâ ta Ôbadia hnohta, “Râh zydua chahryh la, tihnawh zydua nata saikao zydua chahryh khai mah y. Arâzy nata sabaituzy eima pachha thei nawpa ta sibiepazy eima hmô thei ngyu aw. Chataleipatala sahrohzy he eima pahlei khai pathlei aw na,” tah ta.

⁶ Râh chahryh awpa ta a rai ei ta. Ahabâ cha ano deita hiakha lâ sie ta, Ôbadia chhao ano deita hiakha lâ sie ta.

⁷ Ôbadia cha lâpi liata a sie laih nota, Elaizâh ta a vaw tyh ta. Ôbadia ta Elaizâh cha pahno thlâh ha ta, â khu lâta pao ta, a hnohta, “Nâma ma na châ, ei zibeipa Elaizâh?” tah ta.

⁸ Elaizâh ta a chhy ta. “Keima na ei châ. Sie la, na zibeipa hnohta, ‘Elaizâh hao liata a y,’ tahpa ta kei chho mah y,” tah ta.

⁹ Ôbadia ta, “Khâpa hmo parao ha na ta ma, châ chakaotuhpa he thie awpa ta Ahabâ ku liata na hlâ nâ chhuah tly?

¹⁰ Abeipa na Khazohpa hrona reipa ta ei reih, ei zibeipa ta nâma a patluasa leina phopi nata khinarâh rai y khao vei. ‘He liata y vei,’ ama tah khiahta cha, ama cha hmô leina kyh liata bie dopa ama reih tlai ma tahpa ta khinarâh nata phopi zy cha bie a pataihsa lymâ ei.

¹¹ Tahmâ nâma ta, ‘Sie la, na zibeipa hnohta, “Elaizâh hao liata a y,” tahpa ta kei chho mah y,’ na tah chi ta.

¹² Ei cha puasaipa nahta, Abeipa Thlahpa ta ei pahno leina lâ châ chhi aw ta, Ahabâ cha kei chho aw na ta, a cha hmô thei tlôh vei khiahta cha, kei châ chakaotuhpa he ei thyutlia no tawhta Abeipa a chipa ei châpa chhao ta, eina thie thlâh ha aw mâh tâh.

¹³ Zezebel ta Abeipa hrohsopazy a thie nota ei hmotaopa, Abeipa hrohsopazy hry liata chyhsa za kha, sypangawh sypangawh ta, lôpu liata nyu ei na ta, viahchhâ nata ti ta ei pasazie zy ei kha, ei zibeipa hnohta cha chho veih ei tlyma?

¹⁴ Tahmâ nâ ta, ‘Sie la, na zibeipa hnohta, “Elaizâh hao liata a y,” tahpa ta kei chho mah y,’ na tah chi ta, abei ta eina thie aw mâh tâh,” tah ta.

¹⁵ Elaizâh ta, “Ei chakao tyhpa Pheisaihzy Abeipa hrona reipa ta ei reih. Tanoh he Ahabâ hnohta ei kei luah tlai aw,” tah ta.

¹⁶ Chatawhcha Ôbadia cha Ahabâ a hmô awpa ta sie ta, Elaizâh yna cha kei chho ta. Ahabâ cha Elaizâh a hmô awpa ta sie ta.

¹⁷ Ahabâ ta Elaizâh a hmô nahta, a hnohta, “Nâma he ma, Izarei nôpopa ta a sohtuhpa chi cha?” tah ta.

¹⁸ Elaizâh ta, “Kei ta Izarei nô papo va na, nâma nata na paw chhôhkha ta Abeipa biepiepazy tleisaipa ta, Bâlâ nama pazipa vâta, Izarei nô nama papopa a châ.

¹⁹ Chavâta tahmâ Izarei saw zydua nata Bâlâ hrohsopa 450 nata Aseri hrohsopa 400, Zezebel tlâhkhai liata pati a dôh tyhpazy paawsa la, Kâmel tlâh liata keima lâta a vaw hmaoh mawh ei sy,” tah ta.

