Yohaannisi 6 - Mataafa Qulqulloota

Yesuusi akkima nama kuma ken damshe

¹ Se kammaayye Yesuusi pakateetase a Kelila Tipraadoosi kidammittooyye afa disi opa tuulle.

² Isha qoota paaqolaya dinissaan wa orra qawwanna lekaya kode malla, orra sede akke lekayta, isha kamma aane.

³ Yesuusi ka irroota qaropa fayyade ka tamaarewwaadi olli eyye qa'e.

⁴ Sitiiyyi xayso nessuma a qaran tarpeeta a Yihuta kela'e foolsatte.

⁵ Yesuusi ka ela kide ka samayta kuttayta a isha kapopa deeno akke ka Filippoosi kide, “Damta orrose piisa kayto ayshaayyen pidda ettaninna?”

⁶ Yesuusi wa malla asse kide, Filippoosi ekkaysatta'e diisheey, wa koda isha mattaadi i'upa.

⁷ Filippoosi ka isha oorshe ka kide, “Laaqqota a pirreeta dippa lakki nefo ishootta mina moossota moossota in kayto.”

⁸ Tamaarewwaadi oppaayye inna a opa Simoon Peetiroosi intiriyaasi ikide,

⁹ “Ha inna takkan laaqqoota poorta ken ka murkuja lakki qapa'e are ca; ma sede maana samayse piisa kayta?”

¹⁰ Yesuusi ka kide, “Samayse piitopa kutiisha.” Porose nefo oppaayye maanta immake. orrase kuti'e dikootaysho nefo nama kuma ken mina'e caan.

¹¹ Se kammaayye Yesuusi laaqqootase qeede ka qara kalataysade ka orrase kuti'e qoote. Ka asseew murkujase ishotta qooteew. Ishootta piisa ka wa ishootta parpaaccisna mina ca akkaden.

¹² Ete orra piisa dame ka duttane kammaayye, Yesuusi ka tamaarewwaadi kide, “A takka nefo patta in pannin mali moossowwa kela hase piisa ollopa poha.”

¹³ Ishootta ka laaqqootase a poorta ken moossowwa a samaytase dame kela hase ollopa pohen ka satara kudanka lakki oppa immaken.

¹⁴ Orrase ete wessen orra qawwanna a Yesuusi kode akkeeyye ikide, “Ini dukaatannen xuumampaytase piita qaropa de'o.”

¹⁵ Yesuusi ete akkima orrase irreetan isha qeeda ka nuqusa koda dikade upnaadeeyye, xawwaati a lammattati alle sekaade ka irroota qaropa fayyade.

Yesuusi akka pakateeta qaran desa loqqaan aane

¹⁶ Ete letta shishshipteeyye, tamaarewwaadi pakateetoppa xata lekkaden

¹⁷ ka koonkaappa fayyaden ka qinda katama Qifirnahoomi opa anta xa'en. Sitiiyyi letta tukkanta, umma Yesuusi ata ishootta kapopa in deene.

¹⁸ Qoota puppeeta harmo puuppinitto malla, pakateetase ka olkelan yaaqyaaqte.

¹⁹ Tamaarewwasene xaadi ete pishasene pulattaan pakateetase qaran desa kiilomeetireeta ken taaki lehi mina kitto aanen kammaayye, Yesuusi a pakateetase qaran desa loqqaan anno ka koonkasene kapopa deeno akken ka fuuren.

²⁰ Isha xoori i'ishootta kide, “Anaay, in fuuran.”

²¹ Ishootta ka xasan isha teyyaden ka koonkasene karopa isha fayyissa faden. Koonkaasene ka eennow porase a opa annaan kayen.

Yesuusi akkiman laaqqota caatta

²² Parraytaadiiyyi orrase pakateeteyye afa disiti hase, pakateetase qara akkima koonka takkan pattaaw caan, tamaarewwaadi ka xawwaati ishin aanen, Yesuusi ka ishootta olli koonka karopa in fayyannin upnaaden.

²³ Ma xoori koonkadda pila'e Tipradoosi desa xa'e ka, porase a oppa Yesuusi qinseeta kalata kode; orrase ka oppaayye laaqqota dame opa kapopa de'e.

