Yohaannisi 14 - Mataafa Qulqulloota

Yesuusi akkima pora Waaqa Aappa kapopa orran anno kodde

¹ Kamma' desa Yesuusi ikide, “Karittaayshin dikattaan in kupannin, Waaqa amana ka ana kuli amana.

² Tika Aappinnooti pora a kallaata lekayta ca. Katin asse in kinnin kiiteeyye, ishina' lelli an heenne; pora a oppa' kallaattan ishina' harmissa'en aana.

³ Ka oton aano ka pora ishina' harmisho kammaayye, akka ishina pora an anti oppa co oppa' kallaattane'e, lammatta' de'a ka ishin qeeda.

⁴ Pora an anti oppan anno, akka upnaattan.”

⁵ Toomaasi ka ishi' kide, “Poqallaay, pora a opa annitto ino an upnooy, attan poraadi upnaatta ettaninna?”

⁶ Yesuusi ka oorshe ka kide, “Pora ka dukaata isho caatta ana; umma anoppan maliiyyi a Waaqa Aappa kapopa de'o in co.

⁷ Kati ana upnaatten kiiteeyye, Aappinno kuli upnaanni heenten. Ma are kulipaata i'isha upnaatten ka isha akkiten.”

⁸ Filippoosi ka ishi' kide, “Poqallaay, Waaqa Aappa ino akkishe ka i'ino kaytaay.”

⁹ Yesuusi ka oorshe ka ishi' kide, “Filippoosi, an eta asse ca ishin olli kallaanno, hela ana a upto? Ha nama ana akke, Waaqa Aappa akke. Ka kuli atti atta' kiini ‘Waaqa Aappa ino akkishe’?

¹⁰ Anti akkiman Waaqa Aappan co, Waaqa Aappa ka anan co, hela a amanni a kitto? Qaaletose an ishina' haasawanno, hupna ukkumeeta a mattiyyootinni, an ishina an haasawanni an co ma, a kodaadi piisa koono Waaqa Aappa isase anan co.

¹¹ Anti akkiman Waaqa Aappan co, Waaqa Aappa ka anan co amana; taaki kodaddoosen xayyo minan ana amana.

¹² Anti dukaatannen ishina' kiini, nama ana amanno, koda an anti koono koda ka laadi a se qara qapo koda. Anti Waaqa Aappa kapopan anni.

¹³ Waaqa Aappa akka inna Waaqa minan ulfeessamo'e, wa maxxiyyon qinsannittane piisan ishina' koda.

¹⁴ Kati we piisa maxxiyyon qinsannittaneeyye anti in koda.”

Yesuusi akka qoota hapura qulqullootati desa kippeeta daashe

¹⁵ Oton i'ana jaalannittaneeyye, ajajiyyo tooyta.

¹⁶ Anti Waaqa Aappan qinsada, isha ka xasa oorissampayta pila a haka paraparati ishin olli kallaado ishina' daasha.

¹⁷ Isha nefo Hapura dukaata. Piita qoota Hapuroose akkini in kinnin ka isha in upnin malla, teyyatta ettaninni in kitto. Ishina' xoori, qoota isha ishin olli co ka ishina kara co malla, i'isha uptan.

¹⁸ Akkima hellaa aayya ka aappa in qapnini mina'e, xawwaati alle ishina an diisho, in oora ka ishin kapopa de'a.

¹⁹ Eta shakkaya kammaayye piita anan akkito, ishina' xoori i'ana akkitan. Anti qootan caattampayta kodde malla, ishina' nefo caattaanne' kallaattan.

²⁰ Ka akkiman anti Waaqa Aappan co, ishina ka anan kittan, anti ka ishinan co awsiti upnaattan.

²¹ Nama ana jaalanno a ajajiyyo teyyanno ka ishin kallaanno, nama ana jaalanno, Aappinno nefo isha jaalanni; anti kuli ka isha jaalanni ka isi kuli ishi akkinni.

²² Yihutase a pila a Asqorottitta in koddinin ka ishi' kide, “Poqallaay, atta piita isi akkissa diissa ka ino isi akkissa?”

²³ Yesuusi ka ishi oorshe ka kide, “Nama ana jaalanno, qaaletiyyo tooytaanni; Aappinno nefo ka isha jaalanni; ino ka isha kapopa deena ka isha olli kallaanna.

²⁴ Nama ana jaalanni in kinnin qaaletiyyo tooytaanni in co. Qaalese a' dakkaysannittan, qaaleta a Waaqa Aappa isase ana erkeeti diisheey, xayyon.

²⁵ Amma an ishin olli cooyyen, wossen ishina' lelli,

²⁶ xasa oorissampaytase Hapura Qulqulloota a Waaqa Aappa maxxiyyon erko xoori, we piisa ishin kollisha ka waan anti ishina' lele piisa akka matte oorsattane' koda.

²⁷ “Nakaytan ishina' diisha ka nakaytiyyo ishina' daasha; nakayta an anti ishina' daanno, nakayta a piita daannito minan. Karittaayshin dikattaanne in kupannin ka in fuurrin.

²⁸ Akkiman kide, ‘Anti in aana ka tiitaawa ka ishin kapopa de'a’ iddakayten. Aappinno qoota ana qara qapo malla, katin ana' jaalannittan kiiteeyye, sede an Waaqa Aappa kapopa annon xasoonni heenten.

²⁹ Eta a sene koddinaaneeyye, akka amantane'e, a in koddinin turannen qattishe ka ishina' lele.

³⁰ Piddampaytase a piissiti seetana, qoota deeno malla, arepa desa ishin olliiyyi a kuttati an haasawado; isha ana qara hupna ukkumeeta takka nefo in qapo.

³¹ Ma xoori, anti akkiman Waaqa Aappa jaalanno, piita akka upnaatto'e, wa a Waaqa Aappa ana ajaje piisan koda. Xa'a ka areppa alle anna.”