Yohaannisi 2 - Mataafa Qulqulloota

Yesuusi akkima piita Kelilaati katama Qaanati sankulta hemitta oppa akkaade

¹ Kuyyaata sessattatiiyyi, katamasene a Qaana piita Kelila kara caatiiyyi sankulta hemitta'e ca. aayya a opa Yesuusi nefo ka eeyyew kitta

² Yesuusi isho tamaarewwaadi kuli ka sankultose a hemitta oppopa halaamen.

³ Ete sankultase a hemitta oppaayye taadeta wayneeta piramteeyye, aayya a opa Yesuusi i Yesuusi kiite, “Ha taadeta wayneeta ipiraden.”

⁴ Yesuusi ka isheetta kide, “Aayye! waan koda ana lelaa a ettanisso! Etaayyo in dehaanneey.”

⁵ Sitiiyyi aayyaasso ka orxaya eyye caati kiite, “Wa isha ishina kiina koda.”

⁶ Yihutaata, qoota taanteta jaqqaysuma qapto malla, kaanewwa a dakaappa kodame lehi eyye ca. Kaanewwosen ka matta mina pisha okkota lakki taaki sessa qapanni.

⁷ Yesuusi ka orxayaseneeti kide, “Kaanewwosene oppa pisha immaka” Ishootta ka immaken ka afaappan kakkayen

⁸ Sekkammaayye Yesuusi ka orxayaseneeti kide, “amma oori muudda ka saara sankultati daasha” Ishootta ka qeeden ka daashen

⁹ Saarase a sankulta ete pishasene taadeta wayneeta opa pursame afaan tooyyeeyye, pora ishi de'en in upnaanne, orxaya pisha oraape xoori i'upan. Saarase a sankulta ka aappa a hemitta hale ka ishi kide,

¹⁰ “Nama piisa, paayyota'e taadeta wayneeta a paxaara dehanni ka oto orrase damta halaame iko kammaayye kuli, a neeqa dehanni, atti xoori taadetase a wayneeta paxaara'e haka ammati jarisse?”

¹¹ Yesuusi piita Kelilaati katama Qaana kara'e wa orra qawwanna oppa wossin orra qawwanna a paayyota kode ka seden ulfeenaadi akkishe. Tamaarewwaadi ka isha amanenen.

¹² Sekkammaayye Yesuusi aayyaasso ka hellaasso isho tamaarewwaadi olliiyyi katama Qifirnahoomi opa xata lekkade ka eyye kuyyawwa lamaya piren.

Yesuusi akkima orra tika qulqulloota kela paata katanno ka heraanno alle daane

¹³ Qoota xayso nessuma a qaran tarpeeta a orra Yihuta kela' foolsatte malla, Yesuusi katama Yurusaalami opa aane.

¹⁴ Ka orra tika qulqulloota karaayye xormada ka kaharra ka elela katanno isho orra eyye qa'e kaajaa purinno akke,

¹⁵ ka watarootoppa qajjeeta kode ka orrase piisa kahirra isho xormadasene ollinni tika qulqulloota kara sookshe. Ka kaaja orrase purinnooti alle' fide. Ka tarabbeessaasso alle kara kakkalshe.

¹⁶ Ka orra elela katannooti kide, “Sene piisa alle are kara maysha ka tika aappinno tika urmalaati in kodan!”

¹⁷ Sitiiyyi tamaarewwaadi ka akka taafamte ka kiinitto, “Qoota tikaaytiti desa Yoota an qapo a apitta mina ana kupe” Matte oorsaden.

¹⁸ Sekkammaayye ukkumampaya a Yihuta ka Yesuusi kidene, “Atti sede koda'e akkima hupna ukkumeeta qapto wa orra qawwanna maana ino akkissa?”

¹⁹ Yesuusi ka ishootta kide, “Ishina tikoose a qulqulloota qitqishsha, anti kuyyaata sessa kara in qupaay.”

²⁰ Ishootta ka ishi kidene, “Tikoose a qulqulloota qupa'e para kunda afuri lehi qeetteey, atti atta kuyyaata sessa kara'ew qupta?”

²¹ Yesuusi xoori sede a tika qulqulloota kide, qoota dakintaaditi desa haasawade.

²² Semmalla awta Yesuusi tootoppa xa'eyye tamaarewwaadi akka turan isha, sede haasawade matte oorsaden ka wa mataafa qulqulloota oppa' taafame isho qaaleta a Yesuusi haasawade amanen.

²³ Eta a xayso nessuma a qaran tarpeetatiiyyi wossene orra qawwanna, a Yesuusi Yursaalami kara cooyye kode qoota akken malla, orra lekayta isha amane.

²⁴ Ma xoori Yesuusi, qoota orra piisa upo malla, ishootta in amanne.

²⁵ Isha qoota wa karitta nama kara ca piisa upo malla, qoota namati desa akka nama takka nefo ishi' lelo parpaaccisni in kitto.