²⁴ Orrose ete Yesuusi taaki tamaarewwaadi akka eyye in kinnin upnaadeneeyye, koonkadoosen oppa'e fayyaden ka Yesuusi fada'e, Qifirnahoomipa aanen.

²⁵ Ka ete pakateete afa disiti isha akkeneeyye, ishi kidene, “Kollissampayto, aytami arepa deete?”

²⁶ Yesuusi ka ishootta oorshe ka kide, “Anti dukaatannen ishina kiini, ishina wa malla ana faanittane, qoota laaqqoota damten ka duttanten malla diisheey, qoota wa orra qawwanna akkiten mallan.

²⁷ Ishina damta pannitto malla in yaalan. Sekapaayye damtase caatta paraparati koddinitto a Waaqa Aappa qara kobbeeta toomme a inna Waaqa ishina daannaneti yaala.”

²⁸ Orrase ka ishi kide, “Xawwi koda Waaqa kodeeta'e, maana kodeeta ino faani?”

²⁹ Yesuusi ka ishootta oorshe ka kide, “Ha koda Waaqa, isase a Waaqa erke amaneeta.”

³⁰ Ishootta ka ishi kidene, “Akkan akkino ka ke amanno'e, koda orra qawwanno maana ino akkissa ka maana koota?

³¹ Akkima taafamte ka kiinitto ‘Akka damane'e moonte xata ishootta laaqqoota daashe’ mina'e, aappadaanno koommaytoppa menna damen.”

³² Sitiiyyi Yesuusi ka ishootta kide, “Anti dukaatannen ishina kiini, a laaqqota moonte xata lekkatte ishina daashe Muusen ma a moonte xata laaqqota dukaata ishina daanno Aappinno.

³³ Laaqqota Waaqa a moonte xata lekkannitto ka orra piitati caatta daannito.”

³⁴ Se malla orrase ka isha kide, “Poqallaay, laaqqota asse pahato awta piisa ino daashe.”

³⁵ Yesuusi ka ishootta kide, “Ha laaqqota caatta ana. Nama ana kapopa deeno pakkanna in doxo, umma nama ana amanno, pakkanna in deepoodo.

³⁶ In ishina kiini ishina xoori i'ana akkiten ma ana a amanne.

³⁷ Nama a Waaqa Aappa ana daanno piisa, ana kapopa de'a, umma nama ana kapopa deeno, an alle lakopa an daanno.

³⁸ Anti waan malla moonte lekkade, akkaan henna isase ana erkeeti kodo diishe, akkan heenna mattiyyo kodo mallan.

³⁹ Heenna isaase ana erkeeti, orra isha ana daashe piisoppaayye akkan takka nefo an patinnin ka piraampira qaraayye tootoppa ishootta xaasho.

⁴⁰ Aa henna a Waaqa Aappinno, nama inna Waaqa akko ka isha amanno, akka caatta parapara akkado. Anti nefo kuyyaata piraampiratiiyyi tootoppa in isha xaasha.”

⁴¹ Qoota Yesuusi kide, “Laaqqota moonte lekkatte ana.” Malla Yihutaata isha kela qojqoojete

⁴² ka kiite, “Ini Yesuusi innasene a Yoosefinni?, Anka aappaaysho ka aayyaasso kuli an upnoo? kakuli isha atta kiini, ‘Moonte xatan lekkade’ ?”

⁴³ Yesuusi ka ishootta oorshe ka kide, “Pora an qoojqoojan.

⁴⁴ A Waaqa Aappa isaase ana erke ana kapopa tiito maliiyyi, nama takka nefo ana kapopa deena ettaninni in co; a ana kapopa deeno nefo, kuyyaata piraampiratiiyyi tootoppan isha xaasha.

⁴⁵ Mataaffa xuumampaya oppa itaafamte ka kiini, ‘Orra piisa a Waaqa kapa kollade kodda.’ Semmalla a Waaqa Aappa qara dakayno ka kela kollanno piisa ana kapopa deeni.

⁴⁶ Se kideese nefo, nama Waaqa Aappa akke ca kideetan ma, a Waaqa Aappa akke, isaase Waaqa kapa de'e patta.

⁴⁷ Anti dukaatannen ishina kiini, nama ana amanno, caatta parapara'e qapa.

⁴⁸ Anti an laaqqota caatta.

