1 ABEIZY 12 - Mara Bible RV (BSI)

Bei Rehôbaw hruna

¹ Izarei saw zydua ta Rehôbaw cha bei ta tao awpa ta Sekhe liata a hmaoh ei ta, chavâta Rehôbaw cha Sekhe lâ sie ta.

² Cha thâtih cha Nebâ sawchapawpa Zerôbaw ta a theipata nahta, Izi râh tawhta a kaw lie ta. Zerôbaw cha Bei Sawlawmaw riahchi ta â râna Izi râh liata a y thlâh ha chy no châ ta.

³ Chyhsa tuah ei ta, kei padysa ei ta. Zerôbaw nata Izarei a hmaohpakhypa zydua a vy ei ta, Rehôbaw hnohta,

⁴ “Na paw khata eima raopaky pahri ngaita tyh ta. Chavâta na paw ta rie miah patheipa nata raopaky a hri ngaitapa eima chô liata a pahniehpa he miah pahuapa la, chatanachata eima cha chakao aw,” tah ei ta.

⁵ Rehôbaw ta ama hnohta, “Noh thôh chhôh a di chy u la, cha khai tawhta kei lâ a vy heih muh vy,” tah ta. Chatanachata zawpizy cha sie ha ei ta.

⁶ Bei Rehôbaw ta a paw Sawlawmaw a hro nota, a hmiakô liata a duah tyhpa pawhrâhpazy a saohiah ta, ama hnohta, “He zawpizy he kheihawhta a chhy awpa ta ma ryh eina raokhei aw ei chi?” tah ta.

⁷ Âmo ta a hnohta, “He zawpizy chakaotuhpa ta tanoh y la, âmo cha chakao la, bie phapa ta nâ chhy khiah ei ta cha, chhâzaw ta châ chakaotuhpa ta ama y aw,” tah ei ta.

⁸ Châhrasala pawhrâhpazy ryhraokheina cha thy ta, ano richâhkha thyutlia a hmiakô liata a duah tyhpazy tlao a saohiah ta.

⁹ Ama hnohta, “‘Na paw ta raopaky miah a pakypa miah pahuapa teh,’ nâ tahpa zawpizy he kheihta a chhy awpa ta ma ryh eina raokhei aw ei chi?” tah ta.

¹⁰ A richâhkha thyutliazy ta a hnohta, “‘Na paw khata eima raopaky pahri ngaita tyh ta, nâ ta cha miah pahuapa teh,’ châ tahtuhpa, cha zawpizy hnohna chata, ‘Ei paw byhpizy hlâta ei kuparo tieta a lai via.

¹¹ Ei paw khata raopaky a hri ngaitapa cha pakysa ei ta, kei ta nama raopaky ei baichha aw. Ei paw ta sôsi ta cha chhorei ei ta, kei ta râh cha-ia ta ei cha chhorei aw ei,’ tahpa ta nâ chhy aw,” tah ei ta.

¹² Zerôbaw nata zawpi zydua cha abei ta, “Noh thôhna noh ta a vy heih muh vy,” a tahpa hawhta, a noh thôhna noh ta Rehôbaw lâ a vy ei ta.

¹³ Abei ta zawpizy cha reih chahrâh kawpa ta a chhy ta, pawhrâhpazy ta ryhraokheina ama piepa cha a pyh leipa ta,

¹⁴ thyutliapazy ryhraokheina hawhta âmo cha a chhy ta, ama hnohta, “Ei paw ta raopaky a hri ngaitapa cha paky ei ta, kei ta nama raopa­ky ei baichha aw. Ei paw ta sôsi ta cha chhorei ei ta, kei ta râh cha-ia ta ei cha chhorei aw ei,” tah ta.

¹⁵ Zawpi bie cha abei ta nathlie khoh vei. Abeipa ta Silô chyhsa Ahiza hmâpa ta Nebâ sawchapawpa Zerôbaw hnohta bie a reipa a vaw tlô thei nawpa ta, Abeipa ta a pataosapa a châ.

Khinarâh â pachhaih

¹⁶ Abei ta ama bie nathlie khoh vei tahpa Izarei saw zydua ta ama hmô nahta, zawpi ta, “Dâvi liata tovyuh hnei leipa pi ta, Zese sawchapawpa liata ryuto hnei ma pi! Hy Izarei, nama poh o chyu lâ a di teh u; Nâ Davi, na chhôhkha tlâ pachâ teh,” tahpa ta abei cha a chhy ei ta, Izarei sawzy cha ama poh o lâ chyu a di ha ei ta.

