1 ABEIZY 16 - Mara Bible RV (BSI)

¹ Bâsâ kyh liata Hânani sawchapawpa Zehu hnohta Abeipa bie vaw tlô ta,

² “Dohlei tawhta cha cheihchalo na ta, ei phopi Izarei chô liata hyutuhpa ta ei cha tao. Châhrasala Zerôbaw lâpi a chhih hrapa ta, ei phopi Izarei cha pamoleisa chi ta, ama moleinazy vâta pathi iapa ta eina tao ha chi.

³ Chavâta pachâ teh, Bâsâ nata a pathlazy cha pamua khai aw ei na ta, na pathlazy cha Nebâ sawchapawpa Zerôbaw pathlazy hawhta ei tao aw ei.

⁴ Bâsâ pathla khihpi liata a thipazy cha i ta chaih aw ei ta, a pathla lyurâhpa liata a thipazy cha avâ pavawzy ta ama dyh aw,” tah ta.

⁵ Bâsâ thâtih hropazy, a hmotaopazy nata a thatlônazy cha, Izarei beizy thâtih rona châbu liata ropa a châ.

⁶ Bâsâ cha a pathlatuhpazy hnohta a mô ta, Tizah khihpi liata ama pabu. A sawchapawpa Elâ ta ano su liata â bei.

⁷ Bâsâ cha Abeipa mohmô ta moleina hmozy tao ta, a hmotaopazy chata Abeipa pathi pa-ia ta, Zerôbaw chhôhkha lyupa ta, Zerôbaw chhôhkha cheingei chhao cha a pahleipadiapa vâ ei ta, Bâsâ nata a pathlazy kyh liata, Hânani sawchapawpa hrohsopa Zehu hmâpa ta Abeipa bie kha a vaw tlôpa a châ.

Izarei bei Elâ

⁸ Zudâh bei Âsâ kô kih nata kô charu â bei kô ta, Bâsâ sawchapawpa Elâ cha Tizah khihpi liata Izarei chô liata a bei pathao ta, kô no â bei.

⁹ Châhrasala a talailihzy â khophie chô liata pheisaih hyutuhpa, a chakaotuhpa Zimri ta ano cha tei ta. Elâ cha Tizah liata a y nota, Tizah khihpi liata a o mohôhtuhpazy hyutuhpa Âza o liata parina taihta doh ta.

¹⁰ Zimri cha o chhôh lâ a kei ngia ta, Bei Elâ cha chhawh ta, thie ta, ano su liata â bei haw. Cha cha Zudâh bei Âsâ kô kih nata kô sari â bei kô ta a tlôpa hmo a châ.

¹¹ Zimri cha a bei pathao ta, a beidyuchhai liata â tyupa nahta, Bâsâ pathla zydua thie ta. A heinawhzy nata a viasazy hry liata chapaw saw maih cha pakha hmahta pahlôh leipa ta a thie khai ha ei.

¹² Bâsâ kyh liata, Abeipa ta hrohsopa Zehu hmâpa ta a vaw rei hapa bie hawhta, Zimri ta Bâsâ chhôhkha zydua cha a pahleipadia khai hapa a châ.

¹³ He hmo he, Bâsâ moleina hmo taopa zydua nata a sawchapawpa Elâ moleina hmo taopa zydua vâta nata Izarei ama pamoleisapa vâta, Abeipa Izarei Khazohpa pathi pa-ia ha ei ta, ama chô liata a vaw tlôpa a châ.

¹⁴ Elâ thâtih hropazy nata a hmotaopa zydua cha, Izarei beizy thâtih rona châbu liata ropa a châ.

Izarei bei Zimri

¹⁵ Zudâh bei Âsâ kô kih nata kô sari â bei kô ta, Zimri cha Tizah liata noh sari a bei ta. Philistinâ khih Kibethô a dyuh awpa ta pheisaihzy cha riehmo paryh ei ta.

¹⁶ Riehmo liata pheisaih a ypazy ta, “Zimri ta tei ta, bei a thie haw,” tahpa ama reipa thei ei ta. Chatanachata Izarei zydua ta pheisaih hyutuhpa Ômri cha, ama riehmo liana chata, cha noh lia tlai ta Izarei chô liata bei ta ama tao haw.

