1 ABEIZY 15 - Mara Bible RV (BSI)

Zudâh bei Abizah

¹ Nebâ sawchapawpa Bei Zerôbaw kô hrawh hleicharie â bei kô ta, Abizah cha Zudâh râh liata a bei pathao ta.

² Zerusale liata kô thôh a bei ta. A nô moh cha Mâkâ châ ta, Abisalô sawchanô a châ.

³ A paw hmo moleipa taopa zydua kha tao hra ta, a mapaw Dâvi palôh phaoh leipa ta, Abeipa a Kha­zopa lâta a palôh zydua hlâ khai vei.

⁴ Chatahrasala Dâvi vâta Abeipa a Khazohpa ta Zerusale liata meiôh pie ta, ano a pazi awpa sawchapaw paduapa ta, Zerusale cha â ipa ta a paduapa a châ.

⁵ Hiti chyhsa Uria kyh tah leipa khata cha, Dâvi kha Abeipa mohmô liata hmo dopa a tao tyhpa châ ta, Abeipa ta bie a piepa kheihawhpa hmah a hro chhôh zydua ta a tleisai beih leipa a châ.

⁶ Abizah hro chhôh zydua ta Rehôbaw nata Zerôbaw likah liata adyuhna y ngâ thlâh ha ta.

⁷ Abizah thâtih hropazy nata a hmotaopa zydua cha Zudâh beizy thâtih rona châbu liata ropa a châ. Abizah nata Zerôbaw likah liata adyuhna khâ y ta.

⁸ Abizah cha a pathlatuhpazy hnohta a mô ta, Dâvi khihpi liata pabu ei ta, a sawchapawpa Âsâ ta ano su liata â bei.

Zudâh bei Âsâ

⁹ Izarei bei Zerôbaw kô kih â bei kô ta, Âsâ cha Zudâh chô liata abei pathao ta,

¹⁰ kô sypalih nata kô kha Zerusale liata â bei. A nô moh cha Mâkâ châ ta, Abisalô sawchanô a châ.

¹¹ Âsâ cha a pathlatuhpa Dâvi hawhta Abeipa mohmô liata hmo dopa tao ta.

¹² Achhyna su liata chapaw âzuahpazy râh tawhta papua ta, a pathlatuhpazy ta khazoh nothlahpa ama taopa zydua chhao a parao khai haw.

¹³ A nô Mâkâ chhao, khazoh nothlahpa pasichhih ngaitapa Aseri tôh a taopa vâta, beinô a châna pabâh ta, a nô khazoh nothlahpa cha chhawh pachhô ta Kidaraw vahtiepa liata mei ta a rao haw.

¹⁴ Su sâhpazy deikua cha pahleipadia vei. Chatahrasala Âsâ cha a hro chhôh zydua ta tlokhuh ta Abeipa liata palôh dopa a phaohpa a châ.

¹⁵ A paw hmohlâpa pathaihpazy nata ano hmohlâpa pathaihpa tâkâ, ngôh nata hmobaohzy cha Abeipa o liata a ngiakhei ta.

Âsâ nata Benhadâ aviasana

¹⁶ Âsâ nata Izarei bei Bâsâ cha amâ bei chhôh zydua ta ama likah liata adyuhna y ta.

¹⁷ Izarei bei Bâsâ cha Zudâh a kaw dyuh ta, Zudâh bei Âsâ lâta a ngia awpa nata a pua awpazy pakhâ nawpa ta Râmâ khih padua ta.

¹⁸ Âsâ ta Abeipa o sôh nata abei o sôh sonazy liata tâkâ nata ngôh zydua la ta, a chakaotuhpazy ku liata hlâ ta. Cha sôhzy cha Bei Âsâ ta Dâmaskâ khih liata a ypa Aramia bei Benhadâ lâ paphao ta. Benhadâ cha Heziô sawchapawpa Tâbarimaw sawchapawpa a châ. Âsâ ta Benhadâ hnohta,

¹⁹ “Ei paw nata na paw likah liata biehrai a ypa hawhna khata, keima nata nâma likah liata chhao biehrai tao sih y. Moh teh, tâkâ nata ngôh kuhriazy ei cha kaw paphao hih. Izarei bei Bâsâ ta ei nâ sysai thei nawpa ta, vawh la, a hnohta biehrai na taopa kha kei parao teh,” tah ta.