¹⁷ Rehôbaw cha Zudâh khihpizy liata a pahrâpa Izarei sawzy chô lia deita â bei.

¹⁸ Bei Rehôbaw ta raihriatuhpazy hyutuhpa Adôrâ cha Zerôbaw py lâ tuah ta, châhrasala Izarei saw zydua ta alô ta vawhsao ha ei ta. Chatawhcha Bei Rehôbaw cha talailih liata thlai kiah ta, Zerusale lâ â râ haw.

¹⁹ Chatanachata Izarei sawzy cha tanoh taihta Dâvi pathlazy amâ chariah lymâ.

²⁰ Zerôbaw â kaw lie haw tahpa Izarei zydua ta ama thei nahta, a hmaohpakhyna liata a vy awpa ta paawsa ei ta, Izarei zydua chô liata bei ta ama tao haw. Zudâh chi tah leipa ta cha Dâvi pathlazy a pazipa ahy hmahta y vei ei.

²¹ Rehôbaw cha Zerusale a tlô nahta, Izarei maw lâ chizy a dyuh ta, khinarâh cha Sawlawmaw sawchapawpa Rehôbaw khinarâh ta pachâsa heih awpa ta, Zudâh pathla zydua nata Benzami chi tawhta pasaipha chaipazy 180,000 awpakhy ta.

²² Châhrasala Khazohpa chyhsa Semiah hnohta Khazohpa bie vaw tlô ta,

²³ “Sawlawmaw sawchapawpa, Zudâh bei Rehôbaw hnohta nata Zudâh nata Benzami pathla zydua hnohta nata zawpi zydua hnohta,

²⁴ ‘Abeipa ta hetana heta a tah: Nama khy awpa châ leipa ta, nama unawhpa Izarei sawzy namâ kaw dyuh awpa châ vei. Nama o chyu lâta a di ha teh u. He bie he keima tawhta a puapa a châ,’ tahpa ta reih teh,” tah ta. Abeipa bie cha thei ei ta, Abeipa bie hawhta, o lâ a di ha ei ta.

Zerôbaw ngôh viahchaotawzy

²⁵ Zerôbaw cha Epharai tlâh râh liata Sekhe khih padua ta, cha liata pahrâ ta. Cha tawhna chata pua ta, Penia khihpi padua ta.

²⁶ Zerôbaw ta a palôh ta, “Abeinarâh he Dâvi pathlazy eih a châ thlâh ha heih thei ngyu aw.

²⁷ He phopi heta Zerusale liata Abeipa Achhyna o liata atheihnazy hlâ awpa ta ama khy khiahta cha, he phopi palôh he ama zibeipa Zudâh bei Rehôbaw lâ a heih heih aw ta, kei he na thie aw ei ta, Zudâh bei Rehôbaw lâ amâ palie heih thei ngyu aw,” tah ta.

²⁸ Abei cha chyhsa a saohiah ta, ngôh viahchaotaw pô no tao ta. Zawpi hnohta, “Zerusale lâ khy ngâ thlâh hapa cha nâmo châta rairu ngaitapa a châ. Chavâta Hy Izarei sawzy, moh teh u, hezy he Izi râh tawhta châ kaw chhi papuatuhpa nama khazohzy ama châ hih,” tah ta.

²⁹ Viahchaotaw miakha Bethel liata soh ta, miakha Dânâ liata soh ta.

³⁰ Chazy cha a chhy awpa ta Izarei phopi cha Dânâ taihta sie tyh ei ta. Chavâta cha hmo cha moleina vaw châ ha ta.

³¹ Zerôbaw cha su sâhpazy liata achhyna ozy sa ta, Livai pathla a châ leipa, chi to hry tawhta theihthaipazy rao ta.

³² Zudâh râh liata kyhchhi ama hnei tyhpa hawhta, thla chariena, noh hrawh hleipangawhna noh cha, Zerôbaw ta kyhchhi noh ta rao hra ta, maisâh liata atheihnazy a hlâ tyh. Cha hawhna chata Bethel liata tao ta, viahchaotaw nothlahpa a taopazy lâ cha atheihnazy hlâ ta. Su sâhpa a paduapa châta theihthaipazy cha Bethel liata soh ta.

³³ Ano kho ta a raopa thla, thla chariena, noh hrawh hleipangawh noh liata, Bethel liata maisâh a taopa lâ cha khy tyh ta. Izarei sawzy châta kyhchhi rao ta, maisâh lâ khy ta atheihnazy a hlâ tyh.