1 ABEIZY 14 - Mara Bible RV (BSI)

Zerôbaw paona chhochhieliena

¹ Cha daihti liata Zerôbaw sawchapawpa Abizah cha pasa ta.

² Zerôbaw ta a lapinô hnohta, “Thyu la, Zerôbaw lapinô a châ tahpa ama cha pahno lei nawpa ta a panano la, Silô lâ vawh teh. Cha liata hrohsopa Ahiza y ta, ano cha he phopi chô liata bei ta ei y awpa ei thâtih a reituhpa kha a châ.

³ Viahchhâ tlâ hrawh, viahchhâ pahupazy nata kheihti ôh kha phaoh la, ano lâ vawh teh. Hawti chô liata hmo a tlô awpa a cha chho aw,” tah ta.

⁴ Zerôbaw lapinô ta cha hawh­ta tao ta. Thyu ta, Silô lâ sie ta, Ahiza o cha kei tlô ta. Ahiza cha a machâ hapa vâta a mo zoh ha ta, hmô thei khao leipa ta.

⁵ Abeipa ta Ahiza hnohta, “Moh tua, a sawchapawpa pasana kyh liata châ saohiah awpa ta Zerôbaw lapinô nâ lâ â vy huh. Chanô hropa hawhta a vaw tao ta, hetana heta na chho aw,” tah ta.

⁶ Ochhi liata â vaw ngiapa a phei pyu a thei nahta, Ahiza ta, “Nâ, Zerôbaw lapinô y, a vaw ngia teh. Khazia chyhsa hropa hawhta nâ tao? Thâtih pha lei ngaitapa cha chho awpa ta tuapa ei châ.

⁷ Vawh la, Zerôbaw hnohta, ‘Abeipa, Izarei Khazohpa ta hetana heta a tah: “Izarei phopi sawzy hry tawhta cha cheihchalo na ta, ei phopi Izarei chô liata hyutuhpa ta ei cha tao.

⁸ Dâvi pathlazy tawhta khinarâh chhu na ta, nâ ei cha pie. Châhrasala nâ chakaotuhpa Dâvi hawhta y va chi. Ano cha ei biepiepazy a pyh ta, a pathipalôh tlokhuh ta na pazi ta, hmo dopa deita ei mohmô liata a tao tyh.

⁹ Nâ deikua cha nâma na y hlâta a vaw y tuapa chyhsa zydua hlâta hmo na parao via pachai. Khazoh hropazy nata nothlahpa leihpazy a tao chi ta, ei hie na pahâh chi ta, hnôh eina chhy ha chi.

¹⁰ Chavâta nathlie teh, Zerôbaw pathlazy chô liata hmo pha leipa ei vaw patlôsa aw. Chapaw maih cha, sei chhao, khotalaipa chhao, Zerôbaw tawhta ei chhawh pathlah khai ha aw ei. Zerôhaw o cha, chyhsa ta viahchao ie a raopa hawhta, a kâ patlô hana taihta mei ta ei rao khai ha aw.

¹¹ Zerôbaw pathla khihpi liata a thipazy cha i ta chaih aw ei ta, lyurâhpa liata a thipazy cha vâ pavawzy ta ama dyh aw,” cha cha Abeipa ta a reih hawh,’ tah mah y.

¹² Chavâta thyu la, na o la a di teh. Na phei ta khihpi a tlypa nahta, hawti cha a thi aw.

¹³ Izarei saw zydua ta ano châta mâchhiesa aw ei ta, ama pabu aw. Zerôbaw pathlazy hry liata, ano lia deita ta Abeipa, Izarei Khazohpa a palysapa hmo phapa hmôpa a châpa vâta, Zerôbaw mo nata sa hry liata ano deita he thlâ liata pabupa a châ aw.

¹⁴ Tanoh tlai heta Abeipa ta ano châta Izarei bei padua aw ta, cha abei chata Zerôbaw pathlazy cha a chhawh pathlah khai ha aw ei. Tahmâ chhao he kheihta ma a châ ha aw tly?

