1 ABEIZY 1 - Mara Bible RV (BSI)

Dâvi chakaotuhnô laihsa kôpa Abisâ

¹ Bei Dâvi cha machâ ha ta, a kô chhao uhthei kaw bâ ta. Pohzy ama bupa chhao ta lalôh thei khao leipa ta.

² Chavâta a chakaotuhpazy ta a hnohta, “Ei zibeipa abei châta laihsa kôpa tluapa châ sala, abei mohôhpa ta chakao mawh sy. Na kalachhôh liata a zia aw ta, ei zibeipa abei cha a lalôh thei aw,” tah ei ta.

³ Chatanachata Izarei râh zydua liata laihsa chhithaipa tlua ei ta, Sunâ zuah Abisâ hmô ei ta, abei lâ a chhi ei ta.

⁴ Cha laihsa cha chhithai ngaita ta, abei mohôhtuhpa ta y ha ta. Abei cha chakao ta, châhrasala abei ta ano cha a ziakhei vei.

Adôniza ta bei ta â tao

⁵ Haki sawchapawpa Adôniza cha anosasyh ta a chaluahpa ta, “Kei he a bei awpa ei châ,” tah ta. Chatanachata talailihzy nata ano hmia lâta a râ awpa arâ pheisaihzy sypangawh pachhuahpanoh ta.

⁶ Adôniza he a paw ta, “Khazia cha ta kha ta na tao?” tahpa ta a palôh châ leina khati nota hmahta a vaw chho beih leipa a châ. Ano chhao he hmipha ngaitapa châ ta, uhtheina lâta Absalaw a pazipa a châ.

⁷ Adôniza ta Zeru sawchapawpa Zôabâ nata theihthaipa Abiathâ a saohiah ta. Ama pano ta Adôniza cha pazipa ta bao ei ta.

⁸ Theihthaipa Zadô, Zehôdâ sawchapawpa Benai, hrohsopa Nâthâ, Simei, Rei nata Dâvi pasaiphazy deikua cha Adôniza chhâh a châ leipa ei ta.

⁹ Adôniza cha mietakuzy, viahchao tôhpazy nata sahroh dawpa pathawhpazy ta Erôke chheipâh ta a ypa Zôhele Lô liata atheihna hlâ ta. Abei sawchapawpa a unawhpa zydua nata Zudâh râh liata beimachâ zydua hrua khai ta.

¹⁰ Châhrasala hrohsopa Nâthâ, Benai, pasaiphazy nata a unawhpa Sawlawmaw deikua cha hrua leipa ta.

¹¹ Nâthâ ta Sawlawmaw nô Bâsebâ hnohta, “Haki sawchapawpa Adôniza cha abei châ ha ta, cha kyh cha eima zibeipa Dâvi ta a pahno leipa kyh thei va chi ma?

¹² Tahmâ a vy teh, nâ nata na sawchapawpa Sawlawmaw hrona a boh nawpa ta pachâna ei cha pie aw.

¹³ Bei Dâvi lâ thlai a kei ngia la, a hnohta, ‘Hy ei zibeipa abei y, châ chakaotuhnô hnohna heta, “Na sawchapawpa Sawlawmaw he keima hnôhlâ ta bei vaw châ aw ta, ano he ei beidyuchhai liata a tyuh awpa a châ,” tahpa ta bie nâ taih ha va chi ma? Khazia Adôniza cha bei a châ ha tly?’ kei tah mah y.

¹⁴ Abei bie na chho hai nota kei chhao a vaw ngia aw na ta, na biezy ei vaw pa-i aw,” tah ta.

¹⁵ Chatanachata Bâsebâ cha abei lâ vawh ta, a chhôhpadâhpa liata a kei ngia ta. Abei cha a machâ kaw bâpa vâta, Sunâ zuah Abisâ ta abei cha chakao ta.

¹⁶ Bâsebâ ta abei cha a bôhpa ta a naoh ta, abei ta, “Khâpa na khoh?” vaw tah ta.

¹⁷ Bâsebâ ta, “Ei zibeipa y, Abeipa na Khazohpa moh reipa ta châ chakaotuhnô hnohna heta, ‘Na sawchapawpa Sawlawmaw he keima hnôhlâ ta bei vaw châ aw ta, ano he ei beidyuchhai liata a tyuh awpa a châ,’ tahpa ta bie nâ taih chi ta.

¹⁸ Tahmâ pachâ tua, Adôniza ta tlao â bei haw. He kyh he ei zibeipa abei ta pahno ngyu va chi.

¹⁹ Viahchao tôhpazy, sahroh dawpa pathawhpazy nata mietakuzy thata thie ta, abei sawchapawpa zydua hrua ta, pheisaih hyutuhpa Zôabâ chhao hrua ta, châ chakaotuhpa Sawlawmaw deikua cha hrua vei.

