Yohaannisi 18 - Mataafa Qulqulloota

Yesuusi akkima qapame

¹ Yesuusi ete asse kide kammaayye, tamaarewwaadi olliiyyi naaba Qetroonitiiyyi afa disi opa aane. Ka eyyeeyye pora takka a dishima' karopa tamaarewwaadi ollin aanen.

² Yesuusi isho tamaarewwaadi qoota awta piisa porose oppopa ollopa annaan malla, Yihutase isha qapsiise iporose upa.

³ Semmalla Yihuta, kola foolisoota takkan isho mattiyya a tooytampaya a saarra qeesewwa isho a Feresaata kapa erkame'e isi kamma' qeede ka porase opan de'e. Ishootta nefo ipsa ka ila isho meeha oranna'e qapaden.

⁴ Yesuusi ka wa isha qara' kaya piisa upnaade ka ishootta turopa desa sooke ka ishootta' kide, “Ata ayno' faanittan?”

⁵ Ishootta ka ishi' kidene, “Yesuusise a Naasirati'in faaninna.” Isha ka ishootta' kide, “Ha ana” Yihutase isha qapsiise nefo, ishootta olliiyyiiw eeyye qa'anni.

⁶ Ete Yesuusi ishootta' kide, “Ha anaayye” Isi kamman desa kukaden ka piitopa seehen.

⁷ Yesuusi ka oppa' oorew ka ishootta kaassade ka kide, “Ata ayno' faanittan?” Ishootta ka kidene, “Yesuusise a Naasirati'in faaninna.”

⁸ Isha ka ishootta' kide, “Ha in ishina' kide ana; oton ana' faanittaneeyye, sene diisha, ikka aanen”

⁹ Sede nefo wa malla asse koddite, qaalese a kide, “Aappo, orra ana' daasse oppaayye takka nefo an patinne” akka dikkatto malla.

¹⁰ Simoon Peetiroosi qoota koraateta qapo malla, iyukade ka orxayta a saara qeesewwa' dayshe ka qudaayye napahata akkitta kate. Maxxa orxaytoseti nefo, Malkoosi kidammi.

¹¹ Yesuusi xoori iPeetiroosi' kide, “Koraatetaayti korkortaadi karopa oorshe. Kuppaayyosen a rakkoota a Aappinno ana' daashe, hela an ikko ke' pahata?”

Yesuusi akkima saara qeesewwa turopa qeedame

¹² Se kammaayye xelase a oranna ka ajajampayaasso isho mattiyyasene a tooytampaya Yihuta Yesuusi qapen ka hiden.

¹³ Ka paayyota qaraayye Haanna turopan aanen. Haanna nefo aappa opa haantota Qayyaaffase parose oppa, qeesitta kutta koddeeti.

¹⁴ Qayyaaffa isase ukkumampaya a Yihuta dehaame ka kide, “Kati' nama takka samayta malla toona iwayyi.”

Peetiroosi akkima Yesuusi marmade

¹⁵ Simoon Peetiroosi isho tamaaritta a pila Yesuusi kamma'e aanen. Tamaarittase a pila qeesitta kutta kapaayye i'upnaysame ka semmalla Yesuusi olliiyyi tika qeesitta a kutta karopa kulle.

¹⁶ Peetiroosi' xoori laka tulanne xarra kapa' qa'ade. Tamaarittase a saara qeesewwa isha upo ka de'e ka enentase' xarra tooytinitto' lele ka Peetiroosi kullishe.

¹⁷ Enentase xarra tooytinitto ka Peetiroosi' kiite, “Atti tamaarewwasene a namooseti oppaayye a takkanne?” Isha' xoori ikide, “Inna'i, ishoottoppa an qapo.”

¹⁸ Sitiiyyi qoota eta damayta' koddite malla, orxayasene isho mattiyyasene a tooytampaya, dila opaysaden ka kapa qaaqaaden ka awsanni, Peetiroosi ka ishootta olliiyyiiw qa'ade ka apittase awsanni.

Saara a qeesewwa kaassuma a Yesuusi' dehayshe

¹⁹ Sitiiyyi saarase a qeesewwa ka qoota tamaarewwaadi isho qoota kollissaaditi desa Yesuusi kaassade.

²⁰ Yesuusi ka ishi oorshe ka kide, “Anti nama piisa'en la'ayshe ka haasawade ka tikkasene a qinseeta a Yihutaata kelopa ollopa annitta isho tika qulqulloota kela, awta piisa kollishe; umma waan dekandekatti haasawade takkan' nefo in caan;

²¹ ka kuli maana'e ana kaassanni? Orra an ishootta' haasawannooyye ana dakaye kaassado. Waan haasawade ishootta i'upaneey.”

