1 ABEIZY 11 - Mara Bible RV (BSI)

Sawlawmaw ta Abeipa a tleisai

¹ Sawlawmaw ta Phiraoh sawchanô thota, chihropa chanô hluhpi, Môabâ zuahzy, Amawna zuahzy, Edômâ zuahzy, Sidaw zuahzy, Hiti zuahzy khoh ta.

² Âmo he Abeipa ta Izarei sawzy hnohta, “Âmo nama hnei awpa châ leipa ta, âmo chhao ta ama cha hnei awpa châ vei, ama khazohzy lâta nama palôh ama cha paheihsa thlyu awpa vâta,” tahpa ta a vaw rei hapa phopizy kha ama châ. Cha chihropa zuahzy cha Sawlawmaw ta khohpa ta âmo cha khâchâ patu ta.

³ Abei sawchanô sai ta nôbei 700 hnei ta, nôtho 300 a hnei. A lapinôzy heta a palôh ama patleisa hapa a châ.

⁴ Sawlawmaw cha a vaw machâ nahta, a lapinôzy ta khazoh hropazy lâta a palôh patleisa ei ta, a paw Dâvi palôh hawhta Abeipa a Khazohpa lâta a palôh tlokhuh hlâ thei khao vei.

⁵ Sawlawmaw cha Sidaw mo khazohnô Astarô nata Amawna mo khazoh pasichhihpa Mikô zy a chhy ta.

⁶ Chavâta Sawlawmaw cha Abeipa mohmô liata hmo pha leipa tao ta, a paw Dâvi taozie hawhta, Abeipa cha tlokhuh ta pazi vei.

⁷ Sawlawmaw ta Môabâ mo khazoh pasichhihpa Khemô châta nata Amawna mo khazoh pasichhihpa Môleka châta Zerusale nochhi lâ tlâh liata su sâhpa tao ta.

⁸ Cha hawhna chata chihropa a lapinô zydua châta su sâhpa taopa ta, cha liata ama khazohzy lâta hmohlâpa nata atheihnazy ama hlâ tyh.

Sawlawmaw khakhaipazy

⁹ Sawlawmaw palôh cha, a hnohta ei no po a luahpa Abeipa, Izarei Khazohpa a tleisai hapa vâta, Sawlawmaw chô liata Abeipa a hiehâh ta.

¹⁰ He hmo kyh liana heta, Abeipa ta Sawlawmaw cha khazoh hropazy pazi lei awpa ta bie a pie hapa châ ta. Châhrasala Abeipa biepiepa cha zyh khao vei.

¹¹ Chavâta Abeipa ta Sawlawmaw hnohta, “He hawhta y ha chi ta, zyh awpa ta bie ei cha piepa, ei biehrai nata ei bieraopazy na zyh leipa vâta, khinarâh he cha chhu aw na ta, châ chakaotuhpa ei pie aw.

¹² Na paw Dâvi vâta nâma hro chhôh ta deikua cha, tao mâh leipa aw na ta, na sawchapawpa ku tawhta ei chhu aw.

¹³ Chatahrasala khinarâh cha a zydua ta cha chhu khai aw va na. Nâ chakaotuhpa Dâvi vâta nata ei tlyhpa Zerusale vâta, Izarei chi kha cha na sawchapawpa ei pie aw,” tah ta.

¹⁴ Chatanachata Abeipa ta Edômâ chyhsa Hâdâ cha Sawlawmaw khakhaipa lâta pachâsa ta. Ano he Edômâ râh liata abei pathla a châ.

¹⁵ Edômâ râh liata Dâvi a y nota, chyhsa ama thiepazy pabu awpa ta pheisaih hyutuhpa Zôabâ cha khy ta, Edômâ râh liata chapaw zydua a thie khai hapa kha a châ.

¹⁶ Zôabâ nata Izarei zydua cha cha liata thla charu tlai y ei ta, Edômâ râh liata chapaw zydua a thie khai hlâlei ama ypa kha a châ.

¹⁷ Châhrasala Hâdâ cha a paw chakaotuhpazy hry liata Edômâ chyhsa thokhazy chhaota Izi râh lâ a râ ha ta. He no heta Hâdâ cha hawtita a châ chy.

¹⁸ Midia râh tawhta pua ei ta, Pârâ lâ sie ei ta, Pârâ tawhta chyhsa a chhipa ta Izi râh lâ sie ei ta, Izi bei Phiraoh kô za tlô ei ta. Phiraoh ta Hâdâ cha o pie ta, a nie awpa pachâpa ta, râh chhao a pie.

¹⁹ Hâdâ cha Phiraoh mo a dy kaw ta, chatanachata a lapinô beinô Tâpene narônô cha lapi­nô ta pahneisa ta.

²⁰ Tâpene narônô chata sawchapawpa Kenubâ sapa ta, Tâpene ta a sawchapawpa cha sâhpi a pathleihna taihta Phiraoh o liata mohôh ta. Kenubâ cha Phiraoh o liata Phiraoh sawzy hry liata y ta.

²¹ Dâvi cha a pathlatuhpazy hnohta â mô haw tahpa nata pheisaih hyutuhpa Zôabâ chhao a thi haw tahpa Hâdâ ta Izi râh tawhta a vaw thei nahta, Hâdâ ta Phiraoh hnohta, “Ei râh lâ a lie awpa ta na pasiesa mah y,” tah ta.

²² Phiraoh ta a hnohta, “Ei hnohta na ypa heta khâpa ma a phahla chi ta, na râh lâ a lie awpa cha na khoh tly?” tah ta. Hâdâ ta, “Khâpa hmah a phahla va na. Châhrasala rie na pasiesa thlâh ha teh,” tah ta.