¹⁵ Ti liata lohthi a chalyu ngâpa hawhta, Abeipa ta Izarei cha vaw chalyu aw ta, Aseri tôhzy taopa ta Abeipa hie ama pahâhpa vâta, âmo pathlatuhpazy hnohta a piepa râh phapa tawhna heta Izarei cha phia aw ta, Ufrâti chavah khô lâ a hiepatla ha aw ei.

¹⁶ Zerôbaw ta moleina hmo tao ta, Izarei chhao pamoleisa ta, cha Zerôbaw moleinazy vâta Abeipa ta Izarei cha pachâ khao aw vei,” tah ta.

¹⁷ Zerôbaw lapinô cha thyu ta, pua ta, Tizah khihpi kei tlô ta. Ochhi thaby a kei tlôpa nahta, hawti cha thi ha ta.

¹⁸ Abeipa ta a chakaotuhpa hrohsopa Ahiza hmâpa ta bie a vaw rei hapa hawhta, Izarei saw zydua ta hawti cha pabu ei ta, ano châta mâchhiesa ei ta.

Zerôbaw thina

¹⁹ Zerôbaw hmotaopa hropazy, chariah â dyuhna kyh nata a ryureina kyhzy cha, Izarei beizy thâtih rona châbu liata ropa a châ.

²⁰ Zerôbaw cha kô kih nata kô no ryureih ta, a pathlatuhpazy hnohta a mô ha ta, a sawchapawpa Nâdâ ta ano su liata â bei.

Zudâh bei Rehôbaw

²¹ Sawlawmaw sawchapawpa Rehôbaw cha Zudâh râh liata a bei ta. Â bei pathao nota Rehôbaw cha kô sypalih nata kô khapa a châ. Abeipa ta a moh y nawpa ta Izarei chi zydua tawhta â tlyhpa khihpi Zerusale liata kô hrawh hleisari a bei ta. A nô moh cha Amawna zuah Nâmâh a châ.

²² Zudâh cha Abeipa mohmô ta hmo moleipa tao ta, âmo pathlatuhpazy moleina zydua khôpa ta, ama moleinazy vâta Abeipa cha a hia patliasa ei ta.

²³ Âmo chhao heta tlâh sâhpa to liata nata tho hrohpa to ry liata lôbôzy bôpa ta, su sâhpazy nata Aseri tôhzy padua ei ta.

²⁴ Achhyna suzy liata chapaw âzuahpazy taihta râh liata y ei ta. Izarei sawzy hmiakô liata Abeipa ta a papua hapa phopizy hmotaopa pasichhihpa to kha tao hra ei ta.

²⁵ Bei Rehôbaw abeina kô pangawhna kô liata, Izi bei Sisâ ta Zerusale kaw siehnao ta.

²⁶ Abeipa o liata ryusôhpazy nata abei o liata ryusôhpazy lapa ta, hmo to siekhei ta. Sawlawmaw taopa ngôh vyhphao zydua chhao a siekhei khai haw.

²⁷ Bei Rehôbaw ta ngôh vyhphaozy vyuhpa ta dawh vyhphaozy tao ta, chazy cha abei o ochhi vaituhpa pheisaih hyutuhpazy pavaosa ta.

²⁸ Zehôvâh o liata abei â ngiana maihta, vaituhpazy ta vyhphaozy cha cheih ei ta, vaituhpazy yna chhôhpadâhpa liata ama soh heih tyh.

²⁹ Rehôbaw thâtih hropazy nata a hmo­taopa zydua cha, Zudâh beizy thâtih rona châbu liata ropa a châ.

³⁰ Rehôbaw nata Zerôbaw likah liata adyuhna y lymâ ta.

³¹ Rehôbaw cha a pathlatuhpazy hnohta a mô ta, a pathlatuhpazy hnohta Dâvi khihpi liata pabu ei ta. A nô moh cha Amawna zuah Nâmâh a châ. A sawchapawpa Abizah ta ano su liata â bei.