Yohaannisi 7 - Mataafa Qulqulloota

Yesuusi akka xayso nessuma shaakka ulfeessa Yursaalamipa aano'e kaassatame

¹ Se kammaayye Yesuusi piita Keliila oppa pora anni. Qoota Yihutaata isha ikassa faanitto malla, piita Yihuta oppa pora aaneta in heenananne.

² Sitiiyyi xayso nessuma shaakka a Yihutaata, kela'e foolsatte.

³ Semmalla hella a opa Yesuusi ka Yesuusi kapopa de'en ka ishi kidene, “Tamaarewwaatti akka koda atti koonitto akkane'e, areeyye xa'e ka piita Yihuta opa aane.

⁴ Nama orra tura fayya upnaysama heeno, dekandekatti kodaadi kooni in cooy. Atti otoo wessen piisa koonittooyye, orra piitati isi akkissa ke parpaaccisniiyi”

⁵ Wa malla asse kidene, qoota hellaasso nefo isha in amannin malla.

⁶ Yesuusi ka ishootta kide, “Etaayyo ata in kayne ma, xaayshin Etaassin awta piisa ishina ettanni.

⁷ Orra piita ishin needdatta in ettansho, ma anti qootan akka kodaaysho neeqi ishootta qara maakkummo malla, xayyo i'ana needdan.

⁸ Ishina xayso nessumooseneti aana; anti qoota Etaayyo in kaynin malla, xayso nessumooseneti an aanooy.”

⁹ Ka asse kide ka Kelila kara hase.

Yesuusi akka xayso nessuma a shaakka oppa akkaade

¹⁰ Ma xoori a hellaasso xaysonessumaseneti aanen kammaayye, Yesuusi orra tura in akkaanne ma dekandekatti xayso nessumoosen oppopa aane.

¹¹ Xayso nessuma sene oppaayye Yihutaata ka pora isha faani ka ikiini, “Aysha ca?”

¹² Samayta ka qoota Yesuusi desa hushushattaan olli torraanni. A demo ka kiini, “Isha nama fayya.” A demo ka kiiniwwi, “Inna, isha, akka samayta kamma dapo'e kooni.”

¹³ A koddito ma ukkumampaya a Yihuta fuura minanne, nama takkan nefo qootaadi desa fuule desa in haasawanne.

¹⁴ Ete xayso nessuma otantoppa kayteeyye, Yesuusi tika qulqulloota kelopa aane ka kollissa paayye.

¹⁵ Yihutaata ka oppa qawwaawni ka kiini, “Namoose a in kollannin mali atta sede piisa upnaatta ettanshe?”

¹⁶ Semmalla Yesuusi ka oorshe ka kide, “Ha kollissiyo Waaqa Aappa isase ana erke kapa de'e diisheey, isi kareela an qeenne.

¹⁷ Nama heenna isase ana erke koda faano otoon icaayye, kollissoose akka Waaqa kapa de'e, taaki an anti isi kareela haasawade kodde i'upnaada.

¹⁸ A iskareela haasawanno ulfeena mattaadi'i faani, a ulfeena isase isha erkeeti faano xoori, dukaallayta, umma darta isha oppan kitto.

¹⁹ Muuse seera ishina'en daanne? Ma xoori ishin oppaayye nama seera tooytaanno takka nefo in co; ishina maana'e ana ikassa faanittan?”

²⁰ Samaytase ka ishi kide, “Atti orritta ke kara ca diishe, ayno ke ikassa faani?”

²¹ Yesuusi ka oorshe ka ishootta kide, “Anti koda takkan kode, akka pisanti kodoose oppa qawwaanittan,

²² Muuse aata dawra qara muratta'e ishina daashe. Aatoosen nefo aappada qara de'en diisheey, Muuse quda in deene; ha ishina nefo sampatanne nama dawra qara murrittan

²³ Ka kuli akka seerase Muuse qudan daasame in shaarammini'i, oto sampatan nama dawra qara muraneeyye, qootan anti sampatan dakinta nama immakkoota dinshe malla, maana'e miironnittan?

²⁴ Firteeta dukaata' farata diishe, fuula nama tooyeetan qatayma an faratan.”

Shiishsha qoota Kiristoosi desa xa'e

²⁵ Orra Yursaalami oppa a demo ka kidene, “Namase a ikassa faanan sedenne?

²⁶ Tin isha fuuloppa desa haasawanni, umma ishootta we ishi kiini in caan. Hela namoose akkima Kiristoosi kodde ukkumampaya idukaatan upnaadene?

²⁷ a koddito ma ino namoose ayshaayye akkima de'e in upna. Ma Kiristoosi oto de'o ayshaayye akkima de'e, nama takka nefo in upnaado.”