⁴⁹ Aappadaassin koommaytoppaayye menna damen ma ile'en.

⁵⁰ Laaqqota amoonte xata lekkatte sede; nama laaqqose damo, pakkanna in to'o.

⁵¹ Laaqqota a moonte xata lekkatte ka caatta daannitoo ana. A Laaqqose quda dammo piisa haka paraparati kallaada. Akka orra piitati caatta koddito'e, laaqqota an anti daanno so'ayyo.”

⁵² Sitiiyyi Yihutaata ka oli shiishte ka kiite, “namase akkan so'adi dammo'e, atta so'adi ino daassata ettansha?”

⁵³ Se malla Yesuusi ka ishootta kide, “Anti dukaatannen ishina kiini, ishina otoo so'a a inna nama'e a' damminiiyyi ka diikaadi a ikkinniniiyyi, caatta a qaptan.

⁵⁴ Aso'ayyo dammo ka diikiyyo ikkino piisa, caatta parapara'e qapa. Anti nefo kuyyaata piraampirati tootoppa in isha xaasha.

⁵⁵ So'ayyo damta dukaata, diikiyyo nefo, ikkayta dukaata.

⁵⁶ A so'ayyo dammo ka diikiyyo ikkino piisa, ananne kallaanni, anti ka ishan kallaani.

⁵⁷ Akkima Waaqa Aappa, isase caattampayta kodde ana erke, anti ka ishan caattampayta kodde mina'e, a so'ayyo dammo piisa, ananne caattampayta kodda.

⁵⁸ Semmalla oori laaqqotase moonte lekkatte sede, umma isheetta nefo isaase a aappadaassin damen minan. A laaqqose dame ile'en, maa xoori a laaqqose are kitto dama, haka paraparati kallaadan.”

⁵⁹ Yesuusi a Qifirnahoomiiyyi tikase aqinseeta a orra Yihuta kela kollinnooyye, asse haasawade.

qaaleta a caatta parapara

⁶⁰ Tamaarewwaadi oppa, lekaya ete sede dakayeneeyye, ikidine, “Haasoosen ikokkokiiy, ayno teyyatta ettansha?”

⁶¹ Yesuusi ka akka tamaarewwaadi qootoseti desa qoojqoojen hapuraadin upnaade ka ishootta kide, “Hela haasoosen ishin kehaytinni?

⁶² ka kuli otoo inna anama pora a turan oppa caan opa fayyannaan akka akkitaneeyye, desa atta kiitaneew?

⁶³ Acaatta daanno Hapura Waaqa diisheey, hupna nama we koda ettaninni in co; qaaletose an anti ishina haasawade, hapura ka caatta.

⁶⁴ Ma xoori ishin oppaayye orra demo a amanni in kinnini ca.” Yesuusi wa malla asse kide, paayyota qaraayyew a isha amanni in kinnin opa ayno akkima kodden, ayno ka isha qapsiiso qoota upo malla.

⁶⁵ Kammadesaaw Yesuusi ikide, “Wan malla ishina kide, ‘A Waaqa Aappa kapa ishi faqqatamto mali, nama ana kapopa deena ettaninni in co, tooy sede.’”

⁶⁶ Se minan tamaarewwaadi oppa lekaya ka isi kammandesa ooren. Ka awsiti desa paayyatte Yesuusi kamma anta alle diishen.

⁶⁷ Semmalla Yesuusi ka tamaarewwasene xaadi kudanka lakki kide, “Hela ishina nefo anta heentaneewwe?”

⁶⁸ Sitiiyyi Simoon- Peetiroosi ka oorshe ka kide, “Poqallaay, ayno kapopan anna? Ha atti qaaleta caatta parapara'e qapta.

⁶⁹ Ino in amanne ka akkima atti qulqullitta inna Waaqa koddite upnaanne.”

⁷⁰ Yesuusi ka ishootta oorshe ka kide, “Anti ishin kudanka lakki an reexadenne? Ma ishin oppaayye nama takka taaploosi.”

⁷¹ Sede nefo qoota innasene a Simooni asqorottittase Yihuta malla asse kide. Yihuta kadi punu tamaarewwosen kudanka lakki oppa takka kodde nefooyye, a Yesuusi qapsiiso qoota isha koddite malla.