Yohaannisi 4 - Mataafa Qulqulloota

Yesuusi isho iskatteeta takka a piita Samaariya

¹ Sitiiyyi Feresaata ka akkima Yesuusi a Yohaannisi qaran qapto orra lekayta tamaarewwaadi kodanno ka pishaan ishootta jaqqino dakayte.

² A koddito ma a pishaan orra jaqina tamaarewwa Yesuusi diisheey, Yesuusi mattaadi pishaan orra jaqqni in co.

³ Yesuusi, wa qootaadi desa kidame Fersaata akka dakayte ete upnaadeeyye alle piita Yihuta oppaayye piita Kelila opa tiitaawe.

⁴ Ete piitase a Kelila opa annooyye, piita Samaariya oppan tarpeeta isha parpaaccisni.

⁵ Ikka semmalla katamasene a Samaariya Sikaari kidamma, porase Yayqoopi innaadi Yoosefi daashe kapa ca, opa aane.

⁶ Eyyeeyye ela pisha a Yayqoopi ka ca. Yesuusi qoota poreeyye de'e ka kafade malla, elase kapa'e kuti'e. Sitiiyyi letta saateta lehi mina'e kitta.

⁷ Sitiiyyi iskatteeta takka a Samaariya ka pisha oraapatta elase kapopa deete. Yesuusi ka isheetta kide, “Pisha ikkayta ana daashe.”

⁸ Sitiiyyi tamaarewwaadi katamaapa damta pidda aanen.

⁹ Iskatteese a Samaariya ka Yesuusi kiite, “Atti a Yihutittaay, atta ana iskatteeta a Samaariya qara kaassanni ka kiini ‘Pisha ikkayta ana daashe?” Wa malla asse kiite nefo, qoota orra a Yihuta isho a Samaariya olli kali in kinnin malla.

¹⁰ Yesuusi ka isheetta kide, “Katin daassata Waaqa isho sede ke kiino ‘Pisha ikkayta ana daashe’ Ayno akkima kodde upta kiite, helani ke isha qinsanni heene; isha ka pisha caatta ke daanni heene.”

¹¹ Isheetta ka ishi oorisse ka kiite, “Poqallaay, atti wa ishin oraapnnaane a qaptooy, ela nefo karan xata isekiiy, ka kuli ayshaayye pisha caatta qeetta?

¹² Hela atti aappinno Yayqoopi a eloose ino daashe qaraayye qapta? Isha ka hellaadi ka horeetaadi piisa eloose karaayyew iken.”

¹³ Yesuusi ka isheetta oorshe ka kide, “Nama pishosen ikko piisa, lammatta ideepooda,

¹⁴ ma nama pisha an anti daanna ikko, haka paraparati lammatta in deepoodo. Pisha an anti daanna, nama ikko kara'e, ela pisha caatta paraparati paadino koddan.”

¹⁵ Iskatteese ka ishi kiite, “Poqallaay, arepa desa akkan pisha'e an deepoonnini'i ka oraapatta'e an deenini'i, atara pishosen asse paha ana daashe.”

¹⁶ Yesuusi ka isheetta kide, “Aane ka diirtaayti hale ka arepan xooye.”

¹⁷ Isskatetase ka oorisse ka kiite, “Anti diirta an qapo.” Yesuusi ka isheetta kide, “Sede akkiinitto ‘Diirta an qapo’ dukaata lelte.

¹⁸ Turan, diirta keni qapta ma, amma nama a ke olli co diirtaaytin, semmalla dukaata haasaawatte.”

¹⁹ Iskatteetase ka ishi kiite, “Poqallaay, atti akkima xuumampayta koddite amman upnaade.

²⁰ Aappadaanno irroose qarae sakataden. Ishina xoori ikkiinittane ‘Orra, Yursaalami kara sakatatta ishootta faani.”

²¹ Yesuusi ka isheetta kide, “Iskatteetayti, akkima etaa oppa irroose qara taaki Yursaalami kara Waaqa Aappa, a sakatannin deeto ana amane.

²² Ishina Waaqa a upnini'i sakatannittan; ino xoori, dina qoota Yihutaatoppa de'o malla, Waaqa an upno'en sakatanninna.

²³ Ma xoori, orra dukaatan sakatanno, etaa a oppaayye hapura isho dukaatan Waaqa Aappa sakatadane de'a. Kiseese nefo amma ikayte, Waaqa Aappa orra asaantosetin ishi sakatanno faani.

²⁴ Waaqa Hapura, orra ishi sakatanno nefoow, hapura isho dukaatan ishi sakatatta ishootta parpaaccisnni.”

²⁵ Iskatteetase ka ishi kiite, “Dinshanpaytase a Waaqa reexade Kiristoosi kidammo akkima de'o in upa. Isha oto de'oyye, we piisa ino' lela.”

²⁶ Yesuusi ka isheetta kide, “Tin se amma ke olli haasawanno anti an isha.”