¹⁷ Ômri nata a hnohta a ypa Izarei zydua cha Kibethô tawhta khy ei ta, Tizah khihpi cha kaw dôh ei ta.

¹⁸ Zimri ta khihpi cha ama la haw tahpa a thei nahta, abei o diahsua chhôh lâ a ngia ta, abei o chhôh liata anosasyh ta mei ta a rao pâ ta, a thi haw.

¹⁹ Abeipa mohmô liata hmo pha leipa taopa ta, moleina hmozy tao ta, Zerôbaw lâpi a chhihpa ta, Izarei a pamoleisapa moleina hmo a taopa vâta, cha hmo cha a chô liata a vaw tlôpa a châ.

²⁰ Zimri thâtih hropazy nata arulâta a teina kyhzy cha, Izarei beizy thâtih rona châbu liata ropa a châ.

Izarei bei Ômri

²¹ Izarei phopi cha py no ta a vaw pachhaih ha ta. Â khophie ta Kinâ sawchapawpa Tibani cha bei ta tao a chhuahpa ta pazi ei ta, â khophie ta Ômri pazi ei ta.

²² Ômri a pazipazy ta Kinâ sawchapawpa Tibani a pazipazy cha pahnie ha ei ta. Tibani thi ta, Ômri â bei haw.

²³ Zudâh bei Âsâ kô sythôh nata kô kha â bei kô ta, Ômri cha Izarei chô liata a bei pathao ta. Kô hrawh hleino a bei ta, Tizah liata kô charu â bei.

²⁴ Samâri tlâh cha Seme tawhta tâkâ talent miano ta chalei ta, cha tlâh liata thokhy ta dôhpa khihpi padua ta. A khihpi paduapa moh cha, a tlâh hneituhpa Seme moh paphaopa ta Samâri a bi.

²⁵ Ômri cha Abeipa mohmô ta moleina hmo tao ta, ano hlâta a vaw y tuapa zydua hlâta moleina hmozy tao via pachai ta.

²⁶ Nebâ sawchapawpa Zerôbaw lâpi a chhihpa ta, nothlahpazy tao ta, Izarei a pamoleisapa moleinazy vâta Abeipa, Izarei Khazohpa pathi a pa-ia hapa a châ.

²⁷ Ômri thâtih hropa nata a hmotaopazy nata a thatlôna a palâsana kyhzy cha Izarei beizy thâtih rona châbu liata ropa a châ.

²⁸ Ômri cha a pathlatuhpazy hnohta a mô ta, Samâri khi liata pabu ei ta, a sawchapawpa Ahabâ ta ano su liata â bei.

Izarei bei Ahabâ

²⁹ Zudâh bei Âsâ kô sythôh nata kô charie â bei kô ta, Ômri sawchapawpa Ahabâ cha Izarei chô liata a bei pathao ta. Ômri sawchapawpa Ahabâ cha Samâri khihpi liata kô kih nata kô no Izarei chô liata â bei.

³⁰ Ômri sawchapawpa Ahabâ cha ano hlâta a vaw y tuapa zydua hlâta Abeipa mohmô ta hmo pha leipa tao via pachai ta.

³¹ Nebâ sawcha­pawpa Zerôbaw moleina lâpi â chhihpa rakhapa cha khâpa hmahta a châ leipa ta rao ta, Sidaw bei Ethabâlâ sawchanô Zezebel cha lapinô ta hnei ta. Sie ta, Bâlâ kei chakao ta, Bâlâ cha â chhy tyh.

³² Samâri khihpi liata Bâlâ achhyna o a sapa liata Bâlâ châta maisâh tao ta.

³³ Ahabâ cha Aseri tôh taihta padua ta. Chatanachata Ahabâ cha ano hlâta a vaw y tuapa Izarei bei zydua hlâta Abeipa, Izarei Khazohpa cha a hie pahâh via pachai ta.

³⁴ Ahabâ â bei daihti liana chata Bethel chyhsa Hiele ta Zerikô khihpi paduapathi ta. Abeipa ta Nunâ sawchapawpa Zawsua hmâpa ta a vaw rei hapa hawhta, khihpi paduana lôbô a bô nota a sawchapaw uhtheipa Abirâ thi ta, thokhy chhikaozy a tao nota a sawchapaw seihnaipa Seku chhao thi ta.