1 ABEIZY 17 - Mara Bible RV (BSI)

Noh kâh awpa kyh Elaizâh chhochhieliena

¹ Kilia râh Tisabi khih liata Tisabi chyhsa Elaizâh ta Ahabâ hnohta, “Ei chakao tyhpa Abeipa, Izarei Khazohpa hrona reipa ta ei reih. Kô khazie chhôh tlyma cha ei bie leipa ta diati nata vâsua rai tla aw vei,” tah ta.

² Chatawhcha Elaizâh hnohta Abeipa bie vaw tlô ta,

³ “He su tawhna heta pua la, nochhi lâ pangaipa ta sie la, Zawdâh nochhi lâta a ypa Cheri vahtiepa liata a kei nyu mah y.

⁴ Vahtiepa ti cha doh aw chi ta, cha liata châ pasa awpa ta raawhzy bie ei pie ha ei,” tah ta.

⁵ Elaizâh cha sie ta, Abeipa bie hawhta tao ta. Zawdâh nochhi lâta a ypa Cheri vahtiepa liata y ta.

⁶ Raawhzy ta my ta viahchhâ nata sa vaw cheipa tyh ei ta, zâlâ chhao viahchhâ nata sa vaw cheipa tyh ei ta, vahtiepa ti cha doh ta.

⁷ A noh hro viapa ta, râh liata avâ rai a sua leipa vâta, vahtiepa cha kua ha ta.

Elaizâh nata Zarephâ nôhmei

⁸ Abeipa bie a hnohta vaw tlô ta,

⁹ “Thyu la Sidaw râh liata Zarephâ khihpi lâ sie la, cha liata kei pahrâ mah y. Châ pasa aw­pa ta cha liata nôhmei pakha bie ei pie haw,” tah ta.

¹⁰ Elaizâh cha thyu ta, Zarephâ khihpi lâ cha sie ta. Khihpi chhikao â kei ngia nahta, nôhmei pakha, cha liata thopahrei vaw pakhy ngâ kaw ta. Chanô cha aw ta, a hnohta, “Ngiachhiepa ta ti do awpa a chyhta na vaw pie teh,” tah ta.

¹¹ Ti la awpa ta a vawpa cha kei awsao heih ta, a hnohta, “Viahchhâ chyhta chhao na vaw cheipa pâ mah y,” tah ta.

¹² Nôhmeinô chata, “Abeipa na Khazohpa hrona reipa ta ei reih, viahchhâ hnei leipa na ta, beih liata viahdie pazah kha deita nata a ôh liata sathaw a chyhta deita ei hnei. Tahmâ thopahrei chhao he a chyhta dei pakhy na ta, o lâ vawh aw na ta, keima nata ei sawchapawpa châta viahchhâ tao aw na ta, nie aw pi ta, cha khô lâ cha nie awpa hnei khao leipa aw pi ta, tlâ eima thi aw,” tah ta.

¹³ Elaizâh ta a hnohta, “Chi khah y, vawh la na reipa hawhna chata kei tao teh. Anodeikuacha na hneipa tawhta keima châta viahchhâ chyhta na taopa ha tua la, na vaw cheipa mah y. Cha khai tawhta nâma nata na sawchapawpa châta tao lah vâ chi.

¹⁴ Abeipa, Izarei Khazohpa ta, ‘Abeipa ta alei chô liata avâ a vaw pasuasa hlâlei cha, viahdie beih rua leipa aw ta, a ôh liata sathaw chhao chhâ aw vei,’ a tah,” tah ta.

¹⁵ Nôhmeinô cha vawh ta, Elaizâh reipa hawhta kei tao ta. Ano nata a chhôhkha nata Elaizâh chhaota noh hluhpi nie awpa hnei ei ta.

¹⁶ Elaizâh hmâpa ta a reipa Abeipa bie hawhta, viahdie beihrai cha rua leipa ta, a ôh liata sathaw chhao chhâ vei.

Elaizâh ta nôhmei saw a pathyu

¹⁷ Cha hnôhlâ ta o hneituhnô sawchapawpa cha tlâh leipa ta vaw y ta. A pasapa a paru ngaitapa vâta a hu chhâ ha ta.

¹⁸ O hneituhnô ta Elaizâh hnohta, “Hy nâ Khazohpa chyhsa y, ei chô liata palôh châ leina khâpa ma na hnei tly? Ei moleina na pahnosa ta, ei sawchapawpa na thiepa awpa ta a vaw tlôpa na vaw châ he!” tah ta.

¹⁹ Elaizâh ta a hnohta, “Na sawchapawpa cha na vaw pie teh,” tah ta. Hawtipa cha a nô bâh tawhta la ta, ano â ziana, ochô lâta chhôhpadâhpa lâ kiakhei ta, a rakhô liata pazia ta.

²⁰ Abeipa pado ta, “Hy Abeipa ei Khazohpa y, ei yna nôhmei chô liana chhao heta ma, a sawchapawpa thiepa chi ta, chhiena na vaw patlôsa haw?” tah ta.

²¹ Hawtipa chô liata ei thôh a byuhnie ta, Abeipa cha pado ta, “Hy Abeipa ei Khazohpa y, ei châ haw na, he hawti hrona he ano lâta rie vaw pakuasa heih mah y,” tah ta.

²² Abeipa ta Elaizâh ao cha thei ta. Hawti hrona cha ano lâta vaw kua ta, vaw hroh ha ta.

²³ Elaizâh ta hawtipa cha la ta, ochô lâta chhôhpadâhpa tawhta o chhôh lâ za chôkhei ta, a nô hnohta hlâ ta. Elaizâh ta, “Moh tua, na sawchapawpa a hroh ha hih,” tah ta.

²⁴ Chanô ta Elaizâh hnohta, “Tahmâ la Khazohpa chyhsa châ chi ta, na pakah liata Abeipa bie cha biehmeiseihpa a châ tahpa ei pahno haw,” tah ta.