Bâlâ hrohsopazy pahniepa ama châ

²⁰ Ahabâ ta Izarei saw zydua lâta chyhsa tuah ta, hrohsopazy cha Kâmel Tlâh liata awpakhy ta.

²¹ Elaizâh ta zawpi cha a kei hnia ta, ama hnohta, “Pachâna miano likah liata khachâ ma noraihpa ta nama y chy aw? Abeipa cha Khazohpa a châ khiahta cha, ano cha pazi u la, Bâlâ cha Khazohpa a châ khiahta cha, ano cha pazi muh vy,” tah ta. Zawpizy ta kawh kha hmahta a chhy leipa ei ta.

²² Elaizâh ta zawpizy hnohta, “Abeipa hrohsopa a y chhôhpa cha keima deita he châ bâ na ta, Bâlâ hrohsopazy deikua cha 450 ama y.

²³ Viahchao tôhpa pô no miah vaw pie ei sala, âmo châta pô kha amâ tlyh aw. Viahchao tôhpa cha a vyuh vyuh ta pachhaih aw ei ta, tho chô liata soh aw ei ta, mei deikua a ry liata ama pati awpa châ vei. Kei chhao viahchao tôhpa pô kha a chhuanoh hra aw na ta, tho chô liata soh aw na ta, a ry liata mei patih hra aw va na.

²⁴ Nâmo ta nama khazoh moh pado aw ei chi ta, kei chhao Abeipa moh ei pado aw. Chatanachata mei ta a vaw chhytuhpa Khazohpa cha, ano tlai cha Khazohpa cha a châ,” tah ta. Zawpi zydua ta a chhy ei ta, “Cha bie cha a pha na,” tah ei ta.

²⁵ Chatawhcha Elaizâh ta Bâlâ hrohsopazy hnohta, “Nâmo cha nama hluh via khawh. Chavâta nâmo ta viahchao tôhpa pô kha a tlyh tua u la, a chhuanoh u la, nama khazoh moh cha pado teh u. A ry liata deikua mei nama patih awpa châ vei,” tah ta.

²⁶ Viahchao tôhpa âmo ama piepa cha la ei ta, a chhuanoh ei ta, “Hy Bâlâ y, miah a chhy teh,” tahpa ta my tawhta nohchhô taihta Bâlâ moh cha pado ei ta. Châhrasala ao pyury rai y leipa ta, a chhytuhpa rai y veih ei. Chatawhcha maisâh ama taopa cha lâ chahlô ei ta.

²⁷ Nohchhô locho a vaw châ na ta Elaizâh ta âmo cha pasipasawh ta, ama hnohta, “A paro kawpa ta awh teh u cha, khazoh mah a châ tâh. A rohpady ngâ kawpa chhao châ aw ta, lyupâh a pua ngâpa chhao châ thei ta, khitlyna lâ a sie hapa chhao châ thei ta, a mô ha ta pahra byuhpa chhao a châ ngyu aw,” tah ta.

²⁸ Ao paro ngaitapa ta awh ei ta, ama taozietyhpa hawhta, zaozi nata asei ta thi lo ngâna taihta a âpa ta a dy ei ta.

²⁹ Nohchhô locho daihti khô ta, zâlâ atheihna daihti taihta ama hrohsona biezy cha reih ei ta. Châhrasala ao pyury rai y leipa ta, a chhytuhpa rai y leipa ei ta, a pachâtuhpa rai y veih ei.

³⁰ Chatawhcha Elaizâh ta zawpi zy­dua hnohta, “Nâ vaw hnia teh u,” tah ta. Zawpi zydua ta a kei hnia ei ta. Abeipa maisâh pacho hapa cha taopathi ta.

³¹ “Na moh cha Izarei a châ aw,” tahpa ta Abeipa bie a daotuhpa Zakaw sawzy chi zie ta Elaizâh ta alô mia hrawh hleino la ta.

