Yohaannisi 5 - Mataafa Qulqulloota

Yesuusi akka toonnayta takka dinshe

¹ Se kammaayye qoota xayso nessuma a orra Yihuta caan malla, Yesuusi Yursaalamipa aane.

² Yursaalamiiyyi xarra kaharra kapa harta takka afa Iprutini Peetesayda kidammitto ca shaakkada a kelan tarpinaane ken ka kapa tiitayshen. Xarra takka xarra kahirra kidammo nefo ka kapaayye caaw.

³ [Paaqolaya ka orra ilda qara paten ka totoonnaya isho toobaya akata leka ka shaakkaasene kela muken ka lelleeha pishaseneeti'iw asanni.

⁴ Awta demooyye erkampattoota Poqalla'e deeni ka pishasene lellehinni. Oto pishasene olkelan lellehan kammaayye, nama paayyota, hartase oppopa xata lekkado, paaqaadi piisa kela dinni.]

⁵ Eeyyeeyye nama takkaka a para kunda sessa sette paaqe ca.

⁶ Yesuusi ka isha eyye mukke akke ka akka paaqosetin etaa kutta jare upnaade ka ishi kide, “Dina iheenta?”

⁷ Paaqolaytase ka ishi kide, “Poqallaay, oto pishasene lellehnaaneeyye, nama ana qeedo ka hartose oppopa xata ana lekkisho an qapo; oton anta kiinooyye, nama pila'e ana qattini ka oppopa lekkanni.”

⁸ Yesuusi ka ishi kide, “xa'e ka qoollaatti xaysado ka aane.”

⁹ Namase ka eennow dine ka qoollaadi xaysade ka aane. Sede nefo kuyyaata sampata a orra a Yihutaati asse koddite.

¹⁰ Semalla ukkumampaya a Yihuta ka namase dine kidenee, “Awwe qoota letta sampata koddite malla, akka qoollaatti xaysatto'e seera ke' faqqanni in co.”

¹¹ Isha xoori i'ishootta kide, “Namase ana dinshe ana kide, ‘Qoolaayti xaysado ka aane.’”

¹² Ishootta ka isha kaassaden ka kidene, “A ke kide, ‘Qoolaayti xaysado ka aane’ Ayno?”

¹³ Namase xoori qoota samayta koope, Yesuusi nefo ka porose oppa tawe ka sekaade malla, nama isha dinshe ayno akkima kodde in upnaanne.

¹⁴ Se kamma Yesuusi ka tika qulqulloota kela'e namase akke ka ishi kide, “Amma oori iddinteey, akka wa se qara qapa ke qare in kaynini'i, arepa desa oori juppoota an kodan.”

¹⁵ Namase ka aane ka namase isha dinshe akkima Yesuusi kodde, ukkumampaya a Yihutaati lele.

¹⁶ Qoota sede sampatan kode malla, ukkumampaya Yihuta ka Yesuusi pora daanni.

¹⁷ Yesuusi xoori i'ishootta oorshe ka kide, “Aappinno awta piisa koda kooni, anti nefo asseewwen kooni.”

¹⁸ Sede a Yesuusi asse kide, ikka akka ukkumampayasine a Yihuta Yesuusi ishshane'e a kuttaati ishootta nyarisse. Sede nefo, wa malla asse koddite, qoota isha sampata pashshe patta mallanne ma, qoota kide “Waaqa Aappinno” Ka Waaqa kapa isi qape malla.

Hupna ukkummeeta a inna Waaqa

¹⁹ Yesuusi ka ishootta oorshe ka kide, “Anti dukaatannen ishina kiini, inna Waaqa wa Waaqa Aappa koona ikka akke kodeeta maliiyyi, hupnaadi a ukkumeetatin we takkan nefo kodeeta ettaninni in co. Wa Waaqa Aappa koona, inna Waaqa asseew kooni.

²⁰ Waaqa Aappa qoota innaadi jaalanno malla, wa koona piisa ishi akkinni ka akka ishin qawwasso'e, koda se qaropa qapo kuli ishi akkisha.

²¹ Akkima Waaqa Aappa orra le'e tootoppa xa'inno ka ishootta caatta daanno mina'e, inna Waaqa akkimose minae'ew nama ishi aako caatta daanni.