²⁰ Ei zibeipa abei y, ei zibeipa abei hnôhlâ ta na beidyuchhai liata a tyuh awpa ahy ma a châ aw tahpa na rei awpa hâpa ta, Izarei zydua ta ama cha mokhâh thlâh haw.

²¹ Chataleipatala he hawhta a vaw châ pathlei aw na. Ei zibeipa abei he ano a pathlatuhpazy hnohta â mô tita cha, kei nata ei sawchapawpa Sawlawmaw he hmoparaotuhpazy hawhta pachâpa eima châ aw,” tah ta.

²² Bâsebâ ta abei hnohta bie a rei hai nota, hrohsopa Nâthâ a kei ngia ta.

²³ Abei hnohta, “Hrohsopa Nâthâ â vy,” tahpa ta chho ei ta. Nâthâ cha abei hmiakô a kei tlô nahta, abei hmiakô liata a hmia alei lâ a khupa ta a bôh ta.

²⁴ Nâthâ ta, “Hy ei zibeipa abei y, ‘Keima hnôhlâ ta Adôniza he a bei aw ta, ano he ei beidyuchhai liata a tyuh awpa a châ,’ na tah ma?

²⁵ Tanoh zu ta, viahchao tôhpazy, sahroh dawpa pathawhpazy nata mietaku­zy thata thie ta, abei sawchapawpa zydua nata pheisaih hyutuhpazy nata theihthaipa Abiathâ zy hrua ta. Adôniza hmiakô liata niepa ta doh ei ta, ‘Bei Adôniza hroh pareih mawh sy!’ ama tah.

²⁶ Châ chakaotuhpa keima, theihthaipa Za­dô, Zehôdâ sawchapawpa Benai nata châ chakaotuhpa Sawlawmaw zy deikua cha miah hrua vei.

²⁷ He hmo he ei zibeipa abei hmo taopa a châ tlôh khiahta cha, ano hnôhlâ ta ei zibeipa beidyuchhai liata ahy ma a tyuh aw tahpa kyh liata, châ chakaotuhpazy he miah na vaw chho beih leipa ma a châ ha tly?” tah ta.

Sawlawmaw â bei

²⁸ Bei Dâvi ta a chhy ta, “Bâsebâ na awpa teh u,” tah ta. Bâsebâ cha abei yna lâ vawh ta, a hmiakô liata a kei duah ta.

²⁹ Abei ta Bâsebâ cha bie a taih ta, a hnohta, “Nôpona zydua liata ei thlahpa a chatlaituhpa Abeipa moh reipa ta ei reih,

³⁰ Abeipa Izarei Khazohpa moh ta, ‘Na sawchapawpa Sawlawmaw cha keima hnôhlâ ta a vaw bei aw ta, keima vyuhpa ta ei beidyuchhai liata a tyuh awpa a châ,’ tahpa ta bie ei châ taih hapa hawhna khata, tanoh he ei tao tlai aw,” tah ta.

³¹ Bâsebâ cha a hmia alei lâ a khupa ta a bôh ta, abei cha a naoh ta, a hnohta, “Ei zibeipa Bei Dâvi cha chhâzaw ta hroh mawh sy!” tah ta.

³² Chatawhcha Bei Dâvi ta, “Theihthaipa Zadô nata hrohsopa Nâthâ nata Zehôdâ sawchapawpa Benai zy na awpa teh u,” tah ta. Chatanachata abei hmiakô lâ a vy ei ta.

³³ Abei ta ama hnohta, “Nama zibeipa chakaotuhpazy a chhi u la, ei sawchapawpa Sawlawmaw cha keima alâ chô liata pakiasa u la, Kihaw lâ a chhi teh u.

³⁴ Cha liata, theihthaipa Zadô nata hrohsopa Nâthâ ta Izarei bei châta sathaw za thu mawh ei sy. Cha khai tawhta chiahmie tô aw ei chi ta,, ‘Bei Sawlawmaw hroh pareih mawh sy!’ nama tah aw.

³⁵ Ano cha kaw pazi aw ei chi ta, a khy aw ta, ei beidyuchhai liata a tyuh aw ta, keima vyuhpa ta bei a châ aw. Izarei nata Zudâh chô liata ryureituhpa ta ano cha ei rao haw,” tah ta.

³⁶ Zehôdâ sawchapawpa Benai ta abei cha a chhy ta, “Amen! Abeipa, ei zibeipa Khazohpa ta reih tlai mawh sy.