²⁷ Sitiiyyi tamaarewwaadi ka pora opa aaneneeyye tiitaawen ka de'en ka sede a Yesuusi iskatteeta olli haasawade oppa qawwaawen. a koddito ma, nama isha kaassade ka kide, “Maana' faani?” taaki, “Maana'e isheetta olli haasawanni?” Takka nefo in co.

²⁸ Sekkammaayye iskatteetase ka okkotaadi eyye diisse ka katamaappopa ante ka orra kiite,

²⁹ “Xooya ka nama wa an kode piisa ana' lele tooyya! Hela kati isha, Kiristoosise kodda?”

³⁰ Orra ka katamaappaayye sooke ka Yesuusi kapopa aane.

³¹ Sitiiyyi tamaarewwaadi ka Yesuusi, qinsaden ka kidene, “Kollissampayto, we shakkaya dame.”

³² Isha xoori i'ishootta kide, “Anti damta a ishina a upnin, an dammon qapa.”

³³ Tamaarewwaadi ka olli kidene, “Hela kadi nama damtan ishi de'ee?”

³⁴ Yesuusi ka ishootta kide, “Ha damtiiyyo, henna a isase ana erkeeti kodeeta ka kodaadi dikkissa.

³⁵ Ishina a' kiini a' kittane ‘Amma desa a fera kayto'e leya afuri ca’ Ma anti in ishina kiini, ela kida ka dulla akka fera kayen tooyya.

³⁶ Nama ferro mushshaaraadi akkada ka luukkata a caatta paraparati koddito ollopa qapsada. Semmalla a xotta aylino ka a ferro ollinniiw xasoonni.

³⁷ Semmalla deymatteetase kiinaane, ‘Takka i'aylini, a pila ka ferri’ dukaata.

³⁸ Anti akka wa a ishina kela ayyaallini ferattane'en ishin erke. Orra pila iyaale, ishina xoori wa yaalaaysho kela de'e'e feraten.”

³⁹ Akka iskatteetase maakkumte ka kiite, “Waan kode piisa ana' lele.” Katamoosen kara orra Samaariya lekayta ka amane.

⁴⁰ Semmalla ete orra Samaariya Yesuusi kapopa de'eyye, akka ishootta kapa jaro'e isha qinsaden. Isha ka kuyyaata lakki eyye' pire.

⁴¹ Qaaletaadi minanne, orra pila lekayta ka isha amane.

⁴² Ka iskatteesiti kidine, “Arepa desa waan malla isha amanninna wa atti ino lelte patta mallanne ma qootan ino mattinno dakayne ka akka dukaatan isha dinshampayta a piita kodde upnaanne malla.”

Yesuusi akkima inna saara takkati dinshe

⁴³ Yesuusi ete Samaariya kuyyaata lakki pire kammaayye, piita Kelila opa aane.

⁴⁴ Isha mattaadi'i, ihaasawade ka kide, “Xuumampayta piitaaysho oppa ulfeessaammi in co.”

⁴⁵ Ma xoori ete piita Kelila kayeeyye, orra Kelila xasanne isha teyyade. Sede nefo wa malla asse koddite, a xayso nessuma a qaran tarpeetati Yursaalamipa annaaneeyye, qoota wa isha eyye kode piisa akken malla.

⁴⁶ Se kammaayye Yesuusi katamasene a Qaana, piita Kelila kara ca, a oppaayye pisha taadeta wayneeta opa purshe, opa tiitaaweew. Sitiiyyi inna a saara takka a tika mankisteeta'e katama Qifirnahoomi kara paaqni.

⁴⁷ Isha ka akkima Yesuusi piita Yihutaati piita Kelila opa de'e dakaye ka isha kapopa aane ka akka katama Qifirnahoomi opa xata lekkado ka innasene xaadi dikke paaqnaa ka toota foolsade dinsho'e Yesuusi qinsade.

⁴⁸ Yesuusi ka ishi kide, “Ishina haka wa orra qawwanna ka olsa paha akkittan mali, a amanni a kittan.”

⁴⁹ Saarase ka Yesuusi kide, “Poqallaay, a innaayyo in toonin turan irra qara xata lekkado.”

⁵⁰ Yesuusi ka ishi kide, “Tikaaytipa kale, innaatti icaadaneey.” Namase ka qaaletase a Yesuusi haasawade amane ka tikaadipa kale.

⁵¹ Ete kallooyye, orxayaadi poroppa isha mina de'en ka ishi kidene, “Ha innaatti idinen.”

⁵² Isha ka saateta a oppaayye inna xaadi dinen ishootta qara kaassade. Ishotta ka ishi kidene, “Xala saateta tappa qaraayye awdase isha diishe.”

⁵³ Aappa opa inna seneti ka saatetase akkima saatetase a oppa Yesuusi kide, “Innaatti icaadan” koddite upnaade. Semmalla awwseti desa paayyatte isha isho toolaadi piisa ka Yesuusi amanen.

⁵⁴ Kodoose orra qawwanno a Yesuusi Yihutaayye Kelilaapa de'eyye kode a lammatta.