²² Waaqa Aappa nama takka nefo qara faranni in co, ma firteeta piisa innaadi'i daashe.

²³ Sede nefo wa malla asse kode, orra piisa, akka Waaqa Aappa ulfeessino mina'e, akka asseew inna Waaqa ulfeesso malla. Nama inna Waaqa ulfeessini in kinnin, Waaqa Aappa, isase innaadi erke nefo ulfeessini in co.

²⁴ “Anti dukaatannen ishina kiini, nama qaaletiiyyo dakayno ka isase ana erke amanno caatta parapara'e qapa; isha tootoppa desa caatta oppopa tuulleey, isha qara in faratamto.

²⁵ Anti dukaatannen ishina kiini, eta a oppaayye orra le'e nessa inna Waaqa dakayo de'a. Kiseese nefo amma; a isha dakayna piisa ka caattaan kallaadan.

²⁶ Waaqa Aappa akkima paada caatta kodde mina'e, asseew innaadi paada caattati kode.

²⁷ Ka qoota inna a nama kodde malla, akka farato'e hupna ukkumeeta ishi daashe.

²⁸ Sede ishinan qawwannin, saateta a oppaayye orra hawla kara co piisa nessaadi dakayo de'a;

²⁹ orra koda paxaara kode ka tootoppaayye xa'a ka caattaan kallaada; orra koda a neeqa kode xoori, tootoppa xa'a ishootta qara' faratamta.”

Maakkuma a qoota Yesuusi desa daasame

³⁰ “Anti mattiyyo hupniyyo a ukkumeetatin we takkan nefo kodeeta an ettansho. Ma xoori an Aappinno qara dakaye mina'en faranni. Qootana heenna a isaase ana erke qara' koono ka a xayyo qara an kooni an kinnin malla, firteetiiyyo dukaata.

³¹ Anti katin qoota mattiyyooti desan maakkummiiyyi, maakkumiyyo dukaata in koddo.

³² Ma xoori a qootiyyo desa maakkummo a pila'e ca. Wa isha qootiyyo desa maakkumma akkima dukaata kodden in upa.

³³ Ishina Yohaannisi kapopa orra erkiten, isha ka qoota dukaatati desa maakkume.

³⁴ Waan malla asse kide nefo, akka ishina dintan malla diisheey, qoota maakkuma nama ana parpaaccisno mallan.

³⁵ Yohaannisi akka ipsa opayna ka la'ayna mina'e kodde; ishina ka eta shakkaya kara ipsoosen xaadin xasootta faaten.

³⁶ Anti xoori maakkitta a Yohaannisi qara qapon qapa; maakkittiiyyo nefo, kodase akkan kodo Aappinno ana daashe. Kodoose an anti koono nefo, akka Waaqa Aappa ana erke qootiyyo desa maakkummi.

³⁷ Waaqa Aappa isase ana erke, isha mattaadi qootiyyo desa maakkume; ishina xoori apari nessaadi a dakayne; umma akka paho a akkine.

³⁸ Ishina qoota isase a isha erke a amanni a kinnin malla, qaaletaadi ishin kara kinnaanni in kitto.

³⁹ Ishina qoota mataaffa qulqllootatin a caatta parapara akkattan ishina pahanaannitto malla, ishootta karaawwe qorrittan. Ishootta xoori qootiyyo desa maakkummi.

⁴⁰ a kodditoma, ishina caatta akkatta'e an opa deena a heentan.

⁴¹ “Anti nama qara ulfeena an faani an co,

⁴² ishina akkima issi piisan Waaqa a jaalanni a kinnin in upa;

⁴³ anti maxxa Aappinnotinnin de'e, ma ishina ana a' teyyanne. Nama pila xoori katii maxxa mattaaditin de'ayye i'isha teyyattan.

⁴⁴ Ishina olqaraayye ulfeena teyyanna ka ulfeenase Waaqa takkayta kapa teyanno, akkatta in heennini, atta amana ettanissan?

⁴⁵ An anti fuula Aappinno tura ishin xasaso ishina in pahanaannin. A ishin xasaso Muusese a kippannittaneey.

⁴⁶ Katin Muuse amanten kiiteeyye, isha qootiyyo desa taafeey, ana nefo amanni heenten.

⁴⁷ Oto wa isha taafe a amanni a kinniniiyi, atta qaaletiyyo amannittan?”