³⁷ Abeipa ta ei zibeipa abei cha a ypâ tyhpa hawhna khata, Sawlawmaw hnohta chhao y lymâ sala, a beidyuchhai cha ei zibeipa Dâvi beidyuchhai hlâta parônahsa via mawh sy,” tah ta.

³⁸ Chatawhcha theihthaipa Zadô, hrohsopa Nâthâ, Zehôdâ sawchapaw­pa Benai, Khere mo nata Pele mozy cha zu ei ta, Dâvi alâ chô liata Sawlawmaw cha pakiasa ei ta, Kihaw lâ a chhi ei ta.

³⁹ Cha liata, theihthaipa Zadô ta poh o lâ saki sathaw ôh kei la ta, Sawlawmaw cha sathawthu ta. Chiahmie tô ei ta, zawpizy ta, “Bei Sawlawmaw hroh pareih mawh sy!” tah ei ta.

⁴⁰ Zawpi zydua ta ano cha kaw pazi ei ta, ramozy tô ei ta, alei â patlaw khai ha khiah ma tah ngâna taihta a ly ngaitapa ta thata awh ei ta.

⁴¹ Ama kyhchhi a pai nahta, Adôniza nata a hruapa sahlao a hnohta a ypa zydua ta pyu cha thei ei ta. Chiahmie pyu a thei nahta, Zôabâ ta, “Khihpi chhôh liata pyu kalihpi to ngâpa cha khâpa pyu ma a châ tly?” tah ta.

⁴² Bie a rei hai no tlai chata, moh teh u, theihthaipa Abiathâ sawchapawpa Zawnathâ za tlô ta. Adôniza ta, “A vy tua, nâ cha chyhsa siapa châ chi ta, thâtih phapa na za tlôkhei thlyu na,” tah ta.

⁴³ Zawnathâ ta a chhy ta, Adôniza hnohta, “Thâtihpha za tlôkhei va na, eima zibeipa Bei Dâvi ta Sawlawmaw cha bei ta a tao haw.

⁴⁴ Theihthaipa Zadô, hrohsopa Nâthâ, Zehôdâ sawchapawpa Benai, Khere mo nata Pele mozy cha abei ta Sawlawmaw hnohta pasiesa ta, abei alâ chô liata pakiasa ei ta,

⁴⁵ theihthaipa Zadô nata hrohsopa Nâthâ ta Sawlawmaw cha bei châta Kihaw liata sathaw ama thu haw. Cha su tawhta thapha ngaitapa ta khy ei ta, cha chata khihpi chhôh a khaipalie ngâ kawpa a châ. Cha cha a pyu nama theipa cha a châ.

⁴⁶ Sawlawmaw cha khinarâh beidyuchhai liata â tyuh haw.

⁴⁷ Cha dei châ vei, bei chakaotuhpazy a vy ei ta, eima zibeipa Bei Dâvi cha a vaw lykhei ei ta, ‘Na Khazohpa ta Sawlawmaw moh cha nâma moh hlâta pathâhsa via sala, a beidyuchhai cha nâma beidyuchhai hlâta parônahsa via mawh sy,’ ama tah. Abei chhao ta a rakhô liata a bôhpa ta â naoh ei.

⁴⁸ Chatawhcha abei ta, ‘Abeipa, Izarei Khazohpa cha reithaipa ta y mawh sy! Ei beidyuchhai liata a tyuh awpa tanoh rao ha ta, ei mo tlai ta ei hmô haw,’ tahpa ta a rei pâ cheingei,” tah ta.

⁴⁹ Adôniza hruapa chyhsa zydua cha a chalyu ei ta, thyu ei ta, ama lâpi chyu lâta sie khai ha ei ta.

⁵⁰ Adôniza chhao ta Sawlawmaw cha chi ngaita ta, thyu ta, sie ta, maisâh kizy kei patu ta?

⁵¹ Sawlawmaw hnohta, “Adôniza ta Bei Sawlawmaw cha chi ta, chavâta maisâh kizy patu ta, ‘Bei Sawlawmaw ta a chakaotuhpa he zaozi ta thie lei awpa ta bie nâ taih ha tua mawh sy,’ a tah,” tahpa ta chho ei ta.

⁵² Sawlawmaw ta, “Chyhsa ngâchhihpa a châpa a palâsa khiahta cha, a sâbu miakha chhao alei liata tla aw vei. Paraona ano liata hmôpa a châ khiahta deikua cha a thi aw,” tah ta.

⁵³ Bei Sawlawmaw ta chyhsa tuah ta, Adôniza cha maisâh tawhta a zâ chhi ei ta. Adôniza cha a vy ta, Bei Sawlawmaw cha a naoh ta, Sawlawmaw ta a hnohta, “Na o lâ a di mah y,” tah ta.