1 ABEIZY 13 - Mara Bible RV (BSI)

Khazohpa chyhsa ta Zerôbaw zikyu â râ

¹ Abeipa biepiepa hawhta, Zudâh tawhta Khazohpa chyhsa pakha Bethel lâ a vy ta. Zerôbaw cha maisâh kiapâh liata hmo hlâ awpa ta a duah ta.

² Khazohpa chyhsa chata Abeipa bie ta maisâh cha awsao ta, “Hy maisâh, maisâh, Abeipa ta hetana heta a tah: ‘Nathlie teh, Dâvi pathlazy hry liata sawchapawpa, a moh Zôsia vaw pih aw ta, na chô liata atheihna a hlâ tyhpa su sâhpa theihthaipazy kha thie aw ta, âmo cha na chô liata vaw hlâ aw ta, chyhsapa rureihzy na chô liata raopa a châ aw,’” tah ta.

³ Cha noh lilaw liata Khazohpa chyhsa ta ngiana pie heih ta, Zerôbaw hnohta, “He he ngiana Abeipa ta a reipa cha a châ. Abeipa ta, ‘Pachâ teh, maisâh he patlawchheihpa châ aw ta, a chô liata buchâhzy cha leihtha khaipa a châ aw,’ a tah,” tah ta.

⁴ Khazohpa chyhsa ta Bethel liata maisâh awsaopa ta, bie a reipazy cha abei ta a thei nahta, Zerôbaw cha maisâh tawhta a ku pazawh ta, “Kha chyhsa kha patu teh u,” tah ta. Châhrasala Khazohpa chyhsa lâta a ku a pazawhpa cha eikhapi ta vaw sy ha ta, a ku cha ano lâ a dao thei khao leipa ta.

⁵ Khazohpa chyhsa ta Abeipa bie ta ngiana a reipa hawhna kha ta, maisâh chhao cha a vaw patlawchheih ta, maisâh liata buchâhzy cha a leihtha khai ha ta.

⁶ Chatawhcha abei ta a chhy ta, Khazohpa chyhsa hnohta, “Ei ku he a tlâh heih thei nawpa ta Abeipa na Khazohpa lâ ngiachhiena na hiapa la, thlah na chhâpa teh,” tah ta. Khazohpa chyhsa ta Abeipa lâ thlahchhâ ta, abei ku cha vaw tlâh heihpa ta, a y tyhpa hawhta vaw y ha ta.

⁷ Chatawhcha abei ta Khazohpa chyhsa hnohta, “Ei hnohta o lâ a vy la, a vaw pahâ chy mah y, lymâ ei cha pie aw,” tah ta.

⁸ Khazohpa chyhsa ta abei hnohta, “Na o khophie rai nâ pie awpa châ la, na hnohta a vy aw va na. He su liana heta viahchhâ nie leipa aw na ta, ti chhao doh aw va na.

⁹ Abeipa bie ta, ‘Viahchhâ na nie awpa châ leipa ta, ti chhao na do awpa châ leipa ta, nâ vyna lâpi lâta nâ lie heih awpa châ vei,’ tahpa ta bie eina pie haw,” tah ta.

¹⁰ Chatanachata lâpi hropa lâta sie ta, â vyna Bethel lâpi lâ tawhta a lie khao vei.

Khazohpa chyhsa paona

¹¹ Bethel khih liata hrohsopa pawpipa pakha y ta. A sawchapawzy a vy ei ta, cha noh ta Bethel liata Khazohpa chyhsa hmotaopa zydua cha chho ei ta. Abei hnohta bie a reipazy chhao kha ama paw chho ei ta.

¹² Ama paw ta ama hnohta, “Khataih lâpi lâta ma a sie” tah ta. A sawchapawzy ta Zudâh râh tawhta a vypa Khazohpa chyhsa siena lâpi cha chho ei ta.

¹³ A sawchapawzy hnohta, “Alâ ky na padiapa teh u,” tah ta. Alâ ky cha padiapa ei ta, kiah ta.

¹⁴ Khazohpa chyhsa cha a chadai ta, ôkâ tho ry liata â tyu thlâh hapa kei hmô ta, a hnohta, “Nâma he ma Zudâh râh tawhta a vypa Khazohpa chyhsa chi cha?” tah ta. Ano ta, “Ei châ mâh tâh,” tah ta.

¹⁵ Hrohsopa ta Khazohpa chyhsa hnohta, “Ei hnohta ei o lâ a vy la, viahchhâ vaw nie mah y,” tah ta.

¹⁶ Khazohpa chyhsa ta, “Na hnohta a vaw lie thei awpa châ leipa na ta, na o liata a ngia thei awpa châ va na. He su liana chhao heta na hnohta viahchhâ a nie thei awpa nata ti a doh thei awpa châ va na.