²⁰ Benhadâ ta Bei Âsâ pahruana cha a pha tah ta, Izarei khihpizy a dyuh awpa ta pheisaih hyutuhpazy tuah ta, chatanachata Izô, Dânâ, Abebemâkâ nata Chinerô khihpizy nata Nâthalai râh zydua pahnie ta.

²¹ Cha thâtih cha Bâsâ ta a thei nahta, Râmâ khihpi a padua haipa cha a chalihsaipa ta, Tizah khihpi liata pahrâ ta.

²² Chatawhcha Bei Âsâ ta Zudâh mo zydua hnohta bie papua ta, ahy hmahta paeipa y leipa ei ta, Bâsâ ta Râmâ khihpi padua nawpa ta a hmâpa lô nata tho zy paly ei ta, chazy hmâpa ta Bei Âsâ ta Mizpâ khihpi nata Benzami râh liata Kebâ khihpi zy a padua.

²³ Âsâ thâtih hropa zydua, a thatlôna zydua, a hmotaopa zydua nata khihpi a paduapazy kyh cha Zudâh beizy thâtih rona châbu liata ropa a châ. A pawpi tawhta deikua cha, a phei liata hri vaw phaoh ha ta.

²⁴ Âsâ cha a pathlatuhpazy hnohta a mô ta, a mapaw Dâvi khihpi liata, a pathlatuhpazy hnohta ama pabu. A sawchapawpa Zehôsaphâ ta ano su liata â bei.

Izarei bei Nâdâ

²⁵ Zudâh bei Âsâ kô no â bei kô ta, Zerôbaw sawchapawpa Nâdâ cha Izarei chô liata a bei pathao ta, Izarei chô liata kô no â bei.

²⁶ Abeipa mohmô ta hmo pha lei ngaitapa tao ta, a paw lâpi a chhihpa kha a chhih hrapa ta, Izarei a pamoleisapa moleina lâpi kha a chhih ta.

²⁷ Iskâra pathla Ahiza sawchapawpa Bâsâ ta ano cha tei ta. Bâsâ ta Nâdâ cha Philistinâ râh Kibethô khihpi liata a thie haw. Cha no cha Nâdâ nata Izarei zydua ta Kibethô khihpi ama dôh no a châ.

²⁸ Zudâh bei Âsâ kô thôh â bei kô ta, Bâsâ ta Nâdâ cha thie ta, ano su liata a bei haw.

²⁹ Bâsâ cha bei a châpa nahta, Zerôbaw pathla zydua thie ta. Abeipa ta Silô khihpa, a chakaotuhpa Ahiza hmâpa ta a vaw rei hapa hawhna khata, Zerôbaw pathlazy cha thie lymâ ta, a hrohpa pakha hmah Zerôbaw châta pahlôh vei.

³⁰ He hmo he Zerôbaw moleina hmo taopazy vâta nata Izarei a pamoleisapa vâta a vaw tlôpa châ ta, Abeipa, Izarei Khazohpa pathi a pa-ia hapa vâta a vaw tlôpa a châ.

³¹ Nâdâ thâtih hropa nata a hmotaopa zydua cha Izarei beizy thâtih rona châbu liata ropa a châ.

³² Âsâ nata Izarei bei Bâsâ cha amâ bei chhôh zydua ta ama likah liata adyuhna y ta.

Izarei bei Bâsâ

³³ Zudâh bei Âsâ kô thôh â bei kô ta, Ahiza sawchapawpa Bâsâ cha Tizah khih liata Izarei zydua chô liata a bei pathao ta, ko kih nata kô palih â bei.

³⁴ Abeipa mohmô ta hmo pha lei ngaitapa tao ta, Zerôbaw lâpi a chhihpa kha a chhih hrapa ta, Izarei a pamoleisapa moleina lâpi kha a chhih ta.