²⁸ Semmalla Yesuusi a tika qulqulloota kela kollinnooyye, nessaadi kuttishe ka kide, “Ishina i'ana uptan ka pora an ishi de'e nefo uptan. Ma xoori anti issin an deene ma, a'ana erke dukaallayta, ma xoori ishina a isha a uptan.

²⁹ Anti xoori qootan isha kapa de'e, isha ka ana erke malla in isha upa.”

³⁰ Sitiiyyi ikka isha qapa faden; ma qoota etaadi in kaynin malla, nama takka nefo isha in qapne.

³¹ A koddito ma, samaytoppaayye orra lekayta isha amane ka kide, “Hela Kiristoosi oto de'oyye, kodadda orra qawwanna a namoose kode qara qapa'e koda?”

Foolisoota akka Yesuusi qapa erkamte

³² Feresata ka a orra, qoota Yesuusi desa hushushattaan haasawanno dakayte, saarra qeesewwa isho Feresaata ka se minan Yesuusi qapsiisa'e, tooytampaya a tika qulqulloota erkite.

³³ Sitiiyyi Yesuusi ka kide, “Anti shakkayteeta'en ishin kapa jara ka sekkammaayye isase ana erke kapopa aana.

³⁴ Ishina ka pora ana faatan, umma ana a akkittan; umma pora an oppa co oppopa deena a ettanissan.”

³⁵ Semmalla ukkumampaya a Yihuta ka olli kidene, “Akkan ino isha an teynini'i namoose ayshopa aana? Hela takka punu Yihutaatase Kirikketoppa paste oppopa aana ka orra a Waaqa amanni in kinnin kollisha?

³⁶ Ini a kiino ‘Iana faatan ka ana daptan, umma pora an anti oppa co opa deena a ettanissan’ Maana kideetaadi?”

Yesuusi paada pisha a caatta

³⁷ Kuyyaatase kutta a oppa xayso nessuma dikkannaaneeyye, Yesuusi iqa'ade ka nessaadi kuttishe ka kide, “Nama a pisha deepoode oton i caayye, a ana kapopa de'o ka ikko.

³⁸ Nama ana amanno, akka mataafa qulqulloota kiino mina'e, ‘Paada pisha caatta'e isha karaayye paadaay.’”

³⁹ Sede nefo Hapurase a Qulqulloota, a orra isha amanno kuli teyyado desa, asse haasawade. Qoota Yesuusi ulfeena oppopa in faayyannin malla, Hapura Qulqulloota sitiiyyi ata in daasammeey.

Samayta akka olli' qite

⁴⁰ Se malla samaytoppaayye orra demo ete qaalese dakayeeyye ikide, “Xuumampaytase kiinaane ‘Ide'a’ dukaatannen isha.”

⁴¹ A pila ka kiiniiwi, “Ini Kiristoosi” Apila xoori ikiinii, “Kiristoosi xawwa Kelilaayye de'a?

⁴² Kiristoosi akka sanynyeeta Taawwiti oppa delado ka Peetelehemi katama sene a Taawwiti oppaayye de'o, mataafa qulqulloota qara intaafamme?”

⁴³ Se malla isha minan samayta ka olli qite.

⁴⁴ A demo isha qapa fade, ma xoori nama takka nefo isha in qapne.

Saarra Yihutaata akkima in amannin

⁴⁵ Se kammaayye tooytampayasene ka saarra qeesewwa isho Feresaata kapopa tiitaawen. Ishootta ka tooytampayaseneti kidene, “Maana malla ishan a' deenin?”

⁴⁶ Tooytampayasene ka oorshen ka kidene, “Haasa a namoose haasawanna, paha nama apari in haasawanne ka in upo.”

⁴⁷ Feresaata xoori ikiite, “Hela ishin kuli kamma dapeewwe?

⁴⁸ Hela xawwa ukkumampaya isho feresata oppa a isha amane ica?

⁴⁹ Samayse seera Muusen in upnin dukaatanneen a jiijame.”

⁵⁰ Niqodimoosise Feresaatoppa takka kodde ka se turan Yesuusi kapopa aane, i'ishootta kide,

⁵¹ “Akka seerinno' qara'e, nama takka wa ishin xasasame, mina'e; malseeta a oorsanno a opani qara in dakaynini ka wa kode in upanaannin maliiyyi iqara faratammi?”

⁵² Ishootta ka ishi kidene, “Hela atti nefo Kelilaayye deete? Xuumampayta akka Keliila karaayye in xaanin qorado ikka ke kalto”

⁵³ Ka takka takka tikkaasso opa kalen.