²² Ete Yesuusi sede haasawadeeyye mattiyyasene a tooytampaya eeppaayye qa'anna oppaayye, takka Yesuusi kandishe ka kide, “Saara qeesewwaati'i asse oorissa!”

²³ Yesuusi ka ishi' kide, “Oton qaaleta neeqa'en haasawadeeyye, a neeqa' haasawattiyyo maakkume, oton wa an haasawade'en dukaataayye maana'e ana da'inni?”

²⁴ Se kammaayye Haanna ka Yesuusi akkima hidamen qeede ka Qayyaaffa saarase a qeesewwa qaropa erke.

Peetiroosi akkima a lammattati Yesuusi marmade

²⁵ Sitiiyyi Simoon Peetiroosi iqa'ade ka apitta awsanni. Orra pila ka ishi' kideewwe, “Atti tamaarewwasene a Yesuusi oppaayye a takkanne?” Isha ka marmade ka kide, “Inna'i, anti ishoottoppa an qapo.”

²⁶ Orxaya a saarra qeesewwa oppaayye takka, isase daltayta namase a Peetiroosi qudaayye napahata mure kodde ka ishi' kide, “Porase a dishima oppaayye ishootta olli ke an akkine?”

²⁷ Peetiroosi ka oppa' oore ka marmadeew. Eennoow lukkalitta ka iyye.

Yesuusi akkima Pilatoosi turopa qeedame

²⁸ Se kammaayye, ikka tika Qayyaaffa kara Yesuusi qeeden ka tika a piddampaytase a piita opa Yesuusin aanen. Kiseeta nefo sitiiyyi teykanta a para qinno. Yihutaata qoota laahase a xaysonessuma a qaran tarpeeta qalammo dameeta ishootta parpaaccisnitto malla, akka in nyallini'i tika a piddamapayta piita karopa kulla diisse.

²⁹ Semmalla Pilatoosi ka ishootta turopa sooke ka ishootta kaassade ka kide, “Kisseeta a namoose qara' dehannittan maana?”

³⁰ Ishootta ka ishi oorshen ka kidene, “Namoose katin a neequmta koono in koddinin kiiteeyye, helani ke qaropa isha tarpinni an heenne.”

³¹ Pilatoosi ka ishootta' kide, “Ishina'ew mattaayshina isha qeeda ka akka seeraayshina qara isha qara' farata.” Yihutaata ka ishi' kiite, “Ino nama ikassa ino in faqqatamme.”

³² Sede nefo Yesuusi, toota atta pahato akkima to'o qaalese a haasawade, akka dikkatto malla.

³³ Pilatoosi ka a lammattati tikase karopa tiitawe ka kulle ka Yesuusi hale ka isha kaassade ka kide, “Hela atti a' nuqusa Yihuta'e?”

³⁴ Yesuusi ka ishi oorshe ka kide, “Hela atti isi kareela sede haasawannim, moon orra pila'e qootiyyo desa sede ke' lele?”

³⁵ Pilatoosi ka ishi' kide, “Hela anti an Yihutitta? Orraayshin isho saarra qeesewwa'e, ana qaropa ke tarpishe. Xawwa laadi maana' koote?”

³⁶ Yesuusi ka ishi oorshe ka kide, “Ha mankisteetiyyo, a piisse qara kiitiiyyi, akkan harka ukkumampaya a Yihuta oppa an pi'inini'i, orxayaayyo ana torpini in heenne. Ma amma mankisteetiyyo a piisse qare'en.”

³⁷ Pilatoosi ka ishi' kide, “Ka asseeyye, a' nuqusa peka?” Yesuusi ka ishi oorshe ka kide, “Akkiman nuqusa kodde ke kiini, anti waan malla dalade ka piita qaropa de'e, qoota dukaatati desa maakkuma malla. Nama dukaata quda kodde qaaletiyyo dakayni.”

³⁸ Pilatoosi ka kaassade ka kide, “Ata dukaata maana?” Ka sekkammaayye a lammattati Yihutaata turopa sooke ka ishootta' kide, “Anti dapa takka nefo isha qara'e, an akkine.

³⁹ Ma akka kollumaassina mina'e, xayso nessuma a qaran tarpeeta oppa awta piisan orra hidame oppaayye nama takka ishina' furriiy, hela akkan nuqusase a Yihuta ishina' furo iheentane?”

⁴⁰ Ishootta' xoori ihoren ka kidene, “Parpaani ino' fure diisheey, sede ino'en furan!” Parpaani' xoori xolma tooma.