¹⁷ Abeipa bie ta ei hnohta, ‘Cha liata viahchhâ na nie awpa châ leipa ta, ti chhao na do awpa châ leipa ta, nâ vyna lâpi lâta nâ lie heih awpa châ vei,’ tahpa ta eina chho haw,” tah ta.

¹⁸ Hrohsopa ta a hnohta, “Kei chhao he nâ hawhta hrohsopa ei châ hra. Vâlyuhchâpa ta ei hnohta, ‘Viahchhâ zy niepa ta, ti zy doh awpa ta, na hnohta na o lâ a chhi mah y,’ tahpa ta Abeipa bie ta eina chho,” tah ta. Cha cha haipa bie a chhopa a châ.

¹⁹ Chatanachata Khazohpa chyhsa cha hrohsopa hnohna chata a lie ha ta. A o liata viahchhâ zy niepa ta, ti zy doh ta.

²⁰ Tlâhkhai ama dôh nota, a kuakheituhpa hrohsopa hnohta Abeipa bie vaw tlô ta.

²¹ Hrohsopa ta Zudâh râh tawhta a vypa Khazohpa chyhsa hnohta, “Abeipa ta hetana heta a tah: ‘Abeipa bie a ngiah leipa chi ta, Abeipa na Khazohpa ta bie a cha piepa zyh leipa chi ta,

²² a vaw lie chi ta, “Viahchhâ nie leipa la, ti chhao doh khah y,” a cha tahna su liata viahchhâ nie chi ta, ti na dopa vâta, châ pathlatuhpazy thlâ liata na ri a zia aw vei,’ a tah” tah ta.

²³ Viahchhâ nie ta, ti a do khai tawhta, hrohsopa ta Khazohpa chyhsa â lie kheipa châta alâ ky padiapa ta.

²⁴ Khazohpa chyhsa cha sie ta, lâpi liata chakeibarôhneipa ta vaw y khâh ta, siesao ha ta. A ri cha lâpi liata a thy thlâh ha ta, alâ cha a kiapâh liata a duah ta, chakeibarôhneipa chhao cha a ri kiapâh liata a duah thlâh ha hra ta.

²⁵ Cha su a chapiapa chyhsazy ta lâpi liata ri â thy thlâh hapa nata ri kiapâh liata chakeibarôhneipa a duah thlâh hapa cha hmô ei ta. A vy ei ta, cha thâtih cha hrohsopa pawpipa yna khih liata reih ei ta.

²⁶ Cha thâtih cha lâpi tawhta ano a vaw kua kheipa hrohsopa khata a thei nahta, “Abeipa bie a ngiah leipa Khazohpa chyhsa kha a châ chuh. Abeipa ta a hnohta a reipa bie hawh tlai ta, Abeipa ta chakeibarôhneipa lâta hlâ ta, vaw chaphy ta a siesao hapa a châ chuh,” tah ta.

²⁷ A sawchapawzy hnohta, “Alâ ky na padiapa teh u,” tah ta. Padiapa ei ta.

²⁸ Sie ta, lâpi liata a ri â thy thlâh hapa nata a ri kiapâh liata alâ nata chakeibarôhneipa a duah thlâh hapa zy cha kei hmô ta. Chakeibarôhneipa ta a ri cha vaw nie leipa ta, alâ chhao cha hmah vaw paphao vei.

²⁹ Hrohsopa ta Khazohpa chyhsa ri cha la ta, alâ chô liata khaih ta, mâchhiesapa awpa nata pabu awpa ta, ano pahrâna khihpi lâ a lie khei ta.

³⁰ A ri cha ano thlâ liata pazia ta, “A pei rimâ cha, ei unawhpa!” tahpa ta ama chakhei.

³¹ A pabu khai nahta, a sawchapawzy hnohta, “Ei thi tita, Khazohpa chyhsa pabuna thlâ liana heta na vaw pabu u la, ei rupazy he ano rupazy kiapâh liata vaw soh muh vy.

³² Khazohpa bie ta Bethel liata maisâh nata Samâri khihpizy liata su sâhpa o zydua a awsaona biezy kha a vaw tlô thlyu awpa châ tlôh ta,” tah ta.

³³ Cha hmo a vaw tlô khai tawh chhao ta, Zerôbaw cha a yzie doleipa pathleih hlei leipa ta, Izarei chi to hry tawhta chyhsazy cha su sâhpa theihthaipazy châta tao lymâ ta, theihthaipa a châ khohpa maih su sâhpa theihthaipazy châta a rao lymâ ei.

³⁴ Cha hmo cha Zerôbaw pathlazy châta moleina vaw châ ha ta, âmo a pamuatuhpa nata khizaw tawhta âmo a pahleipadiatuhpa a vaw châ haw.