²³ Khazohpa ta Sawlawmaw khakhaipa châta Eliadâ sawchapawpa Rezô chhao pathyu ta. Rezô he a zibeipa Zôbabi bei Hadâdeze tawhta â râpa kha a châ.

²⁴ Ano he Dâvi ta Zôbabi mo a pahnie tawhta, ano lâta chyhsazy awpakhy ta, hraotuhpa py hyutuhpa ta a ypa kha a châ. Dâmaskâ khihpi lâ sie ei ta, cha liata pahrâ ei ta, Dâmaskâ khihpi liata ano cha bei ta ama tao.

²⁵ Ano chhao he Hâdâ hawhna khata Sawlawmaw rie a patheituhpa châ ta, Sawlawmaw hro chhôh zydua ta Izarei khakhaipa châ lymâ ta, Izarei a chhyh thai leipa a châ. Aramia râh chô liata ryureituhpa ta a y.

Zerôbaw ta Sawlawmaw â khakhai

²⁶ Zerôbaw chhao ta abei chô liata a ku hy hra ta. Ano cha Zeredâ khihpa Epharai chyhsa Sawlawmaw chakaotuhpa Nebâ sawchapawpa a châ. A nô moh cha Zerua châ ta, nôhmeipa a châ.

²⁷ Abei chô liata a ku a hyna chhâpa cha he vâna heta a châ. Sawlawmaw ta diahsua chhôh ta, a paw Dâvi khihpi raonazy a taopathi.

²⁸ Zerôbaw cha chyhsa thatlôpa nata riahphapa châ ta, raihria a saomâ kawpa satlia a châpa Sawlawmaw ta a hmô nahta, Zawsi pathla raihriatuhpa zydua chô liata hyutuhpa ta tao ta.

²⁹ Cha daihti liata, Zerôbaw Zerusale tawhta a puapa cha Silôni chyhsa hrohsopa Ahiza ta lâpi liata vaw hmô ta. Ahiza cha chysia thiehpa a tobi ta, ama pano deita ta lyurâhpa liata y ei ta.

³⁰ Ahiza ta a chysia thiehpa â tobipa cha la ta, hlai hrawh hleino lâta hrie ta.

³¹ Zerôbaw hnohta, “Hlai hrawh a la teh, Abeipa, Izarei Khazohpa ta hetana heta a tah: ‘Pachâ teh, khinarâh he Sawlawmaw ku tawhta chhu aw na ta, Izarei chi hrawh ei cha pie aw.

³² Nâ chakaotuhpa Dâvi vâta nata Izarei chi zydua hry tawhta ei tlyhpa Zerusale khihpi vâna heta, ano ta Izarei chi kha a hnei aw.

³³ Kei na tleisaipa ta, Sidaw mo khazohnô Astarô nata Môabâ mo khazoh Khemô nata Amawna mo khazoh Mikô zy a chhy ei ta, a paw Dâvi taopa hawhta ei lâpizy a chhih leipa ta, ei mohmô liata hmo dopa tao leipa ta, ei bieraopazy nata ei ryureinazy a zyh leipa vâta, cha cha ei tao aw.

³⁴ Châhrasala ei biepiepazy nata ei bieraopazy a zyhpa, ei tlyhpa nâ chakaotuhpa Dâvi vâta, khinarâh cha a zydua ta a ku tawhtapa chhu khai aw va na. A hro chhôh zydua cha bei ta ei paysa awh.

³⁵ A sawchapawpa ku tawhta deikua cha khinarâh he chhu aw na ta, Izarei chi hrawhzy cha nâma ei cha pie aw.

³⁶ Ei moh y nawpa ta ei tlyhpa Zerusale khihpi liana heta nâ chakaotuhpa Dâvi cha meiôh a hnei lymâ thei nawpa ta, a sawchapawpa hnohta chi kha ei pie aw.

³⁷ Nâ he bei ta cha tao aw na ta, na palôh khopa hawhta ryureih aw chi ta, Izarei chô liata bei ta na y aw.

³⁸ Bie ei cha piepa zydua nathliepa ta, ei lâpizy a chhihpa ta, nâ chakaotuhpa Dâvi taopa hawhta, ei bieraopazy nata ei biepiepazy zyhpa ta, ei mohmô liata hmo dopa na tao khiahta cha, na hnohta y aw na ta, Dâvi pathla ei paduapa hawhta, na pathla chhao padua aw na ta, Izarei he ei cha pie aw.

³⁹ Cha vâna chata Dâvi pathlazy cha pasa pataosa aw ei na ta, chhâzaw châta deikua la châ aw vei,’” tah ta.

⁴⁰ Cha vâna chata Sawlawmaw ta Zerôbaw cha thie a chhuah ta. Châhrasala Zerôbaw cha thyu ta, Izi râh liata Izi bei Sisâ lâ a râ ta, Sawlawmaw thi hlâlei cha Izi râh liata y ta.

Sawlawmaw thina

⁴¹ Sawlawmaw thâtih hropazy nata a hmotaopa zydua nata a sonazy cha Sawlawmaw hmotaopa rona châbu liata ro khaipa a châ.

⁴² Sawlawmaw ta Izarei râh zydua chô liata Zerusale liata ryu a rei chhôh cha kô sypalih a châ.

⁴³ Sawlawmaw cha a pathlatuhpazy hnohta a mô ta, a paw Dâvi khihpi liata pabu ei ta, a sawchapawpa Rehôbaw ta ano su liata â bei.