1 ABEIZY 10 - Mara Bible RV (BSI)

Sebâ Beinô

¹ Abeipa moh châta a hmotaopazy kyh liata Sawlawmaw moh pathâhnazie zy Sebâ beinô ta a thei nahta, bie khiakhi ngaitapazy ta pasia a chhuahpa ta ano lâ khy ta.

² Zituhpa hluhpi nata ia-ôzy nata ngôh nata lôsôhpa hluhpi a phaohpa râraoseihpazy chhaota Zerusale lâ khy ta. Sawlawmaw kô a tlô nahta, a palôh liata a ypa zydua hiahri ta.

³ Sawlawmaw ta a hiahripa zydua cha a chhy khai ta, abei ta a chhopasia thei leipa bienyupa khâpa hmah y vei.

⁴ Sebâ beinô ta Sawlawmaw sozie zydua, a o sapa,

⁵ a tlâhkhai liata niedo, a beimachâzy atyuna paryhzie, a chakaotuhpazy chakaozie nata amâ tobizie, a nyu hlâtuhpazy nata Abeipa o liata raopa hlâna a hlâpazy a hmôpa cha, a huhiah chhao so pha thei khao leipa ta.

⁶ Abei hnohta, “Na biereipa nata na sozie zy ama reipa ei râh liata ei vaw theipa kha, â vaw do tlai he zaw.

⁷ Châhrasala a khy na ta, ei mo tlai ta ei kaw hmô hlâ heta cha, ama reipa kha zo hlei va na. Â khophie chhao eina chho leipa ei he. Na sozie nata na hneirôhzie he ama reipa ei theipa a khô syulyu haw.

⁸ Na chyhsazy ama nohlao kaw dia! Na hmiakô liata a duah ta, na sona bie a thei tyhpa châ chakaotuhpazy ama nohlao kaw na!

⁹ Na chô liata a ly ta, Izarei beidyuchhai liata châ patyutuhpa Abeipa na Khazohpa cha reithaipa ta y maw sy! Abeipa ta Izarei he chhâzaw ta kyhpachâ ta, chavâta adona nata siana ta ryu na reih thei nawpa ta bei ta a cha tao hih,” tah ta.

¹⁰ Chatanachata Sebâ Beinô ta Bei Sawlawmaw cha ngôh talent 120 nata ia-ô hluhpi nata lôsôhpazy pie ta. Sebâ Beinô ta Sawlawmaw a piepa ia-ô tlu ta a hluhpa a ngia beih khao vei.

¹¹ Ôphi tawhta ngôh a vaw phaoh tyhpa Hirâ balyhzy ta Ôphi tawhta almu tho hluhpi nata lôsôhpazy chhao vaw phaoh ei ta.

¹² Abei ta almu thozy cha Abeipa o nata abei o dyuhna châta nata hlasathaipazy châta totâ nata tlaipihzy taona châta hmâh ta. Cha tlu ta a hluhpa almu tho cha tanoh taihta vaw tlô khao leipa ta, hmô awpa y khao hra vei.

¹³ Bei Sawlawmaw ta Sebâ beinô cha, bei lymâ a piepazy thota, a khopa maih nata a hiapa maih pie ta. Chatanachata a chakaotuhpazy chhaota a râh lâ a lie ha ta.

Sawlawmaw hneirôna nata mohpathâhna

¹⁴ Sawlawmaw liata kô kha chhôh ta ngôh a ngiapa cha talent 666 a châ.

¹⁵ Chazy cha sôdaohpazy, sôhpaliepazy, notla bei zydua nata râh ryureituhpazy ta râhpaw ama piepazy thota Sawlawmaw liata a ngiapa ngôhzy a châ.

¹⁶ Bei Sawlawmaw ta ngôh ta daipa vyhphao laipa 200 tao ta, vyhphao miakha liata ngôh sekel 600 lymâ hmâpa a châ.

¹⁷ Chatawhcha ngôh ta daipa vyhphao 300 tao ta, vyhphao miakha liata ngôh minâ miathôh lymâ hmâpa a châ. Chazy cha abei ta Lebanaw Râhmâhpa O liata soh ta.

¹⁸ Abei ta sianaoh beidyuchhai rônah ngaitapa chhao tao ta, ngôh pha chaipa ta pahu ta.

¹⁹ Beidyuchhai cha a kiana kahmi chhâh charu y ta, beidyuchhai hnôh lâ cha a hlô ta, dyuchhai kâ chavei chachâh ta a ku y ta, a kuzy kiah liata chakeibarôhneipa nothlahpa pô no a duah ta.

²⁰ Beidyuchhai kahmi chhâh charuzy liata a kâ chavei chachâh ta chakeibarôhneipa nothlahpa pô hrawh hleino, chhâh kha liata pô no lymâ ta a duah ta. Cha hawhpa beidyuchhai cha kheihawhpa khinarâh châta hmah tao beih veih ei.

²¹ Bei Sawlawmaw nyu zydua cha ngôh nyu sai châ ta, Lebanaw Râhmâhpa O liata hmobaoh zydua chhao ngôh suapa ta taopa sai a châ. Tâkâ ta taopa y tlâ vei. Sawlawmaw daihti liata la, tâkâ cha khâpa saw ta reih veih ei.

²² Abei ta tilaipi liata Tâsi balyhzy hnei ta, chazy cha Hirâ balyhzy nata sie khoh tyh ei ta. Tâsi balyhzy chata kô thôh padai ta ei kha ngôh, tâkâ, sianaoh, veituh nata varapa zy vaw phaoh tyh ta.

²³ Cha hawhna chata Bei Sawlawmaw cha hneirôna nata sona liata khizaw bei zydua a khô khai ha ei.

²⁴ Kha­zohpa ta a palôh liata sona a sopa nathlie awpa ta, khizaw zydua ta Sawlawmaw cha ama pangai tyh.

²⁵ A pangaipa maihta kuhriazy phaopa tyh ei ta, tâkâ nata ngôh hmobaohzy, chysiazy, myrâzy, ia-ôzy, arâzy, sabaituzy kô chareih ta ama vaw phaopa tyh.

Sawlawmaw arâ nata talailihzy

²⁶ Sawlawmaw ta talailihzy nata arâ pheisaihzy pahmaoh pakhy ta. Talailih 1,400 nata arâ pheisaih 12,000 hnei ta, chazy cha talailih sona khihpizy nata abei yna Zerusale liata soh ta.

²⁷ Abei ta tâkâ cha alô hawhta pachâna taihta Zerusale liata pachô ta, sidy tho chhao Sephelâ liata theiku tho hawhta hluhpa ta a pachô.

²⁸ Sawlawmaw arâzy cha Izi râh tawhta nata Kue tawhta chaleipa châ ei ta, abei sôhpalietuhpazy ta a mâ piepa ta Kue liata amâ hlâ tyh.

²⁹ Talailih miakha ta sekel 600 lymâ ta nata arâ pô kha ta sekel 150 lymâ ta Izi râh lâ za chalei ei ta, abei sôhpalietuhpazy hmâpa ta Hiti beizy nata Syria beizy lâta ama zuah pachhuah tyh.