³² Cha alôzy cha hmâpa ta, Abeipa moh ta maisâh tao ta. Maisâh chheipâh liata sâh kachu su thôh su kha a tlôh awpa khaohtlô chao ta.

³³ Tho cha a phapa ta pacho ta, viahchao tôhpa cha a vyuh vyuh ta pachhaih ta, tho chô liata soh ta. “Beih mia palih ti ta pabie u la, raopa hlâna nata tho he vaw hry teh u,” tah ta.

³⁴ “A ei nona ta vaw hry heih teh u,” tah ta, a ei nona ta hry heih ei ta. “A ei thôhna ta vaw hry heih teh u,” tah ta, a ei thôhna ta hry heih ei ta.

³⁵ Ti cha maisâh chadôpa ta loh ta, khaohtlô chhao ti ta bie ha ta.

³⁶ Chatawhcha zâlâ atheihna hlâ daihti liata, hrohsopa Elaizâh cha a kei hnia ta, “Hy Abeipa, Abarahâ nata Aisika nata Izarei Khazohpa y, Izarei liata Khazohpa na châ tahpa tanoh he pahnopa ta y sala, kei he châ chakaotuhpa châ na ta, he hmo zydua he nâma bie ta a taopa ei châpa tanoh he pahnopa ta y mawh sy.

³⁷ Nâ chhy la, Hy Abeipa, nâ chhy mah y. Chatanachata he zawpizy heta nâ Abeipa deita he Khazohpa châ chi ta, ama palôh na pakuasa ha heih ei tahpa ama pahno aw,” tahpa ta thlahchhâ ta.

³⁸ Chatanachata Abeipa mei cha vaw tla ta, raopa hlâna nata thozy nata alôzy nata dohlei zy cha kâ patlô khai ha ta, khaohtlô liata ti chhao palie khai ha ta.

³⁹ Zawpi zydua ta cha cha ama hmô nahta, â khu lâta pao ei ta, “Abeipa tlai he Khazohpa a châ, Abeipa tlai he Khazohpa a châ,” tah ei ta.

⁴⁰ Elaizâh ta ama hnohta, “Bâlâ hrohsopazy kha patu teh u. Pakha hmah papuasa khah u,” tah ta. Bâlâ hrohsopazy cha patu ei ta, Elaizâh ta âmo cha Kisaw chavah lâ a chhi ta, cha liata a thie khai ha ei.

Abeipa ta avâ a pasuasa

⁴¹ Chatawhcha Elaizâh ta Ahabâ hnohta, “Khy la, niepa ta doh mah y, vâkatlâ suah awpa pyu a y ha na,” tah ta.

⁴² Ahabâ cha nie awpa nata doh awpa ta khy ta. Elaizâh cha Kâmel Tlâh laki lâ kiah ta, a hmia alei lâ a khu ta, a pakhu likawh liata a hmia Soh ta.

⁴³ A chakaotuhpa hnohta, “Tahmâ khy la, tilaipi lâ kei sai tua,” tah ta. Chakaotuhpa cha khy ta, sai ta, “Khâpa hmah y vei,” tah ta. Elaizâh ta, “Khy heih teh,” tahpa ta ei sari taih tuah ta.

⁴⁴ A ei sarina liata, chakaotuhpa ta, “Tilaipi tawhta chyhsapa ku tie ta meihdo a kaw thyupa ei hmô,” tah ta. Elaizâh ta, “Khy la, Ahabâ hnohta, ‘Na talailih a chhuanoh la zu bâ teh, avâ ta a cha pakhâ pathlei aw,’ kaw tah mah y,” tah ta.

⁴⁵ Buakha chhôh ta avâ cha thlih nata meihdo ta vaw zoh ta, vâkatlâ vaw suah ta. Ahabâ cha talailih liata kiah ta, Zezari khih lâ sie ha ta.

⁴⁶ Abeipa ku cha Elaizâh chô liata y ta, a viahkao pasipa cha a chaisaih liata hnaoh ta, Ahabâ hmia lâta Zezari khih angiana taihta a